MALAKIYA 1
1
Sumun may wi ŋaatɗi
1Yoboyna vi Ma-Vatɗina ma nam dum kat sa Israyella hay vun Malakiya:
2Ma-Vatɗin di'e:
Nan mingiyawa, may nigi di'e:
Naŋ minma hiɗi mige?
Esaw may mi ɓasum Yakubna ɗisu?
Din mi Ma-Vatɗina.
Yakub nan minimu,
3may Esaw nan ka gaw hiɗi namu,
Hiɗiyna valamu nan muɗum mi liyn ma sa mus hayɗi,
vocota valamu nan vula' goy mi cekemna ma hay fulda.
4La sum sa hay Edom di ala:
Ziyna vay ɦo gaa kaw,
nay hot kotom kulo'o,
Ma-Vatɗina vi vok-ma-duura ka disi ala:
Makgi tuwgi a inim kulo'o,
nan ma ɦom gaa'a.
Ma muɗ yisi ɗawn ala nagata vi sum sa joona,
sum sa muɗ dik Ma-Vatɗina tisi ɦiy dok-dokŋa.
5Irgi ma cuk kalamu,
nigi kay tuwgi ma di ala:
Ŋolda vi Ma-Vatɗina ɓa' jiki goy ŋor vun-nagata vi sa Israyella.
Nisi pi lawt kay muliyan-sa-ɗifinna
6Goora nam sli yam bulum kulo'o,
gorvon kaw sli yam mulamna kulo'o,
la nan mi bugiya,
sli-yamda ta nigi slan yan kulo hiɗi na'ta ka arige?
La nan mi mulgina,
narta ta nigi li nar kuɗan hiɗi na'ta ka arige?
Din mi Ma-Vatɗina vi vok-ma-duuura,
di tigi nigi muliyan-sa-ɗifinna,
nigi sa ɗuw semda van ki va ma liw nalana,
nigi sa di ala:
numa muɗaŋ semda vaŋ bis muɗtige?
7Nigi li ɗifin tanu hiɗi tin ma liwisna,
bugolda nigi hot di ala,
nigi muɗaŋ semda van liwis muɗtige.
Nigi di lo ala tablena vi Bum-Sumuna nagay a muɗum goy bisi.
8Hay li ma nigi li ɗifin tanu hiɗi faray ma iram dukina,
kayn may jooɗi su?
Hay li ma nigi li ɗifin hiɗi faray ma dirlayna,
lebo ma galam moyna kayn may jooɗi su?
Faray ma ki kayn nalana vulgit mi guvernera vigi tige,
nam as vigi hiɗi firit su?
Din mi Ma-Vatɗina vi vok-ma-duura.
9Siɗawgi Lawn wulini, kay nam li slugot kaya.
Van kayni may goy vigi pa,
nam ma vigi hiɗi firita klasige.
Din mi Ma-Vatɗina vi vok-ma-duura.
10Tuɗaygiya!
Sa jargiya ma min duk vun-ziyna,
kay nigi ma ŋal kut kuɗ giwin-ma-ɗifinna van waaɗi mi gige?
Nigi may kiran ŋaa'a noŋɗi,
din mi Ma-Vatɗina vi vok-ma-duura.
sle ma nigi vulum tanu hiɗi ɓigiya nam kiran bisi.
11Kay tun caw hay dayta vi fatta ta-ta hay ɗikka va'a,
semda van ka tiy ŋolo jar jaf-sumuna,
hay liyn kaf nisi ka ŋal hadaf ma hisna hay semda vanu,
nisi ka vulan sle ma hay liyamna;
kay semda vanu na' ka tiy ŋolo jar sumuna,
din mi Ma-Vatɗina vi vok-ma-duura.
12May nigiya, nigi ka muɗan semda van goy waa'a,
kay nigi di'e:
tablena vi Bum-Sumuna nam liwisi,
slen ma nay fum kuɗumna mi tin ma muɗ muɗi kiray bisi.
13Nigi di'e:
Makma nala kay mige?
Nigi may slan yan kuloɗi,
din mi Ma-Vatɗina vi vok-ma-duura.
May nigiya, nigi ka mar faray ma kulina,
ma dirlayna hiɗi ma tuwam moyna;
cani mi vulda ma nigi ka li'e.
Nigi var ala nan as kay vum hay ɓigiya su?
Din mi Ma-Vatɗina.
14Joot kay sa ma ɗutta,
ma fukunay ma patina ka hay farana valamu,
may nam vulum goyo kay lum ɗifini
tam Bum-Sumuna mi fukunay ma ŋolina.
May nanu mi mul ma ŋolo,
din mi Ma-Vatɗina vi vok-ma-duura,
semda vanu na' tiy ŋolo jar Jaf-sumuna.
Currently Selected:
MALAKIYA 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001