SA KA KITANA 1
1
YAM-LAWTA
Sa Israyella yaw nagan ŋolo
1Bugol mitta vi Yosuwa, gurona vi Israyel job tam Ma-Vatɗina di'e: Ma-Vatɗina, jarma lakŋi, jaf ma naŋ min ala nam tun vok jewe kay tuɗ dur sum sa Kanaaniyana mi jaf marige? 2Ma-Vatɗin hot dita disiya: Jafna vi Yuda ma tuɗ vok jewe. Ɗuwgiya, nagat na'ta nan vulsitawa hay bisiya. 3Jafna vi Yuda di tam jafna vi Simeyon ɓasum Yudana ala: Nay tuɗay hay nagata ta vuli muma'ta, nay duray sum sa Kanaaniyana, bugolda numa ma tapis hiɗi nigiya kay dur kuɗgiya hay nagata ta vuli ir migita. Nala jafna vi Simeyon tap kuɗsiya. 4Jafna vi Yuda tun irsi vun duura. Ma-Vatɗina vul sum sa Kanaaniyana hiɗi sum sa Feresiyena kaf hay ɓisiya. Nisi ci sumun birim doogo hay Bezek. 5Adoni-Bezek nisi fum hay Bezek, nisi mokomu, nisi kol kay sum sa Kanaaniyana hiɗi sum sa Feresiyena. 6Adoni-Bezek pira; nisi jaŋ kuɗumu ta-ta nisi vumu. Nisi kaam cita-ɓalam hiɗi cita-selem goyo. 7Adoni-Bezek di'e: Muliyan dok-siɗiya nan kaasi cita-ɓisi goyo, kaasi cita-sesi goy lay, nisi ti gaa kuɗ tablena vanu; wulin kayn Lawn hot wurakan joo ta nan la'tawa. Nisi kalam kulo hay Yerusalem, ɗawni nam mita.
8Gurona vi Yuda dur Yerusalem, nisi sla'a, sum sa haya'na nisi calsi goy hiɗi kew-gaferaŋa, nisi tun kut kuɗ hoyok-ziyna. 9Gurona vi Yuda kalays voksi lo kay dur hiɗi sum sa Kanaaniyana sa kulo kay hiɗiyna, sa hay gal ma kayamna hiɗi sa gaa hay liyn ma beɗna.
10Jafna vi Yuda dur hiɗi sum sa Kanaaniyana sa ka lakay ziy hay Hebron. Hebron ya' jew ala Kiryat-Arba; nisi kol kay Sesay, Ahinam hiɗi Talmay. 11Goy ɗawni nisi dur hiɗi sum sa hay nagat ya' ala Debir. Debir ya' jew ala Kiryat-Sefer. 12Kaleb di'e: sa ma durawa, sli nagat Kiryat-Seferawana ni, goota van Aksa nan vulumti kuɗum ca'a. 13Otniyel goora vi Kenaz ɓasum Kaleb ma goora, nam sli naga na'ta; nala Kaleb vulum goota valam Aksa kuɗum ca'a. 14Hay li ma na' coy vo vi Otniyel, na' zutum ala nam job sine tam bu'a. Na' jikay gaa kay kurona va'a. Kaleb ka joba' ala mayɗin mige? 15Na' ka hotom dit ala naŋ lan slugot lige. Nagat ta gal kayamta naŋ vulantawa ni, wulin kayn naŋ vulan liyn ma niyn riŋ goy hayamna lay. Niy-ma-riŋ ma may kulon lay ma may gaan lay nam vula'ta.
16Jafna vi sa ma Keniyena ma kuno Mususna, hiɗi gurona vi Yuda kaw, nisi yaway hay hoyok-ziyn ma gomon hayamna pa, hay fulda vi Yuda hay gal ma kayamna vi Arad, nisi tuɗ lak ziy jar sum segena.
17Yuda hiɗi ɓasulumna Simeyon tuɗ mok sum sa Kanaaniyana. Sum sa Kanaaniyana sa laki ziy hay Cefat nisi cisiya, sle ma hay hoyok-ziyn namna nisi ɓulakam goy kafe. Liyn namna nisi yum ala Horma. 18Lo, sa fi Yudana sli nagat Gaza hiɗi naga guray ma ta'na kafe, Askalon hiɗi naga guray ma ta'na kafe, Ekron hiɗi naga guray ma ta'na kaf kaw. 19Ma-Vatɗina tun vok Yuda, liyn ma kulo hay hiɗiyn kaf nam yawamu. May sum sa gaa hay liyn ma beɗna nam as a digiɗsi goyɗi, kay keke-ma-duura visiya mi kawaya.
20Hebron nisi vula' mi Kaleb ki Musus diys nala.#1:20 Fi kayni hay Ŋɓ 14:24. Nam digiɗ gurona vi Anak sa ɦidin goyo.
Kanaaniyan segena nisi digiɗsi goyɗi
21Sum sa Yebusiyena sa ka lakay ziy hay Yerusalemna, gurona vi Benyamin as a digiɗsi goyɗi. Ta-ta vaydi kaw nisi ka ziy jarsi hay Yerusalem.
22Sa hay jafna vi Yosef tuɗ dur sa hay Betel kaw, Ma-Vatɗina tun voksiya. 23Sa hay jafna vi Yosef cuk sumuna kay ɗuw Betel, (Betel ya' jew ala Luz). 24Sa cuki sunna wi san kep kalay goy hay hoyok-ziyn pa, nisi dumu: Sana, naŋ ɗekma kay vun-gala ma kal kalaf hay hoyok-ziyn tani, numa ma laŋ slugo maŋ naŋ may. 25Nam ɗeksi kay vun-gala ma kal kulo hay hoyok-ziyn namna. Sum sa hay hoyok-ziyn namna nisi calsi goy hiɗi kew-gaferaŋa, may sa namna nisi hinim kal goyo hiɗi sa falamna kaf. 26Sa namna tun iram hay nagata vi sum sa Hetiyen ta', nam in hoyok-ziyn kep, tunum selem ala Luz. Ta-ta vaydi naga na'ta semda va' ala Luz dok-doko.
27Sem nagat lakŋi sum sa haya'na jafna vi Manase may digiɗsi goyɗi: Bet-Seyan hiɗi naga ma juni kuɗa'na, Dor hiɗi naga ma juni kuɗa'na, Yibleyam hiɗi naga ma juni kuɗa'na, Megiddo hiɗi naga ma juni kuɗa'na. Naga namna cani sum sa Kanaaniyana min lak ziy hayamu. 28Hay li ma sum sa Israyel muɗ dono muɗna, nisi li sum sa Kanaaniyan hiɗi dono'o kay vulsi taara, may nisi digiɗsi goyɗi.
29Jafna vi Efrayim kaw, sa Kanaaniyana sa li ziy hay Geser, nisi fi a digiɗsi goyɗi, sa Kanaaniyana li ziy jarsi hay Geser.
30Sum sa li ziy hay Kitron kaw jafna vi Zabulon may digiɗsi goyɗi, sum sa hay Nahalol nisi may digiɗsi goyɗi lay. Sum sa Kanaaniyana li ziy jarsiya. May nisi lisi hiɗi dono'o kay vulsi taara.
31Sum sa hay nagat Akko kaw jafna vi Aser may digiɗsi goyɗi, sa hay Sidon nisi may digiɗsiɗi lay, sa hay Aklab, sa hay Akzib, sa hay Helba, hiɗi sa hay Afik, hiɗi sa hay Rehob kaw nisi may digiɗsi goyɗi lay. 32Sum sa Aseriyana li ziy jar sa Kanaaniyana sumay nagata, nisi as a digiɗsi goyɗi.
33Sum sa hay Bet-Semes kaw jafna vi Neftali as a digiɗsi goyɗi, sum sa hay Bet-Anat kaw nisi as a digiɗsi goyɗi, nisi li ziy jar sum sa Kanaaniyana sumay nagata, may nisi li sum nisin dono'o kay vulsi taara.
34Gurona vi Dan sum sa Amoriyana digiɗsi kulo kay hiɗiyna, nisi hinsi a jikay gaa hay liyn ma beɗanɗi. 35Sum sa Amoriyana diksi min lak hay Har-Herez, hay Ayalon hiɗi Saalbim. May jafna vi Yosef donota visi suw kisiya, nisi lisi hiɗi dono'o kay vulsi taara. 36Nagata vi sum sa Amoriyana vuna' fokay hay vun jiŋiliŋ ma hay Akrabim pa kal hay Sela, ta-ta kulo kalamis na ɗaw.
Currently Selected:
SA KA KITANA 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001