ESAYA 1
1
DI VUN-JOBTA KAY JAFNA VI SA ISRAYELLA
Kitata ta min co kay sa Israyella
1Slen ma Esaya goora vi Amos wi vokomu kay Yuda hiɗi Yerusalem, hay liyna vi Oziyas, Yotam, Ahas hiɗi Ezekiyas muliyana vi Yuda.
2Dukalawna, humaŋu, nagata, jakag humagu,
kay Ma-Vatɗina ka ɓaka.
Nan vul tin mi gurona,
nan wulsiyawa kulo'o kaw,
may nisi yaw kulo katanu.
3Putna wi mulamna,
kuron wi jokŋa vi mulamna kaw;
may sa Israyel hayɗin wi va noŋɗi,
sumuna vanu min humɗi.
4Joot kay jaf-sum sa sulukŋa,
hiɗi sum sa hobi hiɗi ci-matta,
joot kay jaf-sum sa li jiw-zlata,
joot kay sum sa muɗi liwisna!
Kay nisi noy Ma-Vatɗina goyo,
ma Peldetna vi Israyel muɗawa kirsi bisi,
nisi hot tuwsiyawa goy bugolo.
5Wulini nan watgi ɗawni hay galgi marige?
Kay jiw-zlata vigiya jorawa voko.
Yigi kaf kaay goy mili,
dikgi kaf ka ci lasi.
6Gaa segi pa ta-ta kulo kigi dab',
va ma hini ŋaa'a may loɗi;
tuwgi ma kaay goy milla,
vun libetna hiɗi mil ŋayakŋa kaf
sa may junum vunamɗi,
muzum vunam goyɗi,
li va vunamɗi,
ɦok mul vunamɗi kaw.
7Nagata vigi hini goyo,
hoyok-ziyna vigi ŋalay kay kuta,
sum sa pulla ka ti nagata vigi vok irgiya.
Nagat hini goy ɦawa'a,
ki ɦo-gaata ta sum sa pulla mara' kigiya nala.
8Goota vi Siyon muɗi ki ziy-coora
goy jar sine gulda-guldana nala,
ki guɗukŋa viy jar sinena vi kurdina nala,
ki hoyok-ziy ma sumun may tom gaaɗi nala.
9Lali Ma-Vatɗina hinay caw sum segen hiniɗi,
nay muɗ ɗawn ki Sodoma nala,
nay li ɗawn ki Gomora nala.
10Humgi yoboyna vi Ma-Vatɗina,
nigi sa ŋulona vi Sodoma,
jakgi humgi tam gatta vi Lawna vaya,
nigi sum sa hay Gomora.
11Ɗifinna vigi ma dak-dakŋa
nan as lum hiɗi nam mi mige?
Din mi Ma-Vatɗina.
Nan asay hiɗi ɗifin ma ŋal-goyna vi fok-gamalana vigiya,
hiɗi mula vi guro-luwayna;
busuwna vi luway-gujuna,
guro fok-dimina hiɗi busuwna vi fok-ŋekŋa
may kiran ŋaa'a loɗi.
12Sa ma vulgi hagat kay nigi co vok-iranu
kay tay wur-daŋŋa van gaa'a kayn mi gige?
13Vulda ta goy waata nigi ma mara' vok iran loɗi,
urdi ma hisna nam kiran bisi;
til ma wulina vigiya,
sabatna vigiya hiɗi tokŋa vigiya,
iran min wi yuldeta vigiya
ta rigasay hiɗi jiw-zlata vigit noŋɗi.
14Nan ka gawi hiɗi til ma wulina vigiya
hiɗi yuldena vigiya,
nam can neke,
nan as kay ziyim loɗi.
15Hay li ma nigi meɗ ɓigi goyo,
nan muɗ iran goy kigiya;
la nigi li siɗawt ŋol kaw,
nan as kay humgiɗi,
kay ɓigi hobi hiɗi busuwna.
16Muzgi tuwgi goyo,
porgi tuwgiya,
lopna vigi ma joona nigi ma yawam goy vok iranu.
Joota ta nigi la'ta nigi ma hina' goyo.
17Hatgi kay li ŋaata,
gargi ɗigerta,
sa ma vun curo'da nigi ma hotomay hay hagata ŋaata,
ligi ɗigerta tam sa ma kuyuna,
gutgi kuɗ cata duhulta.
18Nigiyaya tiyay tuwaya,
din mi Ma-Vatɗina.
La sulukŋa vigi ka slaw keŋe,
nam ma muɗ haɓ tal-tal';
la nam slawi ki sligar ma slawn nala kaw,
nam ma muɗ haɓi ki ɗuŋus miris ma haɓna nala.
19La nigi vilekawa kay hot yigi gaa'a,
nigi ma ti vuɗ ma ŋaana vi nagata;
20may la nigi minɗi,
la nigi muɗ ŋel gatta,
kew-gaferaŋa ma calgi goyo,
kay vun Ma-Vatɗina daawa goyo.
21Mige lo!
Hoyok-ziy ma ɗigera muɗi mi liyn ma viyuwna,
hoyok-ziy namna ay hobay hiɗi ɗigerta,
gasita ay musi haya,
may wulini nam hobay hiɗi sa ci matna.
22Gurjuta vigi muɗi goy suɗoy-kawaya,
vinna vigi rigasay hiɗi niyna.
23Sa ŋulona vagu muɗi ŋel gatta,
vunsi ŋray hiɗi sa kuliyana,
nisi kaf min gurjuta,
nisi jaŋ kuɗ wurakŋa,
nisi may gut kuɗ sa ma kuyunɗi;
diksi may tisi kay cata-duhultaɗi.
24Kuɗ na'ta kayni, Bum-Sumuna,
Ma-Vatɗina vi vok-ma-duura,
ma donona vi Israyel ka di ala:
Haha! Nan min sleɗ hayan tam sa gawt kanna,
nan min job yan tam sa gawt kanna.
25Nan ma meɗ ɓan goy kay Yerusalem sem mara lo,
nan ma yor wayna va'a hay zulla,
ki yorom hiɗi potasna nala,#1:25 Potasna mi hiɗiy ma cukum jar kuta kay yor kawayn hiɗi namu.
plomna ma hini haya'na nan ma yawam goy kafe.
26Sa ka kitata visiya nan ma hotsiyaya,
ki nisi ka jew ɓa-ɓa nala,
sa vul gatta va'a nan ma hotsiyaya,
ki nisi ay hay tun-cawt nala.
Bugol kayni nisi ma yag ala hoyok-ziyna vi gasita,
hoyok-ziy ma ɗigera.
27Siyon ma butis goyo hay li ma na' li ɗigerta,
hiɗi nisi sa min ham goyo kuɗ gasita.
28May nisi sa ŋel gatta hiɗi sa sulukŋa kaf,
ɓulakka ma co kisiya,
nisi sa noy Ma-Vatɗina goyna nisi ma ba goyo.
29Ki kayn nala sumun ma li zulo'o kay terebintena,
ma nigi minim ŋolla,#1:29 Kay nisi ay girif lawayn ma waana gaa kuɗ gu-terebintena.
nigi ma muɗ zulo'o kay jardeŋŋa vigiya ma nigi vilekemna;
30nala nigi ma muɗ ki terebintena ma humam yakay goyna nala,
ki jardeŋ ma niy may kuɗumɗina nala.
31Sa ma donona ma muɗ ki baraw ma tufna nala,
lopna valam ma muɗ ki kut ta yak kulota nala.
Nam ma' pet ma ŋal goyo,
sa ma as telem mayɗi.
Currently Selected:
ESAYA 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001