ROMENA 1
1
Ɗek-tuwta hiɗi gi-deɓta
1Paulus, ma sunda vi Kristu Yesu, yumi kay lop apostolla, vileki goyo kay kus labara ma firina vi Lawna, 2ma Lawna dum jewe hiɗi vun sa jobta valamu hay ɗota-peldetta. 3kay Goora valamu, nam ma kuɗ sliwna vuɗi hay jafna vi David, 4nam ma ŋusta vi peldetta di goy kalam gasi ala: Namu mi Goora vi Lawna ma gaŋeraŋ kuɗumna, kuɗ dayta valam kulo'o hay mitta pa, mi Yesu Kristu Bum-Sumuna vaya. 5Namu ma numa fi slugota hiɗi lop apostolla kuɗumu, kuɗ semda valamu, numa ma nar jaf-sumun kaf hay hum-vunda vi vida, 6jarsiya nigi kaw yiyawa tam Yesu Kristu.
7Tam nisi sa Lawna dikam tiy kisina kaf, sa yiy goyo kay muɗ peldete, sa hay Rom, hin slugota hiɗi toyta vi Lawna Buya hiɗi Bum-Sumuna vaya Yesu Kristu vulis tigi vulge.
Minda vi Paulus kay sa tapna hay Rom
8Ma jewna, nan gideɓe mi Lawna vanu hay Yesu Kristu kigi kafe, kay mige vida vigiya se' ka tiy goy hay nagata pete. 9Kay Lawna ma nan sunum hiɗi dikan kaf hay labara ma firina vi Goora valamna, nam ka wi ala human ka gan kigi dok-dok hay siɗawta vanu. 10Nan ka siɗaw dok-dok ala, la Lawna mina, nan fi co tigiya. 11Kay gizangi vanawa, nan min kay ɗuwgiya, kay nan min ɓuraw tigiya vulda-slugota vi ŋusta kay nigi ma fi donota. 12Kayn ala nanu hiɗi nigiya ma vul donot mi tuway hay vida vaya, figita hiɗi fanta.
13Ɓosiyonna, nan min ala nigi ma lak hay bay-wida kay kaynɗi, a nan so tuwan sen ŋolo kay coys tigiya kay fi vuɗna jargiya, ki jar jaf-sum segen nala, may slen telanu ta-ta wulini. 14Bal ka kanu tam sa Grekŋa hiɗi sa barbara kaw, tam sa yisi malina hiɗi sa muguruna kaw. 15Kayni mi va ma vulan varta kay di labar ma firin tigiya, tigi nigi sa ka hay Rom kaw.
16Kay nan may li zulo'o kay labara ma firina noŋɗi, kay namu mi gaŋeraŋa vi Lawna kay suɗ gigekaw ma min vi'e, sum sa Yudiyan jewe, bugolda sum sa Grekŋa. 17Kay hay kayni ɗigerta vi Lawna vul tuwa' goy haraŋi hay vida kuɗ vida, ki ɗot ka ɗoy nala ala: sa ma ɗigera ma mus iriya kuɗ vida.#1:17 Ɗuw Hab 2:4.
SULUKŊA KA KAY SUMUN KAF
Kitata vi Lawna vi sumunawa
18Kay ɦiyda vi Lawna ɗek tuwa' ay goy wuralawn pa kay jiw-zlata hiɗi bay-ɗigerta vi sumuna sa gasit kirsi ta, may nisi lak hay bay-ɗigerta. 19Kay sle ma san as wum kay Lawna ka goy haraŋi kirsiya, kay Lawna vul kayni kirsiya. 20Kay lopna valamu ma bay-wina, gaŋeraŋa valamu ma vatɗina, ŋolda valamu, san as wum goy haraŋi tam tun cawta vi nagati pa, kay san as wi kayni kuɗ lopna valam ma lina. 21Nisi as hulot goyɗi, kay mige nisi wi Lawna, may nisi may suburum ki Lawn naɗi, min hot gi-deɓta talamɗi kaw, may nisi muɗi joo'o hay varta visiya, diksi bay yali, muɗi jufunu kaw. 22Hay li ma nisi subur tuwsi kay yalla visiya, nisi muɗi ɦay-ɦaya hay na'ta. 23Gajijita vi Lawn ma ɓulakɗina nisi muɗa' hiɗi va ma sli tuw sana ma ɓulaka, va ma sli tuw layayna, va ma sli tuw muur ma selem fiɗi fiɗina hiɗi sle ma ɦarmatna.
24Kay na'ta Lawna vulsi goyo tam liwista, kuɗ darta vi diksiya, kay nisi ma li sle ma zulona mi sliw tuwsiya jar-tuwsiya; 25Nisi sa muɗ gasita vi Lawna goy sinda, girif sle ma liyna, sunum kaw, hin Bumna ma li slena goyo, namu ma bolda ka kalamu hay vatɗit pa. Amen.
26Kay na'ta Lawna hinsi a nisi li sle ma zulona jar-tuwsiya, kay boyna visi kaw hin buur ma bur tam jufaysin goyo, muɗ lum mi sle ma sa-wuran lumɗina. 27Jufayna kaw nala, buur ma bur tam boyna visina nisi hinim goyo, nisi tiy kuɗ darta vi sliwna jar-tuwsi nisi jufayna, ta-ta jufayn li zlata-liwisi jar-tuwsi nisi jufayna, nisi kay tuwsiya fi wurakŋa vi viy-goyta visiyawa.
28Kay ki nisi min var kay wi Lawnɗi, nala Lawna vulsi goy hay varta waata, ta-ta nisi li sle ma zulona, 29nisi hobay hiɗi bay-ɗigerta kaf, hiɗi jiw-zlata, hiɗi niŋata vi slena, hiɗi joota, hobay hiɗi hunayta, ci matta, cirepta, ɗutta, sa ɓulak sem sumuna, 30sa hoso-hosona, sa yaw dira, sa ka gaw hiɗi Lawna, sa viyuk-viyukŋa, sa tiy sem tuwsina, sa sli yam tuwsi kulona, sa niŋa yal ma joon voksina, sa hum kuɗ sumaysiɗina, 31sa bay-yalla, sa wi gattaɗi, sa murlina, sa vul gidɗi, sa wi haw saɗi. 32Sum sa wi gatta vi Lawn goy haraŋi, a sum sa ki kayn nana nagawa kay mitta, kay nisi ka li slen kayni ɦawaɗi, may tap vunsi hiɗi nisi sa lumna kaw.
Currently Selected:
ROMENA 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001