GATTA-SEM-MA'TA 32
32
Nulla vi Musus
1Dukalawna, jakaŋ humaŋu, nan min lawa;
nagata, humag yoboyna vi vunanu.
2Hin wida vanu yak gaa'a ki niy ma sin nala,
hin yoboyna vanu toɗ gaa'a ki maɗayn nala,
ki niyna si kay us ma ŋulomna nala,
ki niy ma toɗ gaa'a kay hatna nala.
3Kay nan min siwel sem Ma-Vatɗin goyo.
Vulgi suburta tam Lawna vaya.
4Namu mi hiɗiyna, lopna valamu nam ŋaa'a ŋolo.
Kay hagata valam kaf vuna' ŋiraya;
namu mi Lawna, ɗigere, bay-ɗigerta tayɗi,
namu ɗigere, gasiya kaw.
5La nisi muɗ tuwsi liwisi,
kayni may mi namɗi,
may gurona visiya nagay kay bayta,
jaf ma joona ma gunina.
6Nigi as tun joot kayni kay Ma-Vatɗin su?
Nigi jaf ma ɦay-ɦayna ma bay-yalla?
Nam may mi bugi ma inginɗi su?
Namu mi bugi ma ingina, ma vulgi donotna ɗisu?
7Humgi ma gigi kay buur ma jewna,
jakgi humgi kay busata,
jaf-sumun bugolgiya bugolgiya,
jobgi sumaygiya, nisi ma vigi labara,
jobgi sa maariyana vigiya, nisi ma digiya.
8Hay li ma nam ma kulo ginena vul vocota mi jaf-sumuna,
hay li ma nam ɓuraw gurona vi Adam goy visiya visiya,
hay li ma nam ŋaɓ jaara vi sumuna,
kuɗ ŋaɓta vi gurona vi Israyel;
9kay ir ɓurawta vi Ma-Vatɗin kayni si sumuna valamu,
Yakub kayni mi gal vocota valamu.
10Nam fumi kayni goy hay nagat ta fulu,
hay liyn ma wiŋŋa ma goy soyna;
nam ŋuyumu, nam kotom tuwamu,
nam ŋomomu ki wal-irta nala.
11Ŋray ca ki bakŋa ma ŋom ziyna valam nala,
ma ka poy kulo'o kay gurona valamu,
vi glaŋatam goyo, yaw gurona,
ziysi kulo kay glaŋatamu.
12Ma-Vatɗin valam kep ka tuni voksiya,
law mara'a ma pul may hiɗi nam noŋɗi.
13Nam jiksi kulo'o kay liyn ma jiŋiliŋŋa vi nagata,
vulsi tin ma hay sinena;
yumda ta kay hiɗiyna nam vulsit a ti'e,
olivena day kulo kay hiɗiy ɗeŋŋa pa,
14Mula vi luwayna hiɗi miira vi fok-meena,
hiɗi mul-sliwna vi guro fok-dimina,
fok-gamalana vi Basan hiɗi fok-ŋekŋa
hiɗi futuw alkamarena;
nigi cum mi busuw gulda-guldana, vinna ma galakŋa.
15 Yesurun ɗorawa, may nam muɗi wuriya;
naŋ ɗorawa, muɗi neke, hobi cep-cepe',
may nam noy Lawna valam ma kotomnawa goyo,
nam pan hiɗiyna vi su'da valamawa,
16nisi zut hunayta valamawa kulo voko
hiɗi laway sa pulla,
nisi muɗum ɦiya hiɗi lop ma liwisna;
17nisi li ɗifin tam fuliyana ma may Lawnɗina,
tam lawayn sa nisi may wisiɗi, wuliya,
sa co kayni may musi ŋolɗi,
sa sumaygiya may girifsiɗina.
18Hiɗiyna ma vuɗgina nigi noyomawa goyo,
Lawn ma vuɗgina yigi jokomawa.
19Ma-Vatɗina wi kayni,
nam ɗuw ki kayni ti panta nala,
kay gurona valam sa jufayna hiɗi sa boyna ɓulakam dikamu.
20Nam di'e: Nan min ŋay vokan kisiya,
nan ma wi yisi ma dabna;
kay kayni si sum sa muɗ bay lopo,
kay si gurona sa san as tun ŋalda valam kisiɗi.
21Nisi jor hunayta vanu hiɗi sle ma may mi Lawnɗina,
nisi ɓulakan dikanu hiɗi lawayna visi ma waana,
nala nan kaw, nan min jor hunayta visiya
hiɗi sle ma may sumuɗina;
nan ma ɓulaksi diksiya hiɗi jaf-sum sa ɦay-ɦayna.
22Kay kuta vi ɦiyda vanu doowa,
na' ŋala, ta-ta gaa hay liyna vi sa mitina,
na' ŋal nagata hiɗi sle ma haya'na,
na' ŋal sem hiɗiyn ma tuni gaana kaw.
23Nan min tok joot kisiya,
nan ma pat ɓarawta van goy katsi kafe.
24Nisi ma sa'atis goyo kay mayta,
sutaysi ma to'o kay moy ma gi tuw san kuna,
hiɗi moy ma joona,
nan ma cuk muur ma siina katsiya hiɗi guy ma joona.
25Goy jiya, kew-gaferaŋa ma hinsi goy bay guro'o,
hay kalafi, narta,
van ma li nala tam sa ma joriyona hiɗi goot-cata kaw,
tam gurosguray sa ci pona ta-ta
tam sa maariyana sa vot kisina kaw.
26Nan min di'e: Nan min biwsi goyo,
nan min ɦassi sesi goyo jar sumuna.
27May nan li nari kay ŋulda vi sa gawta,
nan li nar ala sa gaw kisina ma tun caw di ala:
Bay nay li dono'o, slen kayni kaf may lum mi Ma-Vatɗinɗi.
28Nisi kayni si sum sa varta ŋaata visi baya,
yalda ne' kaw may haysiɗi.
29Lali nisi ay yali, kayni mi va ma nisi humumna,
nisi ɗawni ma var kay va ma min co kisiya.
30Nanige san kep mun sumun vokom birimi?
Sumun ma' mun sumun voksi birim doogo kaw?
Lali hiɗiyna visi gussi gusi goyɗi,
Lali Ma-Vatɗin vulsi vuli goyɗi?
31Kay hiɗiyna visiya may ki hiɗiyna vay naɗi,
sa gaw kayna si sa ka kitata.
32Kay gulda-guldana visiya mi gulda-guldana
ma pi ay goy hay Sodoma pa,
hiɗi nagata vi Gomora;
vuɗna vi gulda-guldana visi namna ka hiɗi sinawna,
wal gulda-guldana visiya nam galaki.
33Vinna visiya, nam mi sinaw guyna,
mi sinawna vi guy-makayda ta ci sa mati.
34Kayni may ŋayay goboy katanɗi su?
Vunam dukiya hay timgilla vanɗi su?
35Job balla hiɗi wurak joota mi nanu,
hay buur ma nisi rawawa goyo,
kay buura vi joota visiya ka goboyo,
yisi ma dabna ka co goboyo.
36Ma-Vatɗina ma ka kitat kay sumuna valamu,
may nam ma wi haw sa sunda valamu,
hay li ma nam ma wi ala donota visi vatay goyo,
hay li ma sa ma juni mayɗi,
sa ma buti goy mayɗi kaw.
37Nam ma di'e: Lawayna visi arige?
Hiɗiyn ma nisi gar kay ŋay talamna ka arige?
38Lawayn nisina sa ka ti mula vi ɗifin ma nigi ka lumna,
sa ci vinna ma nigi yamam goyna,
hinsi fok kulo'o kay gut kigi tige.
Hinsi bar ɓisi kigi tige.
39Wulin kayni, ɗuwgi ala mi nanu, nan kep mi Lawna,
lawayn mara'a may katan goboyɗi,
nanu nan as ci sa mati, nan as hin san iriya kaw,
nan ka tuw san mili, nan as citimu kaw,
sa as but sa goy hay ɓanɗi,
40kay nan yaw ɓan kulo'o hay wuralawna,
nan di'e: Nan ka iriya hay vatɗita vatɗita.
41La nan ligaɗ siy kew-gaferaŋa vanawa,
la nan ka kitatawa, nan ma job yan tam sa gaw kanna,
nan ma wurak sa ka gawt kanna;
42nan ma ɦoy ɓarawta vanu hiɗi busuwna,
kewta vanu ma tisi sliwsiya,
busuwna vi sa tuwsi kaay goyna hiɗi sa yawi gorvona, hiɗi yamna vi sa ŋulona vi sa gawta.
43Jaf-sumuna, cigi ɓigi kuɗ sumuna valamu,
kay Ma-Vatɗina min job yam busuwna vi sa sunda valamu.
Nam min job yalam tam sa gawt kalamna,
nam li poora kay nagata valamu, kay sumuna valamu.
44Musus hiɗi Yosuwa goora vi Nun co'o, law ma hay nulla namna nisi dum kaf kay sumun ma humumu.
45Hay li ma Musus vunam vat kay di yoboy namna vok sa Israyella kaf vatna, 46Nam disi ala: Yoboy ma nan ɗekgit vayd kayni nigi ma slum kulo kigiya nigi ma ɗekem mi gurona vigiya, kay yoboyna vi gatta kayni nisi ma ŋomomu, li lop hiɗi nam kaw. 47Kay nam kayni may mi yoboy ma waa'a kigiɗi, kayni mi irita vigiya, nigi as ɦur buura vigiya hay nagat ta nigi min kal haya'ta ɗawni hiɗi yoboy namna, bugol nigi ɦaw Yordanawa kulo'o hawna.
48Hay buur na'ta de', Ma-Vatɗina di tam Musus ala: 49Jikaŋ kulo'o kay hiɗiyta vi sa Abarimna zawni, kulo kay hiɗiyt Nebo, hay nagata vi Mowab, ɗiger vok Yeriko; ɗuwaŋ nagata vi Kanaan ta nan min vula' voco'o mi sa Israyella. 50Naŋ ma mit kulo kay hiɗiyta ta naŋ min jik kulo ka'ta, naŋ ma tap kuɗ sumuna vaŋu, ki Aaron ɓasuŋŋa mit kulo kay hiɗiyt Hor, tap kuɗ sumuna valam nala. 51Kay mige vok sa Israyella kaf nigi min vi kuɗanɗi, goboy hiɗi niyna vi Meriba, hay Kades, hay fulda vi Sin, hay kayni kaf nigi min lan peldete vok sa Israyellaɗi. 52Nagat ta nan min vula' mi sa Israyella naŋ ma wa' hiɗi iraŋu, may naŋ kay tuwaŋ ma kal haya'ɗi.
Currently Selected:
GATTA-SEM-MA'TA 32: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001