GATTA-SEM-MA'TA 19
19
Hoyok-ziy ma ŋay hayna
1Hay li ma Ma-Vatɗina Lawna vigiya, digiɗ sumunawa goy vokgi hay nagata ta nam min vulgiya, hay li ma nigi digiɗsiyawa, nigi lakawa hay nagata hiɗi hoyok-ziyna visiya, 2hoyok-ziy ma Ma-Vatɗin min vulgiya kay nigi lak hayam ɗawni, nigi ma lak hoyok-ziy mara goy ɦidi. 3Nigi ma gi hagan kalamu, nagata ta Ma-Vatɗina Lawna vigiya min vulgiya nigi ma ɓurawa' ira' gaa ɦidi, ɓuraw hoyok-ziyn nala kaw kay sa ma ci matna as pir kay ŋay hay hoyok-ziy namna. 4Sa ma ci mati ma as pir hay hoyok-ziy namna kay suɗ irita valam kayni, mi sa ma ɓalam vi ɓasulumna hay li ma nam may gaw hiɗi nam jewɗi: La nisi kalay kuɗ tuwsi hay fulda kay ka guwa kla; 5nam poŋ ɓalam kulo kay ka guna, la ceɗn peŋ goyo, nam vi ɓasulumna, ɓasulumna cap mita ni, sa namna as pir hay hoyok-ziy ma ŋayna kay suɗ irita valamu. 6Kay mige sa ma job yam busuwna, hay ɦiyda valam ta ŋolda ɗawn ma jaŋ kuɗumu fumu, kay liyn gine'e ni, nam ɗawn ma calamu, cum goy mati. Dolay kayni nam nagay a ti mittaɗi, kay gaw may jaram hiɗi ɓasulumna jewɗi. 7Kuɗ na'ta kayni nan vulgi hagat ala: Nigi ma lak hoyok-ziy goy ɦidi. 8La Ma-Vatɗina Lawna vigiya ɦur vun-nagata vigiyawa goyo, ki nam yi va kalamu tam sumaygi nala, la nam vulgi nagata ta nam yi va kalamu kay vula' mi sumaygit kafe, 9kep kayn ala nigi ma li kuɗ vun-ma-gatna ma nan dum tigi vaydina, ŋomom kaw, kep kayn ala nigi ma min Ma-Vatɗina Lawna vigiya, kep kayni ala nigi tuɗ dok-dok hay hagata valamu, nala nigi ma cuk hoyok-ziy mara ɦidi tam hena lo. 10Nala sa ma may li va ma jooɗina busuwam ma ɦokis goy ɦawa gaa hay nagata vigiya ta Ma-Vatɗina Lawna vigi vulgit vocota kayni may hay liyamɗi. Nigi ma hin busuwn tuni kigiɗi.
11May hay li ma san ka hiɗi gawta kat ɓasulumna, la nam bur va gaa vok ɓasulumna, fok kulo kat ɓasulumna kay calamu ta-ta nam cap mita; la nam pirawa hay hoyok-ziy namna lakŋi, 12sum sa maariyana vi hoyok-ziyna gi sunda kalamu kay vumiya, nisi vulum goy hay ɓam sa job yam busuwna, kay nam ma mit goyo. 13Nigi ma wum hawam noŋɗi, sa ma ɦok busuw sa ma li va ma jooɗin goyna nigi ma bam iram goyo jar gurona vi Israyel, nala nigi ma lak hay sle'ta.
Jok-goyta vi jar-liyna, di-goyta ta hiɗi sinda
14Vun liyna vi sugolaygina ma sumaysi tunumis gaa ɓa-ɓana nigi ma jokom goyɗi, hay li ma nigi coowa hay vocota ta Ma-Vatɗina Lawna vigiya vulgiyawa kay nigi ma lak haya.
15La lawt pi kay san ala nam li va ma joo'o, la wum mi sa kep ɦawa'a ni, as ka kitat kalamɗi, la sulukŋa lebo joo mige kaw ma san lumna; nay vi ala nam li joo gasiya kayn hay li ma sumun ma' lebo ɦidi wum hiɗi irsiya.
16La san tun lawtawa kay sa'a ala nam wum ci mati, 17sum nisi sa ma'na sa lawt jarsina ma tuɗ vok Ma-Vatɗina, vok ir muliyan-sa-ɗifinna hiɗi sa ka kitata hay buur namna. 18Sa ka kitata ma fek caw lawt goy ŋaa'a. La san kayni wi lawt hiɗi iram gasiɗi, la nam tuna' kay sugolomna kayni ti lawta, 19ki kayn nala nigi ma lasamu ki nam varay kay las sugolomna nala. Nigi ma pat joota goy jar gurona vi Israyel. 20Hay li ma segen humawa, nisi ma li nari, jiw-zlata ta ki kayn nala ma li jargi loɗi. 21Nigi ma wi haw saɗi; irita kay irita, ira kay ira, siya kay siya, ɓamta kay ɓamta, gayta kay gayta.
Currently Selected:
GATTA-SEM-MA'TA 19: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001