CAWA'TA TUNITA 2
2
1Ki kayn nala Lawna vat inda vi wuralawna hiɗi nagata hiɗi vokŋa valam kafe. 2Hay buurta siɗiyata Lawna vat vun lopna valam ma nam lum kafna, hay buurta siɗiyata nam tun sukamu kay lopna valam ma nam lum kafna. 3Nam gi bol kay buurta siɗiyata, nam la' goy peldete, kay hay buur na'ta nam tun sukamu kay lopna valam ma nam lumna kaf.
TUN CAWTA VI NAGATA HIƊI SUM-WURANA
Inda vi sana hiɗi cata
4Kayni mi labara vi tun-cawta vi dukalawna hiɗi nagata. Hay li ma Lawna Ma-Vatɗina li nagata hiɗi wuralawn kayni, 5guway ma guray ma hay sinen kaw may dayay kulo kay yam nagat tuwaɗi, hatna bay day hay busayna tuwa, kay Lawna Ma-Vatɗina bay hin niyn si gaa kay nagata tuwa, sa ma zum yam nagat may tuwaɗi kaw. 6May ɗugulla kalay goy hay nagat pa, nam muɗ yam nagat pet lomgo'o.
7Lawna Ma-Vatɗina in sana hiɗi buɗufna nagata, nam fo sukŋa vi irita hay cinamu, san muɗi goy ciwta irita.
8Bugolda Lawn Ma-Vatɗina kot sinen Edena, hay gal ma kuɗuwna, san ma nam inimna nam musum hayamu. 9Lawn Ma-Vatɗina hin guwayna kuɗ jafam kaf day kulo'o kay nagata, gu namna ɗuw jifiy ŋolo, ŋaa'a ŋolo kay ti'e kaw, nam pi guna vi irita hay way sinena, hiɗi guna vi wida kay wi joota hiɗi ŋaata kaw.
10Niy-lumna kalay goy hay Edena pa, jaŋ gaa kuɗ guna, goy ɗawni nam ɓuraw iram goy ir fiɗi'. 11Niy-lum ma jewna yum Pison, namu mi ma ka ŋuy nagata vi Havila noŋ kafe, or ka hay liy namna. 12Or ma hay naga na'ta nam voy goy haɓ siyok', bideliyum#2:12 Bideliyum Dubaŋŋa ma hum gu mara kepe hay gal ma kuɗuwna, segen var ala mi hiɗiyna. ka haya, hiɗiyn oniks.#2:12 Oniks mi hiɗiy ma gus lopo kaw. ka haya kaw. 13Niy-lumna ma ma'na semda valam ala Gihon, namu mi ma ka ŋuy nagata vi Kus noŋ kafna. 14Niy-lumna ma ɦidina semda valam Hiddekel, namu mi ma ka riŋ hay gal ma kuɗuwna vi Asiriya. Niy-lumna ma fiɗina mi Eufrata.
15Lawn Ma-Vatɗin vi sana, nam musum hay sinen Edena, kay nam ma zumumu, ŋomomu kaw. 16Lawn Ma-Vatɗina di gatta mi san ala, naŋ as kay ti kuɗ guwayna ma ka hay sinen kaf; 17may guna vi wida kay wi hiɗi joota zawni naŋ tumɗi, kay hay fattiɗeŋ ma naŋ tumawa ni, naŋ fi mitta.
18Lawn Ma-Vatɗina di'e: May ŋaa'a kay sana a mus valam kepɗi; nan min kot ta gutumta ta slum nam nala. 19Muuriyan ma hay sinena hiɗi layayn ma dukalawna kaf, Lawn Ma-Vatɗina kotom hiɗi nagana, nam maram tam sana, a sana ma tunum selemu. 20Sana tun semda mi muuriyan kaf, mi layayn ma dukalawna, hiɗi faray ma hay sinen kaf; may nam san kay tuwamu fi ma gutumna ma ŋray hiɗi namnaɗi. 21Wulin Lawn Ma-Vatɗina hin senda ŋolda nig gaa kay sana, san kalay sene, nam pat zok-ceera hay hoyokom kepe goyo, hot duk sliwn kulo hay liyamna.
22Ma-Vatɗin Lawna kot cata hiɗi zok-ceera ma nam patamay goy hoyok san pana, nam mara'a mi sana. 23Wulini san di'e: Ɗuwa, na' ta kaynta may goy hay zokan nanu, may goy hay sliwan nan lay. Ma ya' ala cata, kay na'a pata'ay goy tam san pa.
24Kay na'ta san ma hin bulumu hiɗi sulumu, tap hiɗi cata valamu, nisi ma muɗ goy sliw kepe.
25Sana hiɗi cata valam ma' pet ay goy nala'a, nisi may li zulo'o noŋɗi.
Currently Selected:
CAWA'TA TUNITA 2: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001