SA KA KITANA 6
6
Gedeyon ka kitata vi sum sa Israyella
1Gurona vi Israyel hot li va ma ɓulak dik Lawn lo. Lawn vulsi goy hay ɓam sum sa Madiyanna ta-ta ir busat siɗiya. 2Sum sa Madiyanna las sum sa Israyel ŋolo, muɗ kayni gurona vi Israyel ŋay goy kuɗ zul hiɗiyna, hay liy ma boŋoloŋŋa, jik kulo kay hiɗiy ma fiyokŋa kaw kay ŋay tuwsiya. 3Hay li ma sa Israyel cuk jafnawa gaa hay sinena, sum sa Madiyanna hiɗi sum sa Amalekŋa hiɗi sum sa ay gal kuɗuw pana co kisi de', 4Nisi tok tuwsi hay sinena vi sa Israyella, wan ma zumi hay sinena nisi param goyo, ta-ta vunsi gaa Gaza goŋ', wana vi sa Israyel ma ka kisi a tin lay, luwayna visi lay, fukunayn lay, kuron lay, nisi yawam kaf, hin va mara mi sa Israyel noŋ ne' kaw a ti vunsi noŋɗi. 5Sum nisin co kayni hiɗi farayna visi kuɗsi lay, sle ma buura ka kisi lay, nisi co kayni kuɗ tuwsi ŋol hini-hini' ki baara nala, sa as ŋaɓsi noŋɗi. Lamgana visi kuɗsi lay, nisi co hay nagat kayn ta' ɓuraŋ de'.
6Kuɗ kayni sum sa Israyel fi makka ŋolo hay ɓam sum sa Madiyanna. Nala nisi hot tiy tam Ma-Vatɗina, jobomu kay nam ma gut kuɗsiya. 7Hay li ma gurona vi Israyel ka tiy kay lasta ma sum sa Madiyanna ka vulsit ki kayn nala, 8Ma-Vatɗina gisi sa ma jobta ay kepe nam disiya: Humgi dita vi Ma-Vatɗina Lawna vi Israyel: Nan yawgiyay goy hay nagat Egipte, goy hay ziyn ma ligi gorvona. 9Nan butgiyay goy hay ɓam sa Egiptena, nan butgiyay goy hay ɓam sum sa ligi lasna, nan munsi vokgiya, nan vulgi nagata visi migi nigiya. 10Nan digi goy jew ala nan mi Ma-Vatɗina Lawna vigiya, sum sa Amoriyan sa nigi co hay nagata visin ɗawni, nigi ma li nar kay lawayna visi noŋɗi. May nigiya, nigi min human vunanɗi.
11Bugol kayni Sunda-Wuralawn co'o, nam mus gaa kuɗ gu-terebintena ma ka hay Ofra. Kayni mi guna vi Yowas ma hay jafna vi Abiyezer. Nam fi Gedeyon goora vi Yowas to alkamarena valam kalaf hay liyn ma kesl vuɗ gulda-guldan zaw. Kay nam min ala sa Madiyanna irsi ma wumɗi. 12Sunda-Wuralawna vul tuwam goy kiram haraŋi dumu: Ma-Vatɗin ka hiɗi naŋu, naŋ sa ma jufna hiɗi ma donona. 13Gedeyon hot dit tam sunda-wuralawn ala: Hey! Sam-ŋolla vanu, lali Ma-Vatɗin ka hiɗi numa'a na, sle ma ki kayn nala as co kuma su? Ɗekka ŋolda ta sumayma vuma labara ala Lawn yawma ay goy hay Egipte pata ka arige? Numa wulin noyay goy kay Ma-Vatɗin noyo, hini goy hay ɓam sa Madiyanna hini.
14Ma-Vatɗina muɗ iram kiramu dumu: Tuɗaŋis hiɗi donota vaŋ na'ta, butaŋ sa Israyella goy hay ɓam sa Madiyanna. 15Gedeyon hot di tam Ma-Vatɗina lo: Hih! Sam-ŋolla vanu, sum sa Israyella nan butsi goy ɗawn hiɗi mige? Hay jafna vi Manase kayn ziyna vi bun mi ma jaram haw suw kafna, lo hay ziyna vi bun kayn nan mi ma cawna. 16Ma-Vatɗina dumu: Nan kay tuwan ka tun vokaŋu, sum sa Madiyanna naŋ ma kol kisi ɗawn nisi ma muɗ vokaŋ ki sa ma kepna ɦawa nala. 17Gedeyon dumu: La naŋ min lan slugot gasiya ni, naŋ ma ɗekan va kiran kep ma nan ma wi gasi ala di tan zawni mi naŋ Ma-Vatɗina. 18Nan siɗawaŋu, kaŋ na zaw' kalɗi, nan tuɗ gar vulda kay hota'ay mara' gaa vokaŋu. Sunda-Wuralawna hotom dita: Nan ka musi gaa tani ta-ta nan cub hotta vaŋu.
19Vuntuni vuntuni Gedeyon kal vo'o, nam ŋat goor ɦu ma jakayna, ŋa futuwna, kot fun-bay-kufna, nam ko sliwn hay goor tikisita, niyamu#6:19 niyamu tan kayni mi dafna. nam ɦokom hay doŋolayta, tuɗum tam sunda-wuralawna gaa kuɗ gu-terebintena, vulum mi sunda-wuralawna. 20Sunda-wuralawna dumu: Slaŋ sliwna hiɗi fun-bay-kufna, tunaŋgi kulo kay hiɗiyn zawni, yamaŋ niy sliwn kalamu. Nam li ki sunda-wuralawna di talam nala. 21Sunda-wuralawna meɗ ɓalam goyo, jo sliwna hiɗi fun-bay-kufna hiɗi sin-zugulda ta ka hay ɓalamta, kut kalay goy hay hiɗiyn cilik' ŋal sliwna hiɗi fun-bay-kufna kaf goyo. Wulini wulini sunda-wuralawna may kiram loɗi de'. 22Bugol kayni Gedeyon wi ala kayni mi sunda-wuralawna yo. Nam di'e: Yaya! Bum-Sumuna Ma-Vatɗina, nan ma li linige, kay iran wi sunda-wuralawnawa goy haraŋ puɗaki? 23May Ma-Vatɗina dumu: Sleɗaŋ dikaŋu, kay naŋ as a mit loɗi. 24Gedeyon in liyn ma li ɗifin tam Lawna hay liy namna, nam tunum selem ala Lawn sle'ta. Vaydi kaw liy namna ka ta' hay Ofra, hay hoyok-ziyna vi gurona vi Abiyezer.
25Hay henjet na'ta Ma-Vatɗina di tam Gedeyon: Put ma joriyona vi buŋ zawni naŋ ma vumu, vaŋ put mara lo ma busam siɗiya, giwinna vi buŋ ma ŋal ɗifin kulo kalamna mi Baal zawni naŋ ma tom gaa'a, lawayna visi ma nisi girifimna zaw kulo kalamni naŋ ma zutum gaa'a. 26Naŋ kay tuwaŋ inaŋ liyn ma ɗifinna ma girif Lawna Ma-Vatɗina vaŋu kulo kay hiɗiyn namna zawni, put ma ma'na naŋ ma lum ɗifin hiɗi gu ma naŋ patamay goy kuɗ lawayna visi ma naŋ ɦom gaana. 27Gedeyon yaw sumun kuɗum doogo jar sa sunda valamu. Nam li ki Ma-Vatɗin dum nala. May nam min li kayni hay falaytɗi, nam lum hay henje'e, kay tuwam nari kay sum sa vo hay ziyna vi bulumna hiɗi sum sa hay hoyok-ziyna. 28Hay li ma sum sa vo hay hoyok-ziyna zliy kulo'o hay graw culumta kayni, liyna visi ma nisi li ɗifin mi Baal ɦoy gaa'a, lawna visi ma nisi girifimna ma tuni kulo kay liy namna zuti goy gaa'a, giwin mara ma li ɗifin ka ini baŋalamu, put ma ma'na ŋataya, kay lum ɗifin kulo kalamu. 29Nisi tun caw job tuwsi jar-tuwsi ala: Sa ma li nala kayni mi gige? Nisi job jar-tuwsi ŋolo gar sana. Sum segen disi ala ɦom gaa'a kayni mi Gedeyon goora vi Yowas. 30Sum sa hay hoyok-ziyna ka di Yowas: Guma goora vaŋay goyo, numa min cum goy mati, kay giwin-ma-ɗifinna ma numa li ɗifin mi Baal kulo kalamna, hiɗi lawn ma numa colom kulo kalamna nam ɓulakam goy kafe. 31Yowas di tam sum nisina sa co vokomna ala: Nigiya, Baal gut kalam si nigi su? Baal tun bugolom si nigi su? Sa ma gi diram kuɗ Baalla, grawta, jew dayta vi fatta ɗawni nam ma fi mitta. La Baal mi law ma gasiya, hinim gut kay tuwam kay yalam valamu, kay ɦoy gaa kayn mi giwin ma li ɗifin hayam malam nam Baalla. 32Hay buur namna nisi ka sem tara mi Gedeyon ala Yerubaal, kayn ala Baal ma dur hiɗi namu, kay ɦoy gaa kayni mi giwin-ma-ɗifinna ma girifim hayna.
33Sum sa Madiyanna hiɗi sum sa Amalekŋa hiɗi sum sa gal kuɗuw pana tok tuwsiya, nisi ɦaw Yordan kulo'o, tuɗ vi vokŋa visi hay liyn ma beɗna hay Yisreel. 34May Ŋusta vi Ma-Vatɗina cuk kay Gedeyon: nam buw togolomna, sumuna vi Abiyezer tok tuwsi talamu. 35Nam gi sun lo kat jafna vi Manase kaf, nisi tok tuwsi talam kafe. Nam gi sun kay sumuna vi Aser, sumuna vi Zabulon, sumuna vi Neftali kaw. Nisi kaf co'o ŋafam iramu.
36Gedeyon di tam Lawna: La naŋ min but sum sa Israyella goy hay ɓan nanu ki naŋ di nala, 37nan min lak ɗuŋus mirisna goy hay liyn ma to alkamarena ɗawni, la maɗayn gum mi ɗuŋusna tuta nagata galamta hini goy soya ni, nan ma wi ala sum sa Israyella naŋ min butsi goy ɗawni hiɗi ɓan nanu ki naŋ di nala.
38Van li'e ki kayn nala may. Hay buurta ka'ta, nam fok kulo graw culum, nam kesl ɗuŋus ɦu-dimin na kayni, maɗayn giy talamu. Nam keslem goy na kayn nam hob tasa ɗaw. 39Gedeyon di'e: Lawna, naŋ muɗ ɦiy katanɗi ge. Wulin nan min jobaŋ mara kep lo tuta. Nan min wak ɗuŋus ɦu-dimin sem mara kep lo. Nan min ala ɗuŋus ɦu-dimin nan baram gaa ɗawn nam hin goy soya, may yam nagat ta galamta maɗayn ga'a may. 40Hay henje na'ta Lawn hinim li nala. Ɗuŋus ɦu-dimin hin goy soy lak, nagat ta galamta maɗayn ga'a may.
Currently Selected:
SA KA KITANA 6: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001