CAWA'TA TUNITA 4
4
Kayin hiɗi Abel
1Bugol kayni Adam bur tam cata valam Eva, na' sli haya, vuɗum Kayin. Na' di'e: Nan fi saawa hiɗi donota vi Ma-Vatɗina. 2Na' vuɗ ɓasulumna Abel lo. Abel ŋomom mi fokŋa, Kayin zumum mi sinena may. 3Mus bugolda neeɗa kayni, Kayin li vulda tam Ma-Vatɗina hiɗi vuɗna sle ma kay nagatna. 4May Abel ɗuw jar fokŋa valamu, nam yaw ma vuɗi jewna hiɗi mulam kaf nam lum ɗifini. Ma-Vatɗina iram vi Abel hiɗi ɗifinna valamu. 5May iram min vi vulda vi Kayinɗi. Kayin muɗ ɦiy ŋolo, dikam ɓulaka. 6Ma-Vatɗin jobomu di'e: Naŋ muɗi ɦiya kay mige Kayin? dikaŋ ɓulakiya kay mige? 7Awa, la naŋ ka var ŋaa'a, naŋ ma but dikaŋ goyo, may la naŋ ka var joo'o, sulukŋa ka buri hay vun ziyna vaŋu, darta valam ma gar kay vaŋ dok-doko, may naŋ ma kol kalamu. 8Kayin di tam Basulumna Abel: Nay tuɗay sine'e hay li ma nisi ka goy hay sinena, Kayin bow ɓasulumna Abel kirib', nam cum goyo.
9Ma-Vatɗina jobomu: Kayin, ɓasuŋŋa Abel ka Arige? Nam hot dita: Nan may wiɗi; lebo nan mi sa ma ŋom ɓasunna su? 10Lawna dumu: Naŋ lum linige? Ɗuwaŋu busuwna vi ɓasuŋŋa ka siwelis gaa kay nagat pa ta-ta delem coy kulo tanu. 11Wulin nagat na'ta ta mal vuna' goyo kay ci busuw ɓasuŋŋa kayni naŋ beɗi goy haya'a. 12La naŋ zum va kay nagat tan kaw, naŋ ma fi va ma sleɗaŋ hayaŋɗi. Naŋ ma mus gaa hay liy kepɗi, dab ta tani dab ta tani, goy kaŋ ɦayay na kila'. 13Kayin di'e: Ma-Vatɗina, kitata ta naŋ tuna' kanta kayn suwi ŋolo, nan as a ziya'ɗi. 14Ɗuwaŋu, vaydi naŋ digiɗanawa goy hay nagat tani, nan ma ŋay goy gine'e hay vok iraŋu, nan ma poy ɗawn goy kan hayay na kila kay yam nagata, la gigekaw fanawa, nam ɗawn ma can goy mati. 15Ma-Vatɗin dumu: La sa ci Kayin goyo, nan ma jobom yalam sem siɗiya. Ma-Vatɗina tun va ma ɗek goyn tam Kayin, kay la gige kaw fumawa ma cum goyɗi. 16Bugol kayni, Kayin vi tuwam goy kir Ma-Vatɗina, nam kalay mus hay nagata vi Nod, hay gal ma kuɗuwna vi Edena.
Jafna vi Kayin
17Kayin bur tam cata valamu, na' sli haya, vuɗ Henok. Nam in hoyok-ziy ma ŋolo, hoyok-ziy namna nam tunum selem hiɗi sem goora valamu Henok. 18Henok vuɗ Irad, Irad vuɗ Mehujayel, Mehujayel vuɗ Metusayel, Metusayel vuɗ Lamek. 19Lamek yaw boyn ma', ta heta ya' Ada, ta heta lo ya' Silla. 20Ada vuɗ Yabal, namu mi bum sum sa lak hay guɗukŋa sa ŋom farayna. 21Basulumna yum Yubal. Namu mi bum sa ci dilla hiɗi sa buw zlekemna kafe. 22Silla na' vuɗ Tubal. Kayin, namu mi ma zli-caf kaway-slawna hiɗi ma wurana. Basulumta ya' ala Naama.
23Lamek di tam boyna valamu:
Ada hiɗi Silla, humgi della vanu,
nigi boyna vi Lamek, humgi dita vanu:
nan ci sa'a kay tuwan ma ka goy milla,
nan ci goor-gooro kay lifit ma kantina.
24La Kayin yalam jobis sem siɗiya, Lamek yalam ma jobis sem dok-siɗiya yam siɗiya may.
25Adam bur hiɗi cata valam mara lo, na' vuɗ goor ma jufu, na' tunum selem ala Set, na' di'e Lawn vulan goor mara'awa hay baŋal Abel ma Kayin cum goyna. 26Set kaw fi goor ma jufu, nam tunum selem ala Enos. Hay na'ta sumun tun caw yi semda vi Ma-Vatɗina hay vunsiya.
Currently Selected:
CAWA'TA TUNITA 4: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001