GATTA-SEM-MA'TA 4
4
Gatta kay li kuɗ vun-ma-gatna
1Wulin kayni, nigi sa Israyella, dita vi Ma-Vatɗina hiɗi gatta valamu ta nam di tigiya nigi ma huma'a, li kuɗa'a kaw, kay nigi ma lak iriya, kay nigi ma cuk hay nagata ta Ma-Vatɗina Lawna vi sumaygi vulgiya. 2Law ma nan dum tigina nigi ma cuk mara vunam noŋɗi, nigi ma yaw mara goy kuɗum noŋɗi kaw; may nigi ma li kuɗ vun-ma-gatna vi Ma-Vatɗina, Lawna vigiya, ki nan vul vun-ma-gatna valam tigi nala.
3Irgi wi slen ma Ma-Vatɗina li'e hay buura vi Baal-Pewor, sum sa tap kuɗ Baal-Pewor jargi kaf Ma-Vatɗin vatsi goyo. 4Nigi sa tap kuɗ Ma-Vatɗina Lawna vigina kaf, vaydi nigi ka iriya.
5Humgiya, gatta hiɗi dita ta Ma-Vatɗina vul tanu nan hatgit kafe, kay nigi ma li lop ŋaa'a hiɗi na'a hay nagata ta nigi min kal haya'ta ɗawni. 6Nigi ma ŋoma'a, li kuɗa'a kaw, kay kayni ma li ɗawni ti yalda hiɗi yamda-wida vigiya kir sumun kaf sa hum slen namna cani, nisi ma di ala: jaf-sum sa ŋol nisin kayni ma li fisi si sum sa yali hiɗi sa yisi wi'e kaw! 7Jaf mara'a ma ŋol ki nay nala, ma lawayna visi goboy hiɗi nisiya ki Lawna vay nala hay buur ma nay jobom kafna mi jaf marige? 8Jaf mara'a ma ŋolo ma gatta hiɗi dita visi ɗigere ki ɗota ta nan vul tigi vaydi nala mi jaf marige? 9May suw pet kayni, ligi ŋal hiɗi tuwgiya, lakgi jigere kay ŋom ciwta vigiya, hay buura irita vigi kaf, kay sle ma irgi wumna kayni yigi ma jokomɗi, kay jaram ma ja goy hiɗi nigiɗi, nigi ma ɗekem kir gurona vigiya hiɗi gurona vi gurona vigiya.
10Buur ma nigi lak vok Ma-Vatɗina Lawna vigiya hay Horeb, hay li ma Ma-Vatɗina di tan ala: Tokaŋ sumun kaf katanu, nan min disi yoboyna vanu, kay nisi ma hat kay li nar kuɗanu hay buur kaf ma nisi ka gaa hay nagata, kay nisi ma hatam mi gurona visiya, buur namna kayni yigi ma jokomɗi. 11Nigi coowa goboyo, nigi lakay gaa hay sem hiɗiyna. Hiɗiyna sli kuwa ta-ta kulo jar dukalawna, jufunda ka'a, ɗugulla ka'a, tukŋa ka'a kaw. 12Ma-Vatɗina law tigiya goy jar kuta pa, nigi hum del ma dina, may irgi may wi saɗi, say del ɦawa tuta. 13Nam vulgi bonota valamu, nam vul hagata kay nigi ma li kuɗ yoboy ma doogona vi gatta, nam ɗo gatta na'ta kay table ma hiɗiyna ma'. 14Hay na'ta kayni, Ma-Vatɗina vulan hagata kay nan ma hatgi dita hiɗi gatta valamu, kay nigi ma li lop hiɗi namu hay nagata ta nigi min co haya' kafta.
15Kay hay buur ma Ma-Vatɗin law hiɗi nigi hay hiɗiyn hay Horeb kayni, irgi may wi saɗi, nala ligi ŋali hiɗi ciwta vigiya, 16kay la naɗi, nigi ma muɗ liwisi, nigi ɗawni ma ceɗ lawayn waana, la va ma ceɗay mige kaw ma koti ŋray hiɗi tuw sana lebo hiɗi tuw cata, 17ma koti ŋray hiɗi muur mige kaw gaa kay nagata, ma ŋray hiɗi layayna mige kaw ma fok kulo dukalawna, 18ma ŋray hiɗi sle ma harmat gaa kay nagata ir mige kaw, ma ŋray hiɗi kulufna ma goloŋ hay niyna gaa kay nagata kaw; 19kay la naɗi, hay li ma nigi cuk irgi kulo hay wuralawn kayni, nigi ɗawn ma wi fatta, tilla, mislekŋa hiɗi sle ma dukalawn kaf, nigi ɗawni ma girif gaa vokomu, sunumu kaw. Kayni mi va ma Ma-Vatɗina Lawna vigiya ɓurawam tam jaf-sumuna kaf gaa kay nagata. 20May nigiya, Ma-Vatɗin yawgiya, nam kalgiyay goy hay zul ma kuta hay Egipte pa, kay nigi ma muɗ goy si sum sa vocota valamu, ki nigi ka vaydi nala.
21Ma-Vatɗin dikam ɓulak katanu kuɗgi nigiya; nala nam yi va kalam ala nan ma ɦaw Yordan kuloɗi, ala nagata ŋaata ta Ma-Vatɗina Lawna vigi vulgit voco'o nan ma kal haya' noŋɗi. 22Nan hayɗini, nan ma mit hay nagat na'ta, nan ma ɦaw Yordan kuloɗi; may nigiya, nigi ma ɦaw kulo'o, nigi ma sli nagat na'ta ta ŋaata. 23Ŋomgi tuwgi ŋaa'a, kay bonota ta Ma-Vatɗina Lawna vigi juna' hiɗi nigita yigi ma joka'ɗi, kay nigi ma kot sle ma ceɗaynɗi, kay nigi ma ceɗ va mara ma sli tuw va maraɗi kaw, ki Ma-Vatɗina Lawna vigiya di tigi nala. 24Kay Ma-Vatɗina Lawna vigiya ti kuta ta ŋala, mi Lawna ma hunaya kaw.
25Hay li ma nigi vuɗ guronawa, hay li ma gurona vigi vuɗ gurowa kaw, hay li ma nigi ka dok-dok hay nagata, la nigi muɗ tuwgi liwisi, la nigi kot sle ma ceɗayna, la va ma sli tuw mige kaw, la nigi li sle ma joo kir Ma-Vatɗina, Lawna vigiya, kay ɓulakam dikamu, 26nan min ala vaydi nagata hiɗi wuralawn ma wi jaraya, nigi ma vat goy gosoyo hiɗi mitta ta koloyta hay nagata ta nigi min co haya'ta ɗawni, bugol nigi ɦaw Yordan kulo ɗawni, buura vigi ma li ŋol loɗi, kay nigi kaf ma mit goyo. 27Ma-Vatɗina ma mergi goy jar jaf-sumuna, nigi ma hin ɗawni ir kiɗaya jar jaf-sum sa Ma-Vatɗin nargi hay nagata visin ɗawni. 28Hay ɗawni nigi ma girif lawayn waana, lopna ma koti hiɗi ɓam sana; guna hiɗi hiɗiyna, ma as kay humɗi, as kay ti fuɗi cinam hisɗi kaw. 29Goy ɗawni pa kaw nigi ma gar Lawna, Ma-Vatɗina vigiya, nigi ma fumu, la nigi garam hiɗi dikgi kafe, hiɗi ciwta vigi kafe kaw. 30Hay li ma nigi ka hay vun-zlata, slen kaf cani ma co kigiya, may hay liyn ma vokŋ ɗawni, nigi ma hot tam Ma-Vatɗina, Lawna vigiya, nigi ma humum delemu may; 31kay Ma-Vatɗina Lawna vigiya nam Lawn ma slugota, mi Lawn ma as hingi goyɗi, ma as ɓulakgi goyɗi kaw; bonota ta nam yi kalamu jaram hiɗi sumaygita yalam ma joka' goyɗi kaw.
32Vigi labara kay buur ma kal jewgina, tun caw tam buur ma Lawna in sana gaa hay nagata, tun caway tam vun dukalawn gal hen pa ta-ta hay gal hena, law ŋol ma ki kayn nala bay li tuwa, sa bay hum labara ma ki kayn nala tuwa su? 33Jaf-sum sara ka'a sa hum del Lawna law jar kuta may nisi mus iriya ki nigi nala ka su? 34Lawn mara'a marige ma co jar sumuna kay yaw jaf-sumuna goy jar jaf-sum segena, hiɗi wakka, hiɗi ɗekka, hiɗi gul-yalda hiɗi duura kaw, hiɗi ɓalam ma donona, hiɗi balam goy meɗiya kaw, ki Ma-Vatɗina Lawna vigiya li ay kigi hay Egipte kirgi kaf nala, Lawna mara'a ma ki kayn nala ka su? 35Slen ɗeki goy tigi haraŋi, nigi wiya kaw ala Ma-Vatɗin mi Lawna, Lawn mara'a ma ki nam nala mayɗi. 36Hay dukalawn pa, nam di delem tigiya kay hatgiya, gaa kay nagata, nam hingi a wi kuta valam ta ŋolda, nigi hum delemu goy jar kuta pa kaw. 37Nam min sumaygiya, vilek jafna visi bugolsiya; kuɗ kayni nam kalgi ay goy hay Egipte pa hiɗi gaŋeraŋa valam ma ŋolla; 38jaf-sum sa ŋol suwgiya, dono suwgi kaw nam digiɗsi goy vokgiya, kay cukgi hay nagata visiya, kay vulgi nagata visi voco'o, ki nigi ka wi vaydi nala. 39Nigi ma wi'e hay buur namna, nigi ma vi hay dikgi kaw ala Ma-Vatɗina mi Lawna, la ɗaw kulo hay wuralawn kaw, la gaa kay nagat tan kaw, laway mara mayɗi, 40dita valamu hiɗi vun-ma-gatna valamu ma nan vulgit vay ina nigi ma li kuɗum vaydi, kay nigi ma fi sle'ta, nigiya hiɗi gurona vigi sa bugolgina, kay buura vigi ma ɦur voko hay nagata ta Ma-Vatɗina Lawna vigiya vulgiya kay dok-doko.
Hoyok-ziy ma ŋayna goy bugol Yordan
41Musus lak hoyok-ziyn goy ɦidi goy gal hena vi Yordan, hay galla vi fatta ma dayna, 42kay sum sa bisi vi sugolsiya bay ka gaw hiɗi nisi goy jewe, ma tuɗ ŋay goy hay hoyok-ziy namna, kay nisi ma fi cita-goytaɗi. 43Hoyok-ziy namna kayni: Betser hay fulda kulo kay ɗiŋiriŋŋa goy vi sumuna vi Ruben; Ramot hay Galaad, goy vi sumuna vi Gad; hiɗi Golan hay Basan, goy vi sumuna vi Manase.
GATTA KAY LI KUƊ DITA VI LAWNA
Gi humda kay vun-ma-gatna
44Kayni mi vun-ma-gatna ma Musus ɗekem goy vok sa Israyella. 45Kayni mi di-goyta, sle ma diyna hiɗi gatta ta Musus ɗo'o tam sa Israyella, hay kalta visi ay goy hay Egipte. 46Ay kayni goy hay gal hena vi Yordan, hay lokŋa, ɗiger vok Baal-Pewor, hay nagata vi Sihon, mulla vi Amoriyana, ma ay musi ziy hay Hesbon, ma Musus hiɗi sa Israyella kol kalamu, hay kalta visi ay goy hay Egipte pa. 47Nisi sli nagata valamu hiɗi nagata vi Og, mulla vi Basan. Muliyan nisi sa ma'na vi Amoriyana ay goy hay gal hena vi niy-lumna Yordan, hay gal ma kuɗuwna. 48Tun caw ay hay Arower kel niy-lumna Arnon pa, ta-ta tam hiɗiyta vi Siyon ta ya' Hermon, 49hay Araba noŋ kafe goy hay gal hena vi Yordan, hay gal ma fatta dayna, ta-ta tam niy-lumna vi Araba, gaa sem hiɗiyta Pisga.
Currently Selected:
GATTA-SEM-MA'TA 4: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001