1 Jo Tecalonika 4
4
Kwo ma Lubaŋa mito
1Me agikkine utmegiwa, walegowu kun wabako dogwa botwu i Rwot Yecu ni, wumedde anyim nakanaka me bedo ki kit kwo ma wumako ki botwa, ma yomo cwiny Lubaŋa, ma wutye ka lubone-ni. 2Pien wuŋeyo cik ma yam wamiyo botwu pi Rwot Yecu. 3Gin ma Lubaŋa mito en ene, ni myero wudok jo maleŋ; wuwek tim me kwele obedi. 4Dano acel acel myero oŋe bedo ki dakone kene#4.4 bedo ki dakone kene nyo loyo kome kene i cwiny maleŋ dok me woro. 5Pe wuwek miti me kom obwowu, macalo lurok ma pe ŋeyo Lubaŋa. 6Ŋat mo pe otim bal bot ominne, dok pe obwole i lok man; pien Rwot culo kwor i lok magi ducu macalo wan yam watito botwu kun wacikowu bene matek. 7Lubaŋa pe olwoŋowa ka nyobbe ki bal, ento ka bedo jo maleŋ. 8Kit meno ŋat mukwero cik man, noŋo pe okwero dano, ento noŋo okwero Lubaŋa gire ma omiyowu Cwiny Maleŋ.
9Lok mudok i kom mar me omego, pe myero gico botwu lok mo iye, pien wun kikomwu yam Lubaŋa doŋ opwonyowu woko ni wumarre kekenwu; 10doŋ ada wun wumaro utmego ducu ma tye i Makedonia. Ento wabako dogwa botwa ni wumedde ka timo kit meno nakanaka, 11dok wuket cwinywu ka bedo mot. Dano acel acel opar pi ticce kun tiyo ki ciŋe kit macalo wacikowu kwede, 12wek jo ma tye woko gupwo kitwu, dok gin mo pe myero orem ki botwu.
Jo muto ki jo makwo i kare me dwogo pa Rwot
13Utmegiwa, pe wamito wubed ma wukwiya lok i kom jo ma doŋ guto; meno weko wubibedo ki cwercwiny macalo jo mukene ma gipe ki gen. 14Wan waye ni Yecu oto, ci ocer woko. Jo muto ma kun yam giye Yecu bene gitye kit meno; Lubaŋa bikelogi kacel ki Yecu. 15Watito botwu lok pa Rwot ma en owaco, ni, wan jo makwo ma wadoŋ nio wa i nino me dwogo pa Rwot, pe wabitelo nyim jo ma doŋ guto. 16Rwot kikome bilor piny kun a ki i polo ki lwoŋo me twer, ma dwan lamalaika maditte biwinnye, tum pa Lubaŋa bikok. Jo ma yam guto i Kricito aye ma gibikwoŋo cer, 17ka lacen wan jo makwo, ma wadoŋ gibigwarowa kacel kwedgi i pol, wek warwatte ki Rwot i dye yamo; ci doŋ wabibedo kacel ki Rwot nakanaka. Pi meno, wukwe cwinyu kekenwu ki lok magi.
Wuyubbe pi dwogo pa Rwot
Currently Selected:
1 Jo Tecalonika 4: Aco85
Highlight
Share
Copy
Want to have your highlights saved across all your devices? Sign up or sign in
Acholi Bible © Bible Society of Uganda, 1985.