MATEWUS 28
28
Dayta-kulota vi Yesu Kristu
Mark 16:1-8; Luk 24:1-12; Yoh 20:1-20
1May hay li ma sabatn goboy vata, grawt culumta vi buurta dimasta, Mariya Madelen hiɗi Mariya heta kalay kay ɗuw zulda. 2Ɗuw na kayni, wiira vi nagata ka li ŋolo; kay sunda-wuralawna vi Bum-Sumuna jikay gaa'a wuralawni pa, na'a ligat hiɗiyn goyo, musi kalamu. 3Sunda-wuralawn na'ta tuwa' ay ki wileta nala, sligara va'a haɓ tal-tali ki barawna nala. 4Sa gardena tuwsi tun caw visi bat-bat' kay narta, nisi muɗ ki nisi ay miti mit nala. 5May sunda-wuralawna sli ditiya di tam boyna: Ligi narɗi, nan wi ala nigi gar Yesu ma ɓalay kat gu-ma-grakŋa. 6Nam may tanɗi, nam dayay kulo'o ki nam di nala, nigiyaya, ɗuwgi liyn ma nisi burum hayamna. 7Tuɗgi goy gosoyo, digi tam sa hatayna valam ala: Nam dayawa kulo'o hay mitta pa, nam kalay vokgi hay Galileya, goy ɗawni nigi ma wumu. Nan digiyawa. 8Gosoy wit', nisi kal goy tam zulda pa, hiɗi narta hiɗi firita ŋolda, nisi kalay jaŋi, nisi vi labar namna mi sa hatayna. 9Ɗuw na kayni, Yesu co ŋafsi irsiya, nam di'e: Toyta tigiya, nisi ma talamu, vum gayamu, nisi girifimu. 10Hay na'ta Yesu disiya: Ligi narɗi, tuɗgi tam ɓosiyonna, nigi ma disi ala: Nisi ma kal hay Galileya, ɗawni nisi ma ŋaf hiɗi nanu.
11May hay li ma nisi ay hay hagata, sa ŋomda co hay hoyok-ziyna, nisi di muliyan ŋulo sa-ɗifinna kay sle ma lina pet. 12Nisi dak hiɗi sa maariyana, nisi ŋra vunsiya, nisi vul gurjut ŋolo mi sojena, 13nisi disi lo ala: Nigi ma di goy ala sa hatayna valamu co hay henjeta, nisi kulum tuwam goyo hay li ma numa ka kalay sene. 14La guverner hum van kaynawa, numa ma kus yoboyn talamu ta-ta nigi ma li narɗi. 15Hay na'ta sojena yaw gurjuta, li kuɗ va ma nisi hatsiya, dita kayni joki goy jar sa Yudiyana ta-ta hay fatta vaydita.
16May sa doogo yam kepna koray hay Galileya tam hiɗiyta ta Yesu di ka'ta. 17Hay li ma nisi wumu, nisi girifimu, may segena ay giriŋi. 18May Yesu ma tisiya, kus yoboyn tisiya di'e: Gaŋeraŋa pet hay wuralawna, kay nagat kaw vulanti manu. 19Kay na'ta nigi tuɗgi goyo, muɗgi jaf-sumun kaf goy sa hatayna, lisi baptisma hay semda vi Bumna, vi Goora, vi Ŋusta-Peldetta kaw. 20Hatsiya kay vi kuɗ vun ma nan gatgi hiɗi namna pet, ɗuwgiya, nan ka hiɗi nigiya hay buura vigi kaf, ta-ta hay dabaŋ-gu'ta vi nagata.
Currently Selected:
MATEWUS 28: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001