GATTA-SEM-MA'TA 14
14
Nigi ma ɓir tuwgiɗi, ti sle ma liwisɗi
1Nigi kayni si gurona vi Ma-Vatɗina Lawna vigiya, nigi ma ɓir tuwgiɗi, la sa vigi mit kaw nigi ma wel yigi goy velewɗi. 2Kay nigi kayni si sum sa peldete kay Ma-Vatɗina Lawna vigiya; Ma-Vatɗina Lawna vigi vilekgi kayni, kay nigi ma muɗ goy sum sa ir valamu jar sumun kaf sa ka gaa kay nagata.
3Sle ma liwisna nigi ma tumɗi. 4Kayni mi sem muuriyana ma nigi ma tumna: Putna, guro fok-dimina, guro fok-meena; 5buɗugoora, dukga, lafna, muurina, gawyaŋŋa, diweta hiɗi bariyamna. 6Muuriyan kaf ma tirekem muni goy ma' ma ligaɗna nigi ma mutumu. 7Muuriyan ma jar tirekem goy ɓiretiya ligaɗ lay, may nigi as kay tumɗi kayni: Lamgana, vetna, kosomna,#14:7 Ɗuw cawam ma diy goyna hay Slv 11:5. kay nam ligaɗa, may jar tirekem may goy muniɗi. Nigi ma ɗuwum ki nam liwisi nala; 8bagumna, jar tirekem muniya, may nam may liga'ɗi, nam liwisi kigiya; nigi as tum sliwamɗi, ŋumna valam ma goy miti waŋŋa kaw nigi as tun ɓigi talamɗi.
9Kayni mi muuriyan ma goloŋ hay niyna ma nigi as tumna: Kuluf ma zlimitam ka'a, ɓulok ka talamu kaw nigi as tumu. 10May kuluf ma zlimit may talamɗi lay ɓulok may talamɗi layna nigi as tumɗi, nam liwisi kigiya.
11Layayn ma liwisɗin kaf nigi as kay tumu. 12May kayni mi jaf layayn ma nigi ma tumɗina: Bakŋa, kulona, bak ma goloŋŋa, 13rakŋa, zilimna, bak mara'a mara'a hiɗi lay ma kuɗ jafam kafna, 14jarakŋa hiɗi lay ma kuɗ jafam kafna, 15rigetna, ɦuna, rubukŋa, zekelekŋa, hiɗi lay ma kuɗ jafam kafna; 16gabuura, glaw-glawna, ŋaŋaana, 17gudufna, koro-korona, ɓukana, lay-joriyona, 18garamna, hiɗi lay ma kuɗ jafam kafna, tolikona hiɗi baya-bayna. 19sle ma harmatna ma zlimit talamna kaf nigi ma ɗuwum ki nam liwisi nala, nigi as kay tumɗi. 20Layayn ma liwisɗin kafe nigi ma tumu.
21Sa ma pulla ma ziyam ka galgiya nigi vulumta kay nam ti'e, lebo nigi as gusum goyo mi sa ma pulla ma ka musi jargiya, kay nigi kayni si sum sa peldetna vi Ma-Vatɗina Lawna vigiya. Nigi as zal ɦuna hiɗi miira vi sulumɗi.
Gal-ma-doogona
22Gal-ma-doogona vi jafna vigi ma hay busat kafna nigi ma vulum goyo. 23Gal ma doogona vi alkamarena vigiya, vi gulda-guldana vigiya, vi mula, vi guro ma vuɗi jewna vi farayna vigi ma ŋulona hiɗi faray ma gurayna, nigi ma tum vok Lawna Ma-Vatɗina, hay liyn ma nam vilekemu kay tun semda valam haya, kay nigi ma hat kay li nar kuɗ Ma-Vatɗina Lawna vigiya. 24La li ŋalɗi, hagat ka gine'e kay nigi ziy slena kay com ɗawni, kay li ŋalɗi nigi ka goy gine'e hiɗi liyn ma Ma-Vatɗina vilekemu kay tun semda valam haya, kay mige Ma-Vatɗina Lawna vigi gigi bolawa. 25Ki kayn nala gal-ma-doogona vigi namna nigi gusum goyo, naŋ yaw gurjut hay ɓaŋu, naŋ tuɗ hay liyn ma Ma-Vatɗina Lawna vaŋu vilekemna. 26Ɗawni, nigi ma gus sle ma dikgi minim kafna hiɗi gurju na'ta: Putu lebo ɦuwa, vinna lebo dolayna, sle ma dikgi minimna kaf, nigi ma tum gaa vok ir Ma-Vatɗina Lawna vigiya, nigi ma li firiya, nigi hiɗi jafna vigi kafe. 27Sa ma Levitna ma ka musi ziy galgina nigi ma curoɗomɗi, kay galla valam mayɗi, vocota valam tay jargiɗi kaw.
28Hay busat ɦidi kaf kayni, nigi ma yaw gal-ma-doogona vi wa ma nigi feɗem hay busata ɦidita, nigi ma tunum hay liy ma nigi lakay ziy hayna. 29Bugol kayni sa ma Levitna ma co'o, galla hiɗi vocota valam may jargiɗi, sa ma pulla, sa ma kuyuna hiɗi cata duhulta sa ka lakay ziy hiɗi nigiya, nisi ma ti'e, haysi ma hoba, kay Ma-Vatɗina Lawna vigiya ma gigi bolo kay lopna vi ɓigi kafe.
Currently Selected:
GATTA-SEM-MA'TA 14: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001