2 TIMOTEWUS 1
1
Ɗek-tuwta hiɗi gi-deɓta
1Paulus, Apostolla vi Kristu Yesu, kuɗ minda vi Lawna, kuɗ deŋga vi irita ta ka hay Yesu, 2tam Timotewus goora van ma hayan kamna: Slugota, lamanda hiɗi toyta vi Lawna Bumna, hiɗi Kristu Yesu Bum-Sumuna vaya.
Paulus ka gat Timotewus ki goora valam nala
2 Tim 2:1-12; Efes 1:3-7
3Nan gideɓe mi Lawna, ma nan ka sunum hiɗi tap-wida van goy butiya ki sumiyan-ŋolo sunum nala kaw, hay siɗawta vanu hay falayta hiɗi henjeta kaf yan may jokaŋɗi; 4kay human gan kay zimiyna vaŋu, nala dikan ka tan ŋolo kay ɗuwaŋu, nan ma hob hiɗi firita; 5human ka gan kaw kay vida vaŋu ta bay mileta ta ka hayaŋu, ta ay jewe hay suŋ-ŋolo Loyis hiɗi suŋu Eunike, nan wi goy ŋaa'a ŋolo ala vida na'ta ka hayaŋu.
6Wulini nan min ala naŋ ma do kut kuɗ vulda-slugota vi Lawna ta naŋ fa'a kuɗ tunda-ɓamta ta nan tun kaŋu. 7Kay ŋusta ta Lawna vulaya may ti ŋusta vi nartaɗi, may ŋusta vi donota, hiɗi ti-kamda, hiɗi ŋalda kaw.
8Kay na'ta naŋ ma li zulo'o kay li di-goyta kay Bum-Sumuna vayaɗi, kan nan sa ma daŋgayna valamɗi kaw, may tapaŋ hay zumalda hiɗi nanu kay labara ma firina, kuɗ donota vi Lawna. 9Nam ma suɗayawa, yayawa hiɗi yita peldetta, may kuɗ lopna ma nay lumnaɗi, may kuɗ ŋaɓta valam nam kay tuwamu, hiɗi slugota ta nam vulawa taya hay Kristu jew liyn ma vatɗina pa. 10Slugota na'ta vul tuwa'awa goy wulini, hay li ma sa ma su'da vaya Yesu Kristu maawa, hay li ma nam muɗ mittawa goy maŋaya, hay li ma nam mar irita hiɗi bay loɗ-goyta goy haraŋi hiɗi labara ma firina.
11Nam tunanawa sa ma kus yoboyna, sa ma apostolayna, sa ma hatta kaw kayni kay labara ma firina namna. 12Kuɗ labara ma firina namna nan ka ci lasta, may nan li zulo'o kay kaynɗi, kay nan wi nam ma nan vi hayamna, kay nan wi ala nam as ŋom sle ma vulanti manna ta-ta hay buur namna ɗawni.
13Yoboy ma bay gesna ma naŋ humum hay vunanna, naŋ ma ŋomomu hay vida, hay minda ta ka hay Yesu Kristu kaw, naŋ ma sli kuɗumu. 14Ŋomaŋ va ma ŋaana ma vuli taŋu kuɗ Ŋusta Peldetta ta ka musi hayaya.
15Naŋ ma wi ala nisi sa hay Asiya kaf hinanawa goyo, jarsi kayni si Figelus hiɗi Hermogenes. 16Bum-Sumuna li slugota tam ziyna vi Onesimus lige, kay nam sleɗan dikanawa sem ŋolo, tuwam may li zulo kay jaɓna vanɗi kaw. 17May hay li ma nam co hay Rom, nam garan gosoyo, nam fanu kaw. 18Hin Bum-Sumuna vulum a nam fi lamanda kulo talamu hay buur namna ɗawni. Sunda ta nam sunan hay Efesus naŋ kay tuwaŋ wa' goy ŋaa'a ŋolo suw segen kaf.
Currently Selected:
2 TIMOTEWUS 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001