GATTA-SEM-MA'TA 2
2
1Nay muɗ bugolay kaf, nay kalay hay galla vi fulda, hay hagata vi niy-lum ma slawna, ki Ma-Vatɗin di tan nala, nay ŋuy ir buur ŋolo kat hiɗiyta vi Seyir.
Sum sa Israyella ŋuy goy kat Edom, Mowab hiɗi Amon
2Ma-Vatɗina di tan ala: 3Hiɗiyt zawni nigi ŋuya'awa sem ŋolo, wulin kayni muɗgi irgi hay gal ma gaana. 4Vulaŋ hagat tam sumun ala: Nigi ma jik goboyo kat jar-nagata vi guro-biyogina, gurona vi Esaw, sa ka lakay ziy hay Seyir. Nisi ma li nar kuɗgiya; may lakgi dok-doko jigere. 5Nigi ma dursiɗi, kay hay nagata visiya nan min vulgi liy ma nigi as tun way-segi gaa hayam noŋɗi: May nagata vi Seyir nan min vula' voco'o mi Esaw. 6Tin ma nigi tumna nigi ma gusum gusi hay bisiya, niy ma nigi cumna kaw nigi ma gusum gusi hay ɓisiya. 7Kay Ma-Vatɗina Lawna vigiya gi bolo kay lop ma nigi lum hiɗi ɓigin kaf, nam wi poyta vigiyawa hay fulda ŋolda na'ta tani. Wulini busat liy dok-fiɗi, Ma-Vatɗina Lawna vigi ka hiɗi nigiya, va mara may suwgiɗi kaw.
8Nala nay jik goy gal guro-biyoyna, gurona vi Esaw, sa ka lakay hay Seyir, hay jar hagata vi Araba, vi Elat hiɗi Esiyon-Geber; bugol kayni numa muɗ ŋorma'a, numa jiki hay hagata vi fulda vi Mowab.
9Ma-Vatɗina di tanu: Naŋ ma tuɗ dur Mowabɗi. Kay nan as kay vulaŋ liyna hay nagat kaynɗi; nan vul Ar kayni mi gurona vi Lot. 10Hay jewe sum sa Emimna ay lakay ziy haya, nisi kayni si sum sa gaŋeraŋi, ŋol dak-dak, wuli fiyoko kaw, ki sum sa Anakimna nala. 11Nisi kaw sumun ɗuwsi kayni ki sa Refayimna nala, ki sa Anakimna nala kaw, sum sa Mowabna yisi ala Emim. 12Jewe li ziy hay Seyir kayni si sum sa Horitna; gurona vi Esaw kol kisiya, vatsi goy kafe, vurna hay baŋalsiya, ki sum sa Israyella li hay naga ma ir visina, ma Ma-Vatɗin vulsitna nala. 13Wulin kayni, yawgi kulo'o, ɦawgi niy-ma-riŋŋa vi Zered kulo'o. 14Nay yaways hay Kades-Barneya pa ta-ta ɦaw niy-ma-riŋŋa vi Zered kulo kayni, nay mus ir busat dok-hidi yam glafandi, ta-ta hay li ma jafna vi sum sa wi duura vat goy jaray hay kaŋŋa kafe, ki Ma-Vatɗina yi va kalam nala. 15Ma-Vatɗina bur balam kisiya kaw kay vatsi goyo jaraya hay kaŋŋa, ta-ta nisi vatis goy kafe.
16Hay li ma sum sa wi duura kaf mitta vatsi goy jar sumun vatna, 17Ma-Vatɗina ka di tan ala: 18Vaydi nigi ma jik hay jaara vi Mowab kay kal hay Ar, 19nigi ma co kat sa Amonna, nigi ma tuɗ katsiya kay dursiɗi; kay nan as vulgi liyna hay nagata vi sa Amonnaɗi, nan vul nagata kayni mi gurona vi Lot.
20Nagat na'ta kayni sumun ka ɗuwa' ki na' ti nagata vi gurona vi Refayim nala; kay jewe sum sa Refayimna ays ziy haya, sum sa Amonna yisi ala Zamzumim. 21Sum nisin kayni gaŋeraŋi, ŋol dak-dak, wuli fiyoko kaw, ki sum sa Anakimna nala. Ma-Vatɗina vatsi goy vok sa Amonna, sa Amonna digiɗsiya, lak ziy hay baŋalsiya. 22Ma-Vatɗina li ki kayn nala kaw kat gurona vi Esaw sa ka lakay hay Seyir, hay li ma nam vat sa Horitna goyo voksiya, nisi kol kisiya, lak hay baŋalsiya, ta-ta hay buur ma vaydina. 23Sum sa Aviyena, sa ka lakay hay hoyok-ziy ma gurayna ta-ta hay Gaza, sum sa Kaftora vatsi goyo, sum sa Kaftora may goy hay Kaftor pa, nisi lak ziy hay baŋalsiya.
24Yawgi kulo'o, tuɗgiya, ɦawgi liy ma beɗna vi Arnon kulo'o. Ɗuwgiya, Sihon mulla vi Hesbon ma Amoriyana hiɗi nagata valamu nan vulsiyawa hay ɓigiya, wulin pa, sligi nagat na'ta, tuɗgi lisi duura! 25Vaydi pa nan min li a narta hiɗi ɓirta-dikga kal hay dik sum sa gaa kay nagat kaf kuɗgi nigiya, hay li ma nisi hum labara vigiyawa, tuwsi ma visi bat-bat', narta ma kal hay diksi ŋolo kuɗgi nigiya.
Hay li ma nisi sli nagata vi Sihon, mulla vi Hesbon
26Hay fulda vi Kedemot pa nan cuk sumun kat Sihon mulla vi Hesbon, hiɗi kasla ma sleɗna. Nan ka dum ala: 27Numa min jik hay nagata vaŋu, numa tuɗ ɗawn hay hagat ja ɗiger, cal goy gulɗi lay cal goy jufɗi lay. 28Tin ma numa tumna numa gusum gusi kaŋu, niy ma numa cumna numa gusum gusi kaŋu may, numa jik ɗawn kay sema ɦawa nala. 29Gurona vi Esaw sa ka lakay hay Seyir kaw hinma jik nala, sa Mowabna sa hay Ar kaw nala. Naŋ kaw hinma jika, kay numa min ɦaw Yordan kulo'o kay co hay nagata ta Ma-Vatɗina Lawna vuma vulma'a. 30May Sihon, mulla vi Hesbon min hinma jik hay nagata valamɗi; kay Ma-Vatɗina Lawna vigiya muɗ varta valam direŋe, so'otom dikamu kaw, kay vulum goy hay ɓigiya, ki nigi ka wi vaydi nala.
31Ma-Vatɗina di tanu: Humaŋu, Sihon hiɗi nagata valam kaf nan min vulsi hay ɓaŋ vaydi. Wulin pa, naŋ ma sli nagata valamu. 32Sihon kalay goyo kay ŋafay iraya hiɗi sumuna valam kaf, kay duraya hay Yahat. 33Ma-Vatɗina Lawna vaya vulum hay ɓaya, nay kol kalamu, namu hiɗi gurona valamu hiɗi sumuna valam noŋ kaf. 34Hay na'ta kayni nay yaw hoyok-ziyna valam kaf, jufayna, boyna hiɗi gurosgurayna nay cisi goy kaf, hin mara kep kaw pir goyɗi. 35Nay yawam kayni mi farayna, hiɗi sle ma ɓuraŋŋa hiɗi hoyok-ziy ma nay slumna tuta. 36Tun caway hay Arower kel niy-ma-riŋŋa vi Arnon, hiɗi hoyok-ziy ma ka hay beɗna ta-ta hay Galaad, hoyok-ziy ma vay vunay gaa gehew' mayɗi, Ma-Vatɗina Lawna vaya vulum hay ɓay kafe. 37May nay min co kat nagata vi gurona vi Amonɗi, kel niy-ma-riŋŋa vi Yabokɗi kaw, tam hoyok-ziy ma kat hiɗiynɗi kaw, hoyok-ziy ma Ma-Vatɗina Lawna vaya di ala nay tamamɗina nay min co katamɗi kaw.
Currently Selected:
GATTA-SEM-MA'TA 2: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001