MIKKA 2
2
Joot kay sum sa las sa hawna
1Joot kay sum sa niŋa law ma joon hay diksiya
hay li ma nisi ka buri gaa tuwa,
hay li ma liyn foowa goyo,
nisi li law namna,
la donot ka hay ɓisiya.
2Nisi niŋa sinena vi segena, nisi yawamu,
la mi ziyn kaw nisi yawamu,
nisi li ɦawlat tam sumuna,
yaw ziyn kisiya,
nisi lassi kuɗsi vo'o,
ta-ta nisi yaw vocota vi sumuna.
3Kuɗ kayni Ma-Vatɗina di'e:
Ɗuwgiya, nan ma li va ma joo'o tam jaf-sumuna;
nigi as a hulot yigi goy loɗi,
nigi as a tuɗ hiɗi yigi tuni kulo ja tiriŋ loɗi,
kay buurta vi yorta coowa kigiya.
4Hay buur namna ɗawni,
sumun ma lawam tigi mi law ma panna,
nisi ma gum mi nul ma yorta,
nigi ma di ala: Nay vurumi kafe,
Ma-Vatɗina cuk irawa mi nagata vaya,
nam vula'awa goyo,
sinena vaya nam ɓurawamawa goy mi sum sa ŋel-gatta.
5Kuɗ kayni,
hay li ma sumun ma fi tuwsi
hay tokŋa vi Ma-Vatɗina ɗawni,
sa vigi kep ma yaw zigewn hay ɓalamu
kay ŋaɓ liyna ma li jarsi noŋɗi.
6Nigi di tan ala:
Mak tuwaŋ a winekɗi,
kus yoboy ma ki kayn nalaɗi,
may na' ŋulda as vatɗi.
7Nigi gurona vi Yakub,
nigi law kayn ki kayn nala su?
Ma-Vatɗina as a muɗ ɦiy gosoy su?
Nam kaw as li ki kayn nala lay su?
Yoboy ma nam dumna,
nam as gut sum sa tuɗ hay hagat ɗigerta ɗisu?
8Jew ɓa-ɓa nigi ka las sumuna vanu,
ki sa gawt kigin nala;
sum sa li law ma jooɗi kaw,
nigi fok sligar ma tisin goyo,
sum sa jik hay hagat hiɗi sle'ta nigi dursiya kaw.
9Sumuna vanu nigi digiɗ boyna visi goy hay ziyna ma kirsi ŋaana,
gurona sa nan vulsitna,
nigi yaw gajijita van goy kisi kay dok-doko.
10Yawgi kulo'o, tuɗgiya,
kay tani may mi liyn ma tun suk loɗi,
kuɗ liwista ta hayamta,
tuw-tita ma li'e,
Tuw-tita ta ŋolta.
11Sa co jarsiya,
law jar simeɗna, ka sinda ala:
Nan min di tigiya,
nigi ma fi dolay vinna hiɗi dolay arkena,
sumun minim mi law ma ɦay-ɦayna ki kayn nala.
Lawn tok dir Israyel ma hinina
12Nigi gurona vi Yakub, nan digi gasita:
nan ma tapgi yigi kafe,
nigi dir gurona vi Israyel ma hinina,
nan ma tokgi yigiya,
nan ma toksiya ki tap fok-dimina hay gulina valam nala,
ki farayn tap tuwam hay liyn ma ti hatna nala,
winekŋa vigi ma li ŋolo hay buur namna.
13Sa ma mun hagata tun voksiya,
nisi co baŋana,
nisi cuk hay vun-ziyna,
nisi cap goyo,
mulla visiya tun voksiya,
Ma-Vatɗina ma tun kisiya may.
Currently Selected:
MIKKA 2: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001