1 PETER 5
5
Tam sa maariyana hiɗi sa viyna
1 Tim 3:1-7
1Wulini nan min vul gatta mi sa maariyana sa ka jargiya, kay nan kaw mi ma maara ki nisi nala, nanu sa ma wi lasta vi Kristu hiɗi iranu, nan ka'a hay gajijita ta min vul tuwa' goy haraŋ ɗawni kaw. 2Nigi ma ŋom fok-dimina vi Lawna ma ka hay ɓigina, may hiɗi trestaɗi, may kuɗ minda vi Lawna, may hiɗi varta kay fi va kuɗumɗi, may kuɗ minda ŋaata vi dikgiya; 3gargi kay ti mul kay sum sa gaa kuɗ gaŋeraŋa vigin ɦawaɗi, may nigi ma li si sum sa fok-dimin sli kuɗgiya. 4Kay hay li ma mul ŋol ma ŋomda vul tuwamawa goy haraŋi, nigi ma fi bogoray ma gajijita valam may vat goyɗina.
5Nala kaw nigi sa bay li busat ŋol tuwana, humgi kuɗ sa maariyana, nigi kaf cukgi ŋalda kigiya jar-tuwgiya, kay Lawna fok kulo'o kay sum sa subur tuwsina, may nam vul slugota valamu mi sa hot yisi gaana. 6Hotgi yigi gaa kuɗ gaŋeraŋa vi Lawna, kay nam ma vulgi ŋolda hay li ma liyn coowa. 7Cukgi yorta vi dikgi kaf kalamu, kay nam min ŋomgiya.
8Lakgi ŋali, lakgi jigere kaw! Matna ma gaw kigina ka cigeɗgi ki zlona ma ci gumu nala, nam ka gar gigekaw ma nam fi muta. 9Yawgi kulo kalamu, lakgi ɗeŋe hay vida, kay nigi wi ala lasta ta ki kayn nala, ɓosiyogi sa hay nagata na' tun kisi kaw. 10May hay li ma nigi fi lastawa ir liyn neeɗa fina, Lawna mul slugota, nam ma yigi ay tam gajijita valamu ta vatɗita hay Kristu, nam ma pigi segi gaa'a ma muɗgi ɗeŋe, ma muɗgi dono'o, ma muɗgi ge'ɗi kaw. 11Tam namu gajijita hay vatɗita vatɗita, Amen!
Gi bolda
12Ɗota na'ta ir goor neeɗa kayni, nan vulgitis hay ɓam Silvanus, ɓasuy ma gasina, hay tani nan ka gatgiya, ka ɗekgi goy kaw ala kayni ti slugota vi Lawna ma gasina, ta nigi jun tuwgi ta'ta.
13Na'a ta vilekay-goyta ta ka hay Babilon gigi deɓe.#5:13 Na'a ta vilekay-goyta Ma lin ti Eglista vi Yesu. Goora vanu Markus kaw gigi deɓe. 14Gigi deɓ jar-tuwgiya hiɗi ŋaf-vunda ta minda.
Toyta tigi nigi kaf sa ka hay Kristu.
Currently Selected:
1 PETER 5: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001