2 PETER 3
3
1Nigi sa hayan kigina, kayni ɗerwelda ta sem ma'ta ta nan ɗo tigiya. Haya' ma' pete nan ka gigi humgi kay sle ma jewna, kay nigi ma lak hay wid kayni hay yigiya. 2Kay humgi ma gigi kay yoboy ma sa jobta-Lawna sa peldetna dum jewe, hiɗi vun-ma-gatna vi Bum-Sumuna ma su'da ma sa Apostolayna vigi kusumna. 3Wigi goy jew pet ala hay buur ma cawna sum sa joona ma ma'a hiɗi burahta, nisi ma poy kuɗ darta visi kay tuwsiya, 4Nisi ma di'e: Dita-ŋaɓayta kay mata valamu ka arige, kay hay li ma sumiyay miti ay pa, slen ka ki ay hay cawa'ta tunita nala. 5May van kayni kirsi ta, may yisi jokomu, ala hay liyn ma ɓa-ɓana Lawn lawa, dukalawn hiɗi nagata liya, nagat koti jar niyna, na' koti hiɗi niyna kaw, 6lo, nagata ta ay hay na'ta ɗub goloŋ jar niyna, 7may kuɗ yoboy namna lo, dukalawna hiɗi nagata ta wulinta ka ŋomi kay cub kuta, kay fatta vi kitata hiɗi ba-goyta kay sum sa vi kuɗ Lawnɗina.
8May yigi ma jok van kaynɗi, nigi sa hayan kigina, a fatta kepta kir Bum-Sumuna ki busat birim ɗaw nala, busat ta birimta kir Bum-Sumuna ki fatta ta kepta nala may. 9Bum-Sumuna may vi yalam kay hob vun dita valamɗi, may ki segena ka var ala ma mus ta-ta nalaɗi, may nam ka ligi ŋali, kay nam min ala sa kep kaw ma ba goyɗi, may nam min ala sumun kaf ma co tam hamda.
10May fatta vi Bum-Sumuna ma co'o ki sa ma kulla nala, hay buur namna dukalawna ma vat goyo hiɗi zamda ŋolo, sle ma kulo dukalawna ma sli kuwa, ma ŋal goyo, nagata hiɗi sle ma haya'na kaf ma ŋal goyo kaw.
11La slen kayni kaf ma gur goyo ki kayn nala, nigi ma gar a poy hay peldetta hiɗi narta kuɗ Lawna, 12Cubgi buur ma mata vi Lawna, hin buur namna co gosoyo kaw, kay kayni mi buur ma dukalawna ma sli kuwa, ma ŋal goyo, sle ma sliy kuna ma ɦuwal goyo kaw. 13May kuɗ dita-ŋaɓayta valamu, nay ka cub dukalawn ma wulina hiɗi nagata wulita, ta ɗigerta ma mus haya'ta,
14Kay na'ta nigi sa hayan kigina, hay li ma nigi ka cub slen kayni, sogi tuwgiya kay nigi ma lak bay joota, bay gese hay toyta. 15Wigi ala cubta-ŋalda vi Bum-Sumuna vaya ti su'da vigiya, ki ɓasuyn Paulus ma hayay kalamna ɗoowa tigi nala, kuɗ yalla ma vuli talamna. 16Kayni mi slen ma nam ɗom hay ɗerwelda valam kafe hay li ma nam ka law kay slen kayni, slen ma hum lopo ka hay ɗota valamu, sum sa bay-wida hiɗi sum sa bay vi dono'o dum cawam goy guniya, ki nisi ka li tam ɗo hena nala kaw, kay ba tuwsi goyo.
17Nigi sa hayan kigina, nigi sa wi slen kayni jewe, ligi ŋali, hin sa jiw-zlata yawgi kuɗsi hay viy-goyta visiɗi, vida vigi ta nigi lakay haya' dono'o, nigi ma hina' goyɗi kaw. 18May wulgi kulo'o hay slugota hiɗi wida vi Bum-Sumuna ma su'da vaya Yesu Kristu. Tam namu gajijita wulin pa ta-ta hay buura vi vatɗita.
Currently Selected:
2 PETER 3: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001