LUKAS 23
23
Yesu col vok Pilatus hiɗi Herod
Mat 27:11-14; Mark 15:2-5; Yoh 18:28-37
1Nisi kaf yaway kulo kuɗ tuwsiya, nisi kal Yesu vok Pilatus. 2Nisi tun caw pi lawt kalamu, nisi di'e: San zawni numa fum kayni nam ka zut sumuna vuma'a kay nisi ma fok lawta, nam ka tel ala vul taara mi Cesarɗi kaw, nam di goy kay tuwam ala namu mi Kristu mulla. 3Pilatus jobomu: Naŋu mi mulla vi sa Yudiyana su? Nam hot dit talam ala: Naŋ di hay liyamu. 4Pilatus di tam muliyan ŋulo sa-ɗifinna hiɗi sumun kaw ala: Nan fi va ma joo'o hay san kaynɗi. 5May nisi so tuwsiya di'e: Nam fok sumun kulo'o, nam ka hata hay Yuda pete, tun caw hiɗi Galileya pa, ta-ta tani.
6Hay li ma Pilatus hum kayni, Nam job ala san kayni mi ma Galileyan su? 7Hay li ma Pilatus hum ala Yesu ka gaa kuɗ gaŋeraŋa vi Herod, nam gum iram tam Herod. Hay buur namna Herod ka hay hoyok-ziyn Yerusalem kaw. 8Hay li ma Herod wi Yesu, hayam li firi ŋolo; kay musi ŋolo nam gar a wi Yesu, kay nam humi labara kalamu, nam var ala Yesu ma li ɗek tara kiram klasige. 9Nam job Yesu sem ŋolo, may Yesu min hotom ditɗi. 10Muliyan ŋulo sa-ɗifinna hiɗi sa wi-ɗota ka lakay lak, nisi gar a pi lawt kalam ŋolo. 11Herod hiɗi sa sojena valamu li Yesu goy bis ŋolo, nisi ŋulumu, cuk sligar ma haɓn talamu, hotom tam Pilatus. 12Hay fat na'ta Herod hiɗi Pilatus vi bono mi tuwsiya, jew kayni gawt ka jarsiya.
Mat 27:15-30; Mark 15:6-19; Yoh 18:38—19:16
13Pilatus yi muliyan ŋulo sa-ɗifinna hiɗi sa ŋulona vi sumuna, nam disiya: 14San kayni nigi maram tanu ala nam ka fok sumun kulo'o. Wulin kayni, nan jobom vok irgiya, may law ma nigi ka tunum kalamna nan may fi mara talam ne' noŋɗi. 15Herod fi va noŋɗi kaw, kay nam gum iramay katma'a, kuɗ kayni, humgiya, san kayni may li va ma nagay kay mitta noŋɗi. 16Kay na'ta nan min watamu, bugolda nan min gumu. 17Hay buur ma yuldet kaf nam gisi sa goy kep kepe. 18Nisi ka siwel kuɗ tuwsi kaf ala: San kayni cum goyo, may guma Barabas goyo. 19Nisi gi Barabas hay daŋgayn kayni kuɗ ɦalayta ta fok kulo hay hoyok-ziyna, sa kep fi mitta hay na'ta. 20Pilatus ka jobsi mara lo, kay nam ka hiɗi varta kay gi Yesu. 21May nisi siwela: Ɓalam kat grakŋa, ɓalam kat grakŋa. 22Pilatus di tisiya hay sem ma ɦidina lo: May nam lum joon mi mige? Nan fi va ma nagay kay mitta hayam noŋɗi. Nan min watamu, bugol kayni nan min gumu. 23May nisi siwel hiɗi winekŋa ŋolo, nisi joba kay ɓalam kat gu-ma-grakŋa. Siwelda visi kola. 24Pilatus col lawt ala van ma li ki nisi job nala. 25Nam ma giy daŋgaya kuɗ ɦalayta-kulota hiɗi mat ma cina, ma sumun ka job kalamna, Pilatus gisit goyo; may nam vul Yesu goy tam ci-goyta kuɗ minda visiya.
Yesu ɓalay tam gu-ma-grakŋa
Mat 27:31-56; Mark 15:20-41; Yoh 19:16-37
26Hay li ma nisi ka nar Yesu goyo, sa kep yum Simon ma Sirene, nam may goy sine pa, nisi tun gu-ma-grakŋa kalamu kay nam ma ziyim kuɗ Yesu. 27Sumun ŋol ɦini-ɦini, hiɗi boyna kaw tap kuɗ Yesu; boyna ka ci ɓisi war-digsiya, ka tiy tuwsi kay Yesu kaw. 28Yesu muɗ iram kirsiya nam disiya: Guro-boyna vi Yerusalem, tiygi kanɗi, may tiygi kay tuwgi nigiya hiɗi gurona vigiya. 29Kay humgiya, buura ka ma'a, hay buur namna sumun ma di ala: Sle'ta ka kay boy sa getayna, sle'ta ka kay boy sa vuɗ guroɗina, sa guron ci miir digsiɗina. 30Hay na'ta nisi ma tun caw di tam hiɗiyn ala: Nigaŋ gaa kuma nig ge! Tam boŋoloŋŋa kaw nisi ma di ala: ɦoŋ gaa kuma ɦoge! 31Kay la nisi li nala hiɗi gu ma irina, gu ma soyna ma li ɗawn linige?
32Nisi tuɗ sum sa jiw-zlata goyo ma' kaw, kay tuɗ cisi goy kuɗ tuwsi hiɗi Yesu. 33Hay li ma nisi co hay liy ma yum ala zok-ta'ara, nisi ɓalam hay liy namna, nisi ɓal sum sa jiw-zlata ma' goy galamu kaw, kep hay galam ma jufna, kep hay galam ma gulla may. 34Yesu di'e: Bunu, vulsi gida ta', kay nisi wi va ma nisi liɗi. Nisi ɓuraw sligara valam jarsiya, ŋaɓam kuɗ ɦayta. 35Sumun ka lakay siriŋ' kay ɗuwa. Sa ŋulona visi ka burah Yesu ala: Segena nam suɗsiya ni, wulini nam suɗ tuwam kay tuwam yo tige, la nam mi Kristu goora vi Lawna! 36Sojena kaw burahamu, nisi tuɗ talamu, vulum vinegrena, 37nisi di'e: La naŋ mi mulla vi Yudiyana ni, suɗaŋ tuwaŋ yoge! 38Ɗot ka ɗoy kulo kalam ala: KAYNI MI MULLA VI SA YUDIYANA.
39Sa kep jar sa jiw-zlata sa ka ɓalay kulo kat gu-ma-grakŋa hiɗi namu burahamu di'e: Naŋu mi Kristu ɗisu? Suɗaŋ tuwaŋ naŋu, suɗma numa kaw ɗisu? 40May hena lawam ɦiya, dum ala: Naŋ may li nar kuɗ Lawn noŋɗi su? Naŋu ma kita na'ta kaay kaŋ kaw! 41Naya kitat kaay kaya hay liya'a, kay nay fum kayni mi wurakŋa vi lopna vaya, may san waŋŋi may li va ma joo noŋɗi. 42Nam di'e: Yesu, varaŋ kan varge hay li ma naŋ coowa hay mulda vaŋu. 43Yesu dumu: Nan daŋ gasita, vaydi naŋ ma mus hiɗi nanu hay Paradis.
44Hay li ma liyn co ki hay leer ma karkiyan nala kayni, jufunda li gaa kay nagata kaf ta-ta hay leer ma zleeŋena, 45kay fatta muɗi jufunu, kojolay ma hay Tempella iram haw gaa ma'. 46Yesu siwel hiɗi delem kulo'o di'e: Bunu, nan hin Ŋusta vanawa hay ɓaŋu. Hay li ma nam di kayni dina, sukam sa'ata. 47Hay li ma mul ma soje kalam kisna wi sle ma lina, nam subur Lawna di'e: Gasiya, san kayni mi sa ma ɗigera. 48Sumun kaf sa co kay ɗuw sle namna, hay li ma nisi wi slen kaf ma lina, nisi hotay goy ŋorsiya, bow ɓisi war-digsi kap-kap' kaw. 49May sa sugolay Yesuna, hiɗi boy sa ay tapay kuɗumu hay Galileya pana lakay goy gine'e kay ɗuw va ma lina.
Pita vi Yesu
Mat 27:57-61; Mark 15:42-47; Yoh 19:38-42
50Sa mara kep jar sa ɗiger-lawta, semda valamu Yosef, nam sa ma ŋaa'a ma ɗigere kaw, 51ŋra-vunda hiɗi lop ma segen lum tam yesu kafna nam min kal tuwam hayɗi, namu mi sa ma hay Arimate, hoyok-ziyna vi sa Yudiyana, nam ka cub mulda vi Lawna. 52Nam kalay tam Pilatus jobom kay tuw Yesu. 53Nam slum tuwamay gaa kay gu-ma-grakŋa pa, ɗutum hay sligar ma haɓna, burum hay zulda ta jugoɗay gaa hay hiɗiyna, ta nisi bay bur sa haya' tuwa noŋo. 54Kayni mi buura vi kotta, sabatna ka tun cawi. 55Boyna sa may kuɗ Yesu Galileya pana tap kuɗ Yosef, nisi wi zulda hiɗi bur ma nisi bur tuw Yesuna, 56nala nisi hotaya kay kot aromatna hiɗi urdina. Bugolda hay buura vi sabatna nisi tun suku, kuɗ vun-ma-gatna.
Currently Selected:
LUKAS 23: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001