3 YOHANA 1
1
Gi-deɓta. Vida gasita vi Gayus
Mat 10:40-42
1Sa ma maara ɗo tam Gayus, ma hayan kalamna, ma nan minim hay gasita. 2Ma hayan kaŋŋa, nan min ala naŋ ma muɗ dono'o hay slen kaf, a naŋ ma mus goy gaŋiya kaw, ki ciwta vaŋu muɗ dono'o nala. 3Nan li firi ŋolo hay li ma ɓosiyayna co tani, nisi di goyo kay gasita ta ka hayaŋu, kay poyta vaŋu ta naŋ ka poy hay gasita kaw. 4Hay li ma nan ka hum ala gurona van ka poy hay gasita, firita van tara ta suw kayn tayɗi.
5Ma hayan kaŋŋa, naŋ ka li slen hay liyamu hay sle ma naŋ ka lum kay ɓosiyayna, sa pulla noŋ kaw; 6Nisi li di-goyta kay minda vaŋu vok Ekklesiyata. Nan siɗawaŋu kay naŋ ma gut kuɗsiya hay rogoyta visiya, kay kayni ŋaa'a kir Lawna. 7Kay nisi kal goy kayni hay semda vi Bum-Sumuna, nisi fi va hay ɓam sa waana noŋɗi. 8Sum sa ka ki kayn nala nay as visi hiɗi firita, kay nay ma muɗ si sa sunda hiɗi nisi hay gasita.
Yi kay Diyotrefes, ɗigerta vi Demetriyus
1 Kor 4:18-21
9Nan ɗo ɗerwelda neeɗa tam Ekklesiyata; may Diyotrefes ma min mus ma ŋolla jarsiya, min vumaɗi. 10Kay na'ta, la nan coysawa, nan ma digi kay sle ma nam lumna, kay nam ka di yoboy ma joon kuma'a; kayni kaf may asamɗi, kay nam kay tuwamu min vi ɓosiyaynɗi, sum sa min vi ɓosiyayna nam telsiya, digiɗsi goy hay ziyna-Lawna kaw.
11Naŋ ma hayan kaŋŋa, naŋ ma tap kuɗ jootɗi, may laŋgi mi sle ma ŋaana. Sa ma li ŋaata, nam vi Lawna; sa ma li joota, nam vi Lawnɗi.
12May Demetriyus sumun kaf, gasita kay tuwa' kaw ka li di-goyta ta ŋaata kalamu, numa kaw ka li di-goyt kalamu, naŋ wi ala di-goyta vuma kayni gasiya.
13Slen ka kan ŋolo kay ɗo taŋu, may nan min ɗo taŋu hiɗi aŋkrenɗi, hiɗi plumnaɗi kaw,#1:13 aŋkrena, plumna plumna mi gu ma vunam celɓete, jiyobom gaa hay aŋkrena kay ɗo hiɗi namu. 14nan ka hiɗi cubta-sle'ta ala ir liyn neeɗa ɦawa nan ma ŋaf hiɗi naŋu, nala nay ma laway vun tuwaya.
15Slugota mus hiɗi naŋu! Boniyayna ka gaŋ deɓisa. Gaŋ deɓ mi boniyayna, gisi deɓ kisi kep kep kafe.
Currently Selected:
3 YOHANA 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001