SA KA KITANA 15
15
Samson job yalam tam sum sa Filistina
1Mus bugolda neeɗa kayni, hay li ma feɗna vi alkamarena coowa, Samson kalay ɗuw cata valamu, nam tuɗa' goor ɦun kalam kep, nam di'e: Nan min kal kalaf tam cata van hay ziyna va'a. May bum goota min hinim hagat kay kal kalafɗi. 2Bum goota ka dumu: Nan varay ala na' muɗi kiraŋ joo'o, nala nan vula' mi niraŋŋa, ɓasu'ta ta goota zawni may jifiy suwa' na'ɗi su? Slaŋga hay baŋala'a. 3Samson disiya: Vayd kayni la nan li sum sa Filistin joo'o kaw joo na'ta as tun kan loɗi. 4Samson kaliya, nam yaw cekemna kis-ɦidi yaw va ma ŋalla hay ɓalamu, jun giɗer cekemna tam tuwam ma' ma', tun tomgolla jar giɗerem ta' ta' kafe. 5Nam do kut kuɗ va ma ŋalla, hin cekemnis hay jar sinena vi sa Filistina, kut cap ŋal alkamarena ma juni yam tuwamna, alkamarena ma bay jun yam tuwamna kaw kut ŋalamu, gun-olive ma hay sinen kaw kut cap ŋalamu.
6Sa Filistin di'e: Sa ma li slen ki kayn nala kayn mi gige? Nisi hotom dit ala lum kayni mi Samson ma kuno sa ma Timnana, kay kunomna vi cata valamu, vula' goy mi niramna. Nala sum sa Filistin kaliya, nisi ŋala' goy hiɗi bu' kafe. 7Samson disiya: Nigi dolay li kayn nala su? La nan bay job yan tigiya, nan as hingiɗi. 8Nam cisi dono ŋolo, ŋorsi lay haysi lay,#15:8 ŋorsi lay haysi lay Nay may wi caw lawt kayni haraŋɗi. bugolda nam kaliya, kal ŋay tuwam goy hay zul hiɗiyna vi Etam.
9Sum sa Filistina gan tuwsi kay duura, nisi tun vokŋa visi hay Yuda, vunsi co ta-ta hay Lehi. 10Sumuna vi Yuda di tisiya: Nigi co mokma kayn kay mige? Nisi hot dita: Numa co kayni kay jun Samson, numa min lasamu ki nam lasma numa nala lay. 11Kuɗ kayni sumuna vi Yuda birim ɦidi kalay gal liyn ma zul-hiɗiyna vi Etam, nisi di tam Samson: Naŋ may wi ala sum sa Filistin ka ti mulda kaya ɗisu? Naŋ lum tuma na kayni mi mige? Nam di'e: Nan li tisi kayni ki nisi li tan nala kaw. 12Nisi di talamu: Numa co tan kayni kay junaŋu, kay vulaŋ mi sum sa Filistina, Samson di tisiya: Nigi ma yi va kigi ala nigi kay tuwgiya as can goy matɗi. 13Nisi hot dumu: Numa as caŋ matɗi, numa junaŋ ɦawa jun', vulaŋ goy hay ɓam sa Filistina tuta. Nisi junum hiɗi zigew ma wulin ma', bugolda nisi kalamay goy hay zul hiɗiyn pa.
14Hay li ma nam co hay Lehi, sum sa Filistina tun caw jaŋaya kay garamu, nisi ciriy ŋolo. Wulini ŋusta vi Ma-Vatɗina cuk kalamu, zigewna ma nisi junum ɓalamna muɗ ki barawna ma ŋalay hay hay kut ɦawa nala, zigew namna yak goy gaa'a. 15Nam fi gali-kuron kep ma miti wuliya, nam meɗ ɓalam goyo, slumu, nam ci sumun birim kep hiɗi namu. 16Nam di'e: Hiɗi gali-kurona, nan molsi yam tuwsiya hiɗi gali-kurona, nan ci sumun birim ɗaw.
17Hay li ma vunam vat vatna, gali-kurona ma hay ɓalamna nam gum goyo. Liy namna nisi tunum selem ala Remat-Lehi.
18Laat vum dono ŋolo, nam yi sem Ma-Vatɗina hay vunamu di'e: Ma-Vatɗina, naŋu mi ma vul donota mi ma sunda vaŋu kay mar butta-goyta ŋolda na'ta, wulin kayn naŋ hinan mit hiɗi laat su? Naŋ min ala sum sa bay ka gosayn lakŋi ma vanu su? 19Lawna hin vun zulla ma jar hiɗiyt ta hay Lehita mal goyo, niyn kalay goyo, Samson ci'e: Bugolda sukam hotay talamu, nam hot iri lo. Liyn namna ma niyna jaŋay goy hayam pana nisi tunum selem ala En-Harore, ta-ta vaydi liyn namna ka hay Lehi. 20Hay liyna vi sa Filistina, Samson ka kitata vi sa Israyella ir busat dok-ma'.
Currently Selected:
SA KA KITANA 15: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001