كُورِنْتُوسْ اللّْوّْلَى 1
1
الْفَصْلْ اللّْوّْلْ
السّْلَامْ وْالصّْلَاة
1مْنْ بُولُسْ رَسُولْ الْمَسِيحْ يَسُوعْ بْمُرَادْ اللَّهْ، وْمْنْ سُوسْتَانِيسْ خُونَا فْالْإِيمَانْ، 2لْكْنِيسْةْ اللَّهْ اللِّي فْكُورِنْتُوسْ، لْهَادُوكْ اللِّي قَدّْسْهُمْ اللَّهْ فْالْمَسِيحْ يَسُوعْ وْخْتَارْهُمْ مْنْ كُلّْ مُوضْعْ بَاشْ يْكُونُو مْقَدّْسِينْ مْعَ ݣَاعْ هَادُوكْ اللِّي كَيْعَبْدُو إِسْمْ رَبّْنَا يَسُوعْ الْمَسِيحْ، اللِّي هُوَ دْيَالْهُمْ وْدْيَالْنَا.#الاعمال 18:1 3النِّعْمَة وْالْهْنَا مْنْ اللَّهْ بَّانَا وْمْنْ الرَّبّْ يَسُوعْ الْمَسِيحْ لِيكُمْ.
4كَنْشْكَرْ اللَّهْ مْنْ جِهْتْكُمْ فْكُلّْ وَقْتْ عْلَى النِّعْمَة دْيَالُه اللِّي عْطَاكُمْ بْالْمَسِيحْ يَسُوعْ، 5اللِّي بِيهْ وْلِّيتُو أَغْنِيَا فْكُلّْشِي، فْالْكْلَامْ كُلُّه وْفْالْمَعْرِفَة كُلّْهَا، 6عْلَاحْقَّاشْ تْبْتَاتْ فِيكُمْ الشّْهَادَة اللِّي تّْعْطَاتْ عْلَى الْمَسِيحْ. 7وْهَكَّا رَاهْ مَا نَاقْصَاكُمْ حْتَّى شِي مَوْهِبَة رُوحِيَّة وْنْتُمَ كَتّْسْنَّاوْ الْمْجِي دْيَالْ رَبّْنَا يَسُوعْ الْمَسِيحْ، 8اللِّي غَادِي يْخَلِّيكُمْ تَابْتِينْ حْتَّى لْلّْخْرْ بَاشْ تْكُونُو بْلَا عِيبْ نْهَارْ الْمْجِي دْيَالُه. 9وْاللَّهْ أَمِينْ اللِّي عَيّْطْ لِيكُمْ بَاشْ تْكُونُو فْالشّْرْكَة مْعَ وَلْدُه يَسُوعْ الْمَسِيحْ رَبّْنَا.
الْمَشَاكِيلْ بِينْ الْمُومْنِينْ
10وْرَانِي آ خُوتِي كَنْطْلَبْ مْنّْكُمْ فْإِسْمْ رَبّْنَا يَسُوعْ الْمَسِيحْ، بَاشْ تْكُونُو كُلّْكُمْ مْتَّافْقِينْ عْلَى كْلْمَة وَحْدَة. وْمَا تْخَلِّيوْشْ الْمَشَاكِيلْ يْفَرّْقُوكُمْ، وَلَكِنْ كُونُو مْتَّاحْدِينْ فْفِكْرْ وَاحْدْ وْفْرَيّْ وَاحْدْ. 11حِيتْ جَاتْنِي خْبَارْكُمْ آ خُوتِي مْنْ النَّاسْ دْيَالْ خُلُوِي، بْلِّي كَايْنِينْ شِي مَشَاكِيلْ بِينَاتْكُمْ. 12وْكَنْݣُولْ هَادْشِّي عْلَاحْقَّاشْ وَاحْدْ مْنّْكُمْ كَيْݣُولْ: «أَنَا دْيَالْ بُولُسْ»، وْلَاخُرْ «أَنَا دْيَالْ أَبُلُّوسْ»، وْلَاخُرْ «أَنَا دْيَالْ صَفَا»، وْلَاخُرْ «أَنَا دْيَالْ الْمَسِيحْ».#الاعمال 18:24 13وَاشْ الْمَسِيحْ تّْقْسَمْ؟ وَاشْ بُولُسْ اللِّي تّْصْلَبْ عْلَى وْدّْكُمْ؟ وْلَا بْإِسْمْ بُولُسْ تّْعَمّْدْتُو؟
14كَنْشْكَرْ اللَّهْ حِيتْ مَا عَمّْدْتْ حْتَّى وَاحْدْ مْنّْكُمْ مْنْ غِيرْ كِرِيسْبُسْ وْغَايُوسْ،#الاعمال 18:8؛ الاعمال 19:29؛ روما 16:23 15بَاشْ حْتَّى وَاحْدْ مْنّْكُمْ مَا يْقْدَرْ يْݣُولْ بْلِّي رَاكُمْ تّْعَمّْدْتُو بْسْمِيتِي. 16إِيِّهْ، عَمّْدْتْ حْتَّى عَائِلْةْ اسْتِفَانُوسْ. وْمْنْ غِيرْهُمْ مَا كَنْضَنّْشْ وَاشْ عَمّْدْتْ شِي وَاحْدْ آخُرْ.#1كورنتوس 16:15 17حِيتْ الْمَسِيحْ مَا صِيفْطْنِيشْ بَاشْ نْعَمّْدْ، وَلَكِنْ بَاشْ نْخَبّْرْ بْالْإِنْجِيلْ، بْلَا مَا نْعْتَمْدْ عْلَى كْلَامْ الْحْكْمَة دْيَالْ بْنَادْمْ بَاشْ مَا يْكُونْشْ الصّْلِيبْ دْ الْمَسِيحْ بْلَا فَايْدَة.
الْمَسِيحْ هُوَ قُوَّةْ اللَّهْ وْالْحْكْمَة دْيَالُه
18حِيتْ الْبْشَارَة بْالْمُوتْ دْ الْمَسِيحْ عَنْدْ النَّاسْ اللِّي مَاشِي مُومْنِينْ حْمَاقْ، وَلَكِنْ عَنْدْنَا حْنَا اللِّي نْجِينَا رَاهْ هِيَ قُوَّةْ اللَّهْ. 19حِيتْ مْكْتُوبْ فْكْتَابْ اللَّهْ: «غَادِي نْمْحِي الْحْكْمَة دْ الْحُكَمَا وْمَا نْقْبَلْشْ الْفْهَامَة دْ الْفُهَمَا». 20فِينْ هُوَ الْحْكِيمْ؟ وْفِينْ هُوَ الْعَالِمْ؟ وْفِينْ هُوَ الْفَيْلَسُوفْ دْيَالْ هَادْ الزّْمَانْ؟ وَاشْ مَا رَدّْشْ اللَّهْ الْحْكْمَة دْيَالْ هَادْ الدّْنْيَا حْمَاقْ؟ 21حِيتْ نَاسْ الدّْنْيَا بْالْحْكْمَة دْيَالْهُمْ مَا قَدْرُوشْ يْعَرْفُو الْحْكْمَة دْ اللَّهْ، وْهَكَّا بْغَا اللَّهْ يْنَجِّي اللِّي كَيْآمْنُو بِيهْ بْالْبْشَارَة اللِّي كَيْحَسْبُوهَا النَّاسْ حْمَاقْ. 22عْلَى هَادْشِّي رَاهْ لِيهُودْ كَيْطْلْبُو عَلَامَاتْ، وْالْيُونَانِيِّينْ كَيْقَلّْبُو عْلَى الْحْكْمَة، 23وَلَكِنْ حْنَا كَنْخَبّْرُو بْالْمَسِيحْ اللِّي تّْصْلَبْ، اللِّي هُوَ مُشْكِلَة لْلِيهُودْ وْحْمَاقْ لْلشّْعُوبْ اللِّي مَاشِي يْهُودْ. 24أَمَّا بْالنّْسْبَة لْلِّي خْتَارْهُمْ اللَّهْ، سْوَا كَانُو يْهُودْ وْلَا يُونَانِيِّينْ، رَاهْ الْمَسِيحْ هُوَ قُوَّةْ اللَّهْ وْالْحْكْمَة دْيَالُه. 25عْلَاحْقَّاشْ الْحْمَاقْ دْيَالْ اللَّهْ رَاهْ حْكْمَة كْتَرْ مْنْ حْكْمَةْ النَّاسْ، وْالضُّعْفْ دْيَالُه رَاهْ قْوَى مْنْ قُوَّةْ النَّاسْ.
26وْتّْفَكّْرُو آ الْخُوتْ، نْتُمَ اللِّي عَيّْطْ لِيكُمْ اللَّهْ، بْلِّي مَا فِيكُمْشْ بْزَّافْ دْيَالْ الْحُكَمَا عْلَى حْسَابْ الْحْكْمَة دْ بْنَادْمْ، وَلَا فِيكُمْ بْزَّافْ دْ الْقْوِيِّينْ وَلَا دْيَالْ الشّْرْفَة. 27وَلَكِنْ اللَّهْ خْتَارْ اللِّي كَيْعْتَبْرُوهُمْ نَاسْ الدّْنْيَا حْمَّاقْ بَاشْ يْحَشّْمْ الْحُكَمَا، وْخْتَارْ اللِّي كَيْعْتَبْرُوهُمْ نَاسْ الدّْنْيَا ضُعَفَا بَاشْ يْحَشّْمْ الْقْوِيِّينْ. 28وْخْتَارْ اللَّهْ الضُّعَفَا وْالْمْحْݣُورِينْ وْاللِّي مَا عَنْدْهُمْ قِيمَة فْالدّْنْيَا، بَاشْ يْمْحِي اللِّي كَيْعْتَبْرُوهُمْ النَّاسْ عَنْدْهُمْ الْقِيمَة، 29وْهَكَّا حْتَّى وَاحْدْ مَا يْقْدَرْ يْفْتَخْرْ قُدَّامْ اللَّهْ. 30وَلَكِنْ نْتُمَ بْفْضَلْ اللَّهْ وْلِّيتُو فْالْمَسِيحْ يَسُوعْ اللِّي وْلَّى لِينَا هُوَ الْحْكْمَة مْنْ اللَّهْ وْالتَّقْوَى وْالْقَدَاسَة وْالْفِدَاءْ. 31وْكِيفْ جَا فْكْتَابْ اللَّهْ: «اللِّي بْغَا يْفْتَخْرْ، يْفْتَخْرْ بْالرَّبّْ».
Currently Selected:
كُورِنْتُوسْ اللّْوّْلَى 1: MSTD
Highlight
Share
Copy
Want to have your highlights saved across all your devices? Sign up or sign in
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved