1 Temceo 2
2
Pwony i kom lego Lubaŋa
1Lok mukwoŋo aciki ni, bako dog, lega, lega ma gilego pi jo mukene, ki miyo pwoc, myero gitim pi dano ducu, 2pi luker ki jo ma tye i rwom ma malo, wek omi wabed mot laboŋo ayela, ma waworo Lubaŋa kun kitwa beco i yo ducu. 3Man ber, dok Lubaŋa Lalarwa bene pwoyo. 4En mito laro jo ducu, dok mito ni jo ducu guŋe lok me ada. 5Pien Lubaŋa tye acel, Ŋat ma ribo Lubaŋa ki dano bene tye acel, ma obedo dano, en aye Kricito Yecu, 6ma omine kene me bedo gin-kok pi jo ducu; meno en aye caden ma yam gimiyo i karene kikome. 7#2 Tem 1.11 Pi lok man, giketa me bedo latit-lok dok lakwena, (aloko lok ada, goba pe iye), an lapwony pa Lurok, i niye ki i lok ada.
8Man aye mumiyo amito ni co myero guleg Lubaŋa i kabedo ducu, kun gitaŋo ciŋgi maleŋ malo laboŋo kiniga nyo daa mo. 9#1 Pet 3.3 Kit meno, mon bene myero gurukke maber ki mwolo, kun gigwokke, pe i yer wic ma gikedo, nyo jabu, nyo tiko ŋut,, nyo ruk mogo me wel ma malo; 10ento bergi myero onen i tic maber ma gitiyo, meno en gin ma mitte bot mon ma gilwoŋŋe kengi ni gin jo ma woro Lubaŋa. 11Dako myero opwonnye laliŋliŋ kun bedo ki winy. 12Pe aye ni dako opwony dano nyo obed ki twero i kom co; en myero obed oliŋ aliŋa. 13#Acak 2.7; Acak 2.21, 22 Pien Adam aye ma gikwoŋo cweyone, ka doŋ lacen gicweyo Kawa. 14#Acak 3.1-6 Dok bene yam pe gibwolo Adam, ento gibwolo dako, ci omiyo opoto i bal odoko labalo. 15Kadi bed kumeno, dako gibilaro i kare me nywal, ka ce omedde ka bedo ki niye dok ki mar, kun bedo maleŋ ma gwokke kene.
Currently Selected:
1 Temceo 2: Aco85
Highlight
Share
Copy
Want to have your highlights saved across all your devices? Sign up or sign in
Acholi Bible © Bible Society of Uganda, 1985.