ESAYA 3
3
Gijum-gijumta hay mulda vi Yuda
1Awa, wulini Bum-Sumuna Ma-Vatɗina vi vok-ma-duura
ka yaw tina hiɗi gutda goy hay Yerusalem kafe,
tina hiɗi niyn ma ŋomi kulona nam ka yawam goyo,
2sa ma donona hiɗi sa ma duura,
sa ma ka kitata hiɗi sa ma jobta,
sa ma tun gireyta hiɗi sa ma maara,
3sa ma ŋolla vi vok ma dok-vaslna
hiɗi sa ma hay jaf-mulda,
sa ma vul gatta,
sa ma nagay ŋaa'a kay kot slena,
sa ma li gul-yalda.
4Nan ma tun sum sa joriyon kisi mulu,
gurosgurayna ma ti mulda kisiya.
5Jar sumuna, sa hena ma curoɗ sa hena,
gigekaw ma curoɗ sugolomna;
sa ma joriyona ma nef sa ma maara,
sa ma niyam mayɗina ma nef sa ma sumun slum yalam kulona.
6Hay na'ta san ma bow ɓasulumna vo hay ziyna vi bulumu,
ma dum ala: Naŋu sligar-tuwna vaŋ ka'a,
tunaŋ mul kuma'a,
liyn ma ɓulakay goyn kayni naŋ ma slum lawam hay ɓaŋu.
7Hay buur namna ɗawni,
nam ma pat delem kulo'o kay di ala:
nan may mi doktorɗi,
vo vanu fu mayɗi,
sligar mayɗi lay;
nigi ma tunan ŋol kay sumunɗi.
8Yerusalem ka geɗa,
Yuda ka ɦo gaa'a kaw,
kay yoboyna visiya hiɗi lopna visiya gaw hiɗi Ma-Vatɗina,
nisi min cuk irsi kay ŋolda valamɗi.
9Irsi ma ɗuwna li di-goyt kisiya.
Ki Sodoma nala,
nisi siwel goy kay sulukŋa visiya,
nisi may ŋayamɗi.
joot kisiya, kay nisi kot joota.
10Digi ala:
Sa ma ɗigera ka hay hagata ŋaata,
sumun ma ti vuɗna vi lopna valamu.
11Joot kay sa ma dikam joona,
kay nam ka hay hagata joota,
kay va ma nam kotom hiɗi ɓalamna ma hot kalamu.
12Sumuna vanu muɗi curoɗsi si gurosgurayna,
boyna ka ti mulda kigiya,
sumuna vanu,
sa tuni vokgina viygi goyo,
hagata ta nigi poy haya'ta nisi ɦasa' goyo.
13Ma-Vatɗina colawa kay ɗiger lawta,
nam colawa kulo'o kay ka kitat kay sumuna.
14Ma-Vatɗina kitat ka jaram hiɗi sa maariyana
vi sumuna valamu hiɗi sa ŋulona visiya;
nigi mut gulda-guldanawa,
slena vi sa ma hawna ka vo hay ziyna vigiya.
15Nigi min tay sumuna van gaa'a kay mige?
Nigi li ɦawlat tam sa ma hawna kay mige?
Din mi Bum-Sumuna, Ma-Vatɗina vi vok-ma-duura.
Law kat boyna hay Yerusalem
16Ma-Vatɗina di'e:
kay guro-boyna vi Siyon subur tuwsiya,
nisi poy hiɗi delsi kulo tuni tiriŋ',
ɗuw hiɗi irsi pekiya,
nisi giɗaya, muzuk girliŋ ma gaa sesina,
17guro-boy sa hay Siyonna Bum-Sumuna ma welsi yisi goyo,
Ma-Vatɗin ma foksi goy nala'a.
18Hay buur namna ɗawni,
slen ma san gan tuwam hiɗi namna
Bum-Sumuna ma yawam goy kafe:
girliŋŋa, sle ma gum kelsina ma beɗay ki fatta nala,
hiɗi sle ma beɗi ki tilla nala,
19sle ma gum humsina,
tuju ma ɓamna,
hiɗi sligar ma bar kisina,
20Jakawa ma nisi kuluɓum kisina,
jaɓ ma nisi cukum sesina hiɗi kanti ma ciliyna,
gasas ma urdin hayna hiɗi sle ma duɓina,
21wayta-ɓamta hiɗi sle ma gum cinsina;
22sligar ma ŋaana hiɗi rob ma fiyokŋa,
sligar-ciliyna hiɗi birimna,
23daraŋgalla hiɗi sligar ma iram goy yalalla,
sligar ma ɗutum kisina hiɗi mantilla.#3:23 Mantilla ɗuw cawam ma diy goyna vi Nsn 5:7.
24Hay baŋal urdina,
nisi ma fi milla;
hay baŋal kantina,
nisi ma fum mi zigewna,
hay baŋal yam ma giy gaa ŋaana,
nisi ma fum mi yam ma goy welina;
hay baŋal sligar-ciliyna,
nisi ma fum mi birim ma ɗutina;
tuwsi ma mun kil kil',
ma hot li jifiy loɗi.
25Sumuna vigiya ma cuk gaa vok kew-gaferaŋa,
sa donona vigiya ma mit vun duura.
26Vun-galana vi Siyon ma kal hay yorta,
sumun ma foksi goy nala'a,
nisi ma lak gaa butuwu.
Currently Selected:
ESAYA 3: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001