SOFONIYA 3
3
Sum sa hay Yerusalemna min hum yita vi Lawnɗi
1Joot kay hoyok-ziyna ma ŋel gatta ma muɗi liwisna,
hoyok-ziy ma hobay hiɗi sa li sumun joona.
2Hoyok-ziy namna hum del sa noŋɗi,
min hum gattaɗi kaw,
min vul tuwsi goyo hay ɓam Ma-Vatɗinɗi,
min co tam Lawna visi goboyɗi kaw.
3Sa ŋulona vi hoyok-ziy namna
ŋray ca ki zlon ma ci gum nala;
sa ka kitata visi ŋray ca ki keŋŋa
ma ti tin ay goy vulatit kaf,
ŋay va kulo kay graw culumta loɗi nala.
4Sa jobta visiya yisi ŋeliya, bay-vi'e.
Muliyan-sa-ɗifinna visiya muɗ slen ma peldetna goy liwisi,
raw vun-ma-gatna goyo.
5Ma-Vatɗina ka ɗigere jarsiya,
nam may min jiw-zlat noŋɗi;
hay graw culumta kaf nam vul haraŋa vi kitata valam goyo,
nam may bulow buur tara noŋɗi.
May sa ma jiw-zlata wi zulot noŋɗi.
6Nan vat jaf-sumun goy ŋolo,
gulmunna visi ɦoy gaa'a,
hagana visiya nan ɓulakam goyo,
sa as jik hayam loɗi,
hoyok-ziyna visi ɓulakay goyo,
sa may loɗi, sa ma li ziy hayam may loɗi.
7Nan ka var kayn ala nigi ma li nar kan klasige,
ma li kuɗ gatta van klasige.
La nala liyn ma musta vigi as ɓulak goy loɗi,
kita ma nan min kaam kigin kaf as co kigiɗi.
May nisi li tuwsi koloyo kay ɓulak lopna visi goyo.
8Ma-Vatɗina di'e:
Wulin kayn nigi cuban yo!
Hay buur ma nan ma fok kulo kay yaw sle ma ɓuraŋŋa.
Kay nan min tok jaf-sumun kafe,
tok mulda mulda kafe,
kay was ɦiyda van ta ŋolda goy kisiya,
ɦiyda van ta suw kafta;
kay hiɗi kuta vi hunayta vanu,
nagat kaf ma ŋal goyo.
Deŋga
9Hay na'ta ɗawni,
nan ma muɗ vun sumun peldete,
kay nisi kaf ma yi sem Ma-Vatɗin hay vunsiya,
kay nisi ma girifim kuɗ tuwsi kafe.
10Goy bugol vi niy-lumna Etiopiya pa,
sa girifanna, sa fan sa meray goyna,
ma mar vulda tanu.
11Hay buur namna ɗawni,
nigi ma li zulo'o kay sle ma nigi lumna loɗi,
Jiw-zlata ta nigi la' katanu;
nala sum sa li tuwsi ɦilay ŋolla,
nan ma patsi goy jargi pa,
nigi ma subur tuwgi kulo kay hiɗiyta vanu ta peldetta loɗi.
12Jargiya nan ma hinsi ɗawni si sum sa hot yisi gaa'a,
sa maŋaya,
sum sa gar liyna visi ma ŋayna hay Ma-Vatɗina.
13Dir sumuna vi Israyel ma hinina ma li suluk loɗi,
nisi ma di law ma sin loɗi kaw,
ma fi law ma ɗut hay vunsi loɗi kaw,
nisi ma ŋom farayna visi hay sle'ta,
ma tun suksi hay sle'ta kaw,
sa ma as nefsi may loɗi.
14Siwelag hiɗi nul ma firita,
nak goota vi Siyon,
firiyag ŋolo Israyel.
Firigiya, siwelgi kulo'o hiɗi dikgi kafe,
nigi guro-boyna vi Yerusalem.
15Ma-Vatɗina sli kitatawa goy kigiya;
sa gaw kigina nam digiɗsiyawa goyo.
Ma-Vatɗina mulla vi Israyel ka jargiya,
law ma joo'o as figi loɗi.
16Hay buur namna ɗawni,
nisi ma di tam Yerusalem ala:
Lag nar loɗi, Siyon,
nak hin tuwag muɗ goy maŋay loɗi.
17Ma-Vatɗina Lawna vigi ka jargiya,
ki sa ma vul kolda mi sumuna valam nala.
Dikam ma firi ŋolo kigiya,
nam ma mus ŋal kiliŋ hay minda valamu.
Dikam ma hob ŋolo hiɗi firita kigiya.
18Sum sa ka hay yorta nan ma toksi yisiya,
nisi sa ay goy gine'e hiɗi liyn ma yuldeta,
nisi sa kalays goy hay Yerusalem pa,
sa zulot buri kisi neke.
19Humgiya, hay buur namna ɗawni,
nan min fok kulo kat nisi sa ligi lasi,
sum sa hurɓulina nan min butsi goyo,
sa ay digiɗiy goyna nan ma hotsi aya,
nan ma muɗsi goy sum sa suburta,
hiɗi sum sa sesi tiya kir sum sa ay pansi jewna.
20Hay buur namna ɗawni nan ma hotsi aya,
hay buur namna ɗawni nan ma tokgi yigiya,
nan ma muɗgi goy sum sa suburta hiɗi sum sa sesi tiya,
jar sum sa gaa kay nagat tan kafe.
Hay li ma irgi ma wi sa gorvona vigiya hoti kan vo'o.
Din mi Ma-Vatɗina.
Currently Selected:
SOFONIYA 3: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001