SA KA KITANA 3
3
1Kayni si jaf-sum sa Lawn hinsi ziy gal sa Israyella kay nam min waksi hiɗi nisiya. Nisi kaf sa irsi may wi duur ma Kanaanɗina noŋ kaf. 2Nam min ala gurona vi Israyel sa vuɗ goy bugolo sa irsi wi duurɗina hat duur tam sum nisina. 3Sum nisin kayni: Muliyana vi sa Filistina vasl, sum sa Kanaaniyan noŋ kaf, sum sa Sidoniyan noŋ kaf, hiɗi sa Heviyena noŋ kaf sa ziysi cuki kulo kay hiɗiyta vi Libaŋ, tun cawis tam hiɗiyta vi Hermon pa ta-ta kulo vun Hamat zaw'.
4Nisi hini lakŋi kay nam min wak sa Israyel hiɗi nisiya, kay nam min ɗuwa la nisi min hum kuɗ vun-ma-gatna valamu ma nam hinimis mi sumaysi hay ɓam Mususna lebo humɗi su. 5Ki kayn nala, gurona vi Israyel li ziy jar sum sa Kanaaniyana, hiɗi sa Hetiyena, hiɗi sum sa Amoriyana, hiɗi sum sa Feresiyena hiɗi sa Heviyena, hiɗi sa Yebusiyena kaw. 6Nisi yaw gurona vi sum nisin kuɗsi boyo'o, guro-boyna visi nisi vulsi boyo'o kuɗ gurona vi sum nisina, nisi tun caw sun lawayna vi sum nisina.
SA KA KITANA DOOGO YAM MA'
Otniyel
7Gurona vi Israyel li sle ma kir Lawn joo'o, yisi jokom nam Lawn goyo. Nisi tun caw sun Baal hiɗi Asera. 8Ma-Vatɗin dikam muɗ ɦiy ŋolo kat sum sa Israyella, nam gussi goy hay ɓam Kusan-Risatayim, mul ma Mesopotamiyana. Nisi ci las hay ɓam Kusan-Risatayim ta-ta ir busat glafandi. 9Nisi hot tiy tam Ma-Vatɗina lo. Otniyel, goora vi Kenaz ma goora, ɓasum Kalebna, nam vulsita kay butsi goyo. 10Ŋusta vi Lawna mus kalamu. Nam tun vok sa Israyella kay ka kitata. Nam kalay goyo kay li duura. Kusan-Risatayim mul ma hay Mesopotamiyana Lawn vulum hay ɓalamu. Donota valam suw kay Kusan-Risatayim. 11Nagat fi tun-sukka ir busat dok-fiɗi. Bugol kayni Otniyel goora vi Kenaz mitiya.
Ehud
12Gurona vi Israyel hot li law mara ma kir Lawn joo'o lo. Eglon, mul ma Mowabna, Lawn vulum donota kay nam las sa Israyella, kay mige nisi li sle ma may kiram ŋaaɗina. 13Eglon tok gurona vi Amon hiɗi sum sa Amalekŋa talam kafe, nam kal vun duura, nam kol kay sum sa Israyella, nisi sli hoyok-ziyn ma gomona.#3:13 Hoyok-ziy ma gomona Kayni Yeriko. 14Gurona vi Israyel ci lasta ir busat doogo yam glafandi hay ɓam Eglon mul ma Mowabna.
15Gurona vi Israyel hot tiy tam Ma-Vatɗina lo. Ma-Vatɗina hot col sa mara voksi kep lo kay butsi goyo, sa namna yum Ehud, nam mi goora vi Gera, ma hay jafna vi Benyamin. Namu ɓalam gulu. Gurona vi Israyel vulum va hay ɓalamu, gum ala nam naram mi Eglon, mul ma Mowabna. 16Ehud kot kew ta siya' hiliw-hiliw', fiyoka' as ir goldoŋ ɗaw', nam juna' kulo kuɗ sligara valam hay galam ma jufn kit'. 17Va ma nisi vulumti hay ɓalamna nam tuɗ vulum mi Eglon, mul ma Mowabna. May Eglon kayni nam sa ma ɗoray goy ŋolo. 18Hay li ma nam vi vulda vina, sum sa mara'na nam disi ala nisi tuɗa. 19May Ehud, hay li ma nam co tam hiɗiy ma ceɗayna hay Gilgal cona, nam hoti bugolom tam mulla de' dumu: Mulla, nan min daŋ law ma ŋayaya. Mulla di sam sa talamna: Bagi vungiya. Sum sa talamna kaf cuk goy jiya. 20Ehud kal kalaf talamu. Dolay nam musi na kayn hay ziyda valam ta kulota ta sleɗna kay simeɗn jaŋamu. Ziy na'ta mus haya' kayn mi nam valam kepe. Ehud dumu: Labara vi Lawna ka hay vunanu kay nan min daŋga. 21Ehud meɗ ɓalam ta gulda goyo, pat kewti goy hay galam ta jufta, jik mulla hay vun-dikam hiɗi kewt tip'. 22Ɓalam ma hiɗi giɗer kewt kaw ba kulo hayam sah', mul ma siriɗi hayamna duk giɗer kewtis kulo hayamu, kay nam may as a pata'ay goy hayam loɗi.
23Ehud kal goyo hay vun-ziyn ma goy bugolla, duk vun-ziyn kulo kay mulla hiɗi klena. 24Hay li ma nam kal goy kalla kayni, sa gumina vi mulla co kay ɗuwa, nisi fi kayni vun-ziyda vi mulla ta kulota duki hiɗi klena. Nisi ka di tuwsi jar-tuwsi ala: Nam ma li ka tun sukam hay ziyda valam ta sleɗna klasige. 25Nisi lakay cub ta-ta. Hay li ma nisi wi ala vun-ziyda valam ta sleɗna nam may mala' goy loɗi, nisi kay tuwsi sli klena mala' vuna' goyo; nisi ɗuw na kayni sa ma ŋolla visi ka giy gaa kay nagat diriŋjiŋ' waŋi, miti to-to'. 26Hay li ma yisi vi neeɗa kayni, Ehud jiki goy bugol hiɗiy ma ceɗin vatiya. Nam kalay ta-ta hay Seyra. 27Hay li ma nam co ɗawni cona, nam col kulo kay hiɗiyta vi Efrayim, buw togolomna, kulo kay hiɗiyt pa, gurona vi Israyel jikay gaa'a hiɗi namu, nam tun voksiya. 28Nam ka disiya: Tapgiyay kuɗanu, kay sum sa hay Mowab sa gaw kigina Ma-Vatɗina vulsiyawa hay ɓigiya. Nisi tapay kuɗumu, nisi kal goy jewe, nisi tel hagata ta jik hay giɗer niy-lumna Yordan, hay liy ma san as a ɦawam hiɗi seŋ ɦawana. Liy namna ka vok Mowab ɗiger. Nisi may hin sa a kal goy noŋɗi. 29Hay li namna kayni, nisi ci sumun ir birim doogo jar sa Mowabna, sum sa nisi cisin gaŋeraŋ ŋolo, si sum sa wi duur ŋol lay. Sa kuɗsi kep kaw pir goyɗi. 30Hay buur namna kayni Ma-Vatɗina hot yam sa Mowabna gaa kuɗ sa Israyella. Nagat fi tun-sukka ir busat dok-glafandi.
Samgar
31Bugolom nam lo sa mara kep fok kulo'o, yum Samgar, namu mi goora vi Anat, nam ci sumun kis-karkiya hiɗi jalaŋ ma jik luwayna. Nam kaw mi sa ma but sa Israyel goyo.
Currently Selected:
SA KA KITANA 3: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001