KAL-GOYTA 1
1
SUM SA ISRAYELLA KAL HAY EGIPTE
Sum sa Israyella ka ci lasta hay Egipte
1Kayni mi sem gurona vi Israyel sa co hay Egipte hiɗi Yakub, gigekaw hiɗi jafna valamu valamu: 2Ruben, Simeyon, Levi, Yuda, 3Isakar, Zabulon, Benyamin, 4Dan, Neftali, Gad hiɗi Aser. 5Sum sa may goy hay Yakub pana nisi noŋ pet dok-siɗiya. Hay na'ta Yosef ka goy hay Egipte.
6Yosef mita, guro-biyomna mit kaw. Sum sa hay liyn namna kaf mit goyo. 7Gurona vi Israyel vuɗ ŋolo, nisi biya ŋolo, nisi muɗ ŋol suwa. Nagat hob hiɗi nisi cep-cep'.
8Bugol kayni mul ma wuliya musi kay Egipte, nam may wi Yosef noŋɗi. 9Nam di tam sumuna valamu: Humgiya, jafna vi Israyel muɗi ŋol suway naya, dono suway nay lay. 10Tuɗaygiya, laygi law ma yal tisiya; nay ma hinsi biya ŋol nalaɗi, kay hay li ma duur coowana, nisi ɗawn ma gi dirsi kuɗ sa gawta, nisi ɗawn ma duraya, bugolda nisi ma kal goy hay nagata vaya. 11Nisi tun sum sara kisiya kay lisi lasi, sum nisin tosi sutaysiya hiɗi lop ma nekŋa. Ki kayn nala nisi in hoyok-ziyn Pitom hiɗi Ramses, ki feera ma ŋom slena vi Farawn nala. 12May hay li ma nisi ka ci lasta suwa, nisi ka biya voko, ka li ŋol suwa kaw, ta-ta sumun tuwsi cuk nar kisiya. 13Ki kayn nala sum sa Egipten muɗ gurona vi Israyel goy lum mi lop ma nekŋa. 14Nisi muɗsi ciwta visi yor ŋolo hiɗi lop ma nek ŋolla, hiɗi lopna vi naga dirginna, hiɗi direŋgella, hiɗi lop ma hay sinen kuɗ jafam kaf, lop ma sumun vulsit kay lumna kaf kayni, nisi ka lassi kuɗum ŋolo.
15Mul ma Egiptena di tam boyn sa puk boy sa Hebren kaw, kepta ya' ala Sifra, heta ya' ala Puwa. 16Nam disi ala: Hay li ma nigi ka puk boyna vi sum sa Hebrena, ɗuwgi gaa kuɗ guron ŋaa'a; la mi goor jufu, cigit goyo, la ti goot ta ca'a, hingit mus iriya may. 17May boy sa puksina li nar kuɗ Lawna, va ma mul ma Egipten disitna nisi min li kuɗumɗi; nisi min ci guro sa jufayn goyɗi. 18Mul ma Egiptena yi boy sa puk-boyna, nam disiya: Nigi li nala kay mige? Nigi min ci guro sa jufayn goyɗi kay mige? 19Boy sa puk-boyna hot dit tam Farawn: Boy sa Hebren kayni nisi may ki boy sa Egipten naɗi, nisi dono ŋolo, boy sa puksin co kayn fisi puki vatiya. 20Lawn li ŋaat mi boy sa puksina, nala nisi biyay ŋolo, muɗi ŋol suwa. 21Lawn gi bol kay ziyna vi boy sa puk-boyna, kay nisi li nar kuɗum ŋolo.
22Bugol kayni Farawn vul dit mi sumuna valam kaf ala: Guro-jufay sa vuɗawana nigi ma cuksi goloŋ hay niy-lumna kafe, may guro sa boyna nigi ma cisi goyɗi.
Currently Selected:
KAL-GOYTA 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001