1 MULIYANA 1
1
VATTA VI MULDA VI DAVID
Mulla David muɗ maari
1Mulla David muɗi maari, busata valam kalay ŋolo; nisi baram sligar talam kaw, tuwam may gi ku noŋɗi. 2Sa sunda valamu di talamu: Mulla, wulin kayni numa garaŋ goot-cat tara kepe ta bay bur tam sa tuwa; na' ma col vokaŋ tani, na' ma kotaŋ tuwaŋu, na' ma bur gaa dikaŋu; ki kayn nala tuwaŋ ma gi kuwa. 3Nisi gar goot-cat ta jifiyta hay nagata vi Israyel noŋ kafe, nisi fa' kayn ti Abisak ta Sunamitta, nisi mara' kat mulla. 4Goot-cat na'ta kayni jifiyta va' suwiya. Na' kot tuw mulla, sunumu kaw; may mulla may bur ta'ɗi.
Adoniya, kep jar gurona valamu gar kay ti mulda
5Adoniya, goora vi Haggit, suburta kal hayamu, nam ka di ala: Muɗ mul ɗawn mi nanu. Nam gar keke-ma-duur kep hiɗi sum sa jaŋ kulumayna kaw, gar sum sa jaŋ vokomna dok-vasl may. 6Hay buur ma irita valam kaf kayni, bulum bay gatam sem kep ala naŋ lum na kayn mi mige tuwa. Adoniya namna kayni jifiy ŋolo, nam kayni mi ma vuɗ kay Absalomna. 7Nam ŋra vunam hiɗi Yowab goora vi Seruya, hiɗi mul-ma-ɗifinna Abiyatar kaw; nisi tap kuɗ galla valamu may. 8May mul-ma-ɗifinna Sadok, Benaya, goora vi Yehoyada, Natan ma jobta, Simey, kep hiɗi sum sa diksi jufayna vi David kaf min tap kuɗumɗi.
9Adoniya ŋat fok-dimina, ŋat luwayna, ŋat guro-luway ma jakayna, goboy hiɗi hiɗiyta vi Zohelet, ta ka gal En-Rogel; ɓosiyomna gurona vi mulla kaf nam nam yisi aya, hiɗi sumuna vi Yuda sa ka sun mulla kafe. 10May Natan ma jobta, Benaya, sum sa donona hiɗi goor-bulumna Salomon kaw nam min vulsi yit noŋɗi.
11Ki kayn nala Natan di tam Bat-Seba sum Salomon: Wulini Adoniya goora vi Haggit tun tuwamawa mulu bay mulla David hum kayni, nak humi lebo humiɗi su? 12Wulin kayn nagaya, nan min ɗekag yali: Kay nak ma suɗ irita vagu hiɗi irita vi goora vag Salomon kaw. 13Nak ma tuɗ kalaf tam mulla David, nak ma dum ala: He! Mulla vanu, naŋ yi va kaŋ vokan ala goora vaŋ Salomon ma ti mulda bugoloŋu, nam ma mus kay zlamda-mulda vaŋu ɗisu? Wulini Adoniya ka ti mul kayn kay mige? 14Humagu, hay li ma nak ka law hiɗi mulla kayni, nan kay tuwan ma kalays kalaf bugolagu, nan ma hob vun dita vagu.
15Bat-Seba kal kalaf hay ziyda vi mulla. Nam muɗi maar ŋolo; Abisak ta Sunamitta ka sunumu may. 16Bat-Seba dab voka' gaa'a girif mulla. Mulla di ta'a: Nak minim mige? 17Na' hot dumu: Mulla vanu, naŋ yi va kaŋu vokanu hay sem Ma-Vatɗina Lawna vaŋu, naŋ di ala Salomon goora vaŋu ma ti mulda hay baŋalaŋu, nam ma mus kay zlamda-mulda vaŋu. 18May wulin kayni saraŋ tige, Adoniya ka ti mulda, may naŋ mulla bay wi kayni. 19Wulin kayni nam ŋat luwayna, guro-luway ma jakayna hiɗi fok-dimin ŋolo; gurona vaŋu nam vulsi yit kafe, nam yi Abiyatar mul-ma-ɗifinna hiɗi Yowab ma ŋolla vi sojena, may Salomon ma sunda vaŋu nam min vulum yitɗi. 20Wulin kayni mulla vanu, sum sa Israyella irsi cuki kaf lakŋi kaŋ naŋu, kay naŋ ma ɗeksi kay sa ma mus baŋalaŋ hay mulda. 21Hay li ma naŋ mitawa kuɗ sumiyaŋu ni, nan hiɗi goora vaŋu nisi ɗawn ma lasma ki numa si sum sa li va ma joo nala.
22Hay li ma na' ka law hiɗi mulla tuwa zaw kayni, Natan ma jobta co'o. 23Nisi di tam mulla ala: Humaŋu, Natan ma jobta ka'a. Nam kal kalaf tam mulla, dab vokom gaa kay nagat vok mulla. 24Natan di'e: He! mulla vanu, naŋ waŋŋi mi ma di ala Adoniya ma ti mul bugolaŋu, nam ma mus kay zlamda-mulda vaŋuna ɗisu? 25Kay vayɗi nam kalay ɗawni, nam ŋat luwayna, ŋat guro-luway ma ɗorayna, ŋat fok-dimin ŋolo kaw; nam vul yit mi gurona vaŋ kafe, sa ŋulona vi sojena, hiɗi mul-ma-ɗifinna Abiyatar kaw. Wulin nisi ka tokay talamu, ka ti'e ci'e kaw, nisi ka di ala: Mulla Adoniya mus iri musge. 26May nan ma sunda vaŋ damni nam min vulan yitɗi, nam min vul yit mi mul-ma-ɗifinna Sadokɗi, Benaya goora vi Yehoyada nam min vulum yitɗi, Salomon ma sunda vaŋɗi kaw. 27Mulla, la van kayni hinim li mi naŋu, sa ma sunda vaŋu ma mus bugolaŋ hay mulda ɗawni naŋ min dumɗi kay mige?
28Mulla David hot dita: Yangi Bat-Seba, na' kalay kalafi, col vok mulla. 29Nala mulla yi va kalamu, nam ka di ala: Ma-Vatɗina ma butan goy vun zlat kafna ka iriya. 30Ki nan yi va kanu vok iragu hay sem Ma-Vatɗina Lawna vi Israyel ala: Salomon goora vagu ma ti mulda bugolan ɗawn mi namu, nam ma mus kay zlamda-mulda vanu hay baŋalanu, vayɗi nan ma li slen ki kayn nala. 31Bat-Seba dab voka' gaa kay nagata, na' girif mulla. Na' di'e: Mulla vanu David, musaŋ iri ta-ta musge.
David vilek Salomon kay vurna baŋalam hay mulda
1 Lml 29:21-25
32Mulla David di'e: Nigi ma yan mul-ma-ɗifinna Sadok, Natan ma jobta hiɗi Benaya goora vi Yehoyada. Nisi kalay kalaf tam mulla. 33Mulla di tisiya: Yawgi sa sunda van kuɗgiya, goora van Salomon nigi ma ɓem kulo kay kulumta vanu, nigi ma naram hay Gihon. 34Ɗawni mul-ma-ɗifinna Sadok hiɗi Natan ma jobta ma ɦok mul kalamu kay nam ma ti mulda kay sa Israyella. Nigi ma buw togolomna, nigi ma di ala: Mulla Salomon mus iri musge. 35Nigi ma tuɗgiyay bugolomu, nam ma co' mus kulo kay zlamda-mulda vanu, nala nam ma ti mulda hay baŋalanu. Kuɗ va ma nan dum dina, ma ti mulda kay Israyel hiɗi Yuda ɗawn mi namu. 36Benaya goora vi Yehoyada hot dit tam mulla: Amen! Ma-Vatɗina Lawna vi mulla van di ki kayn nala! 37Ma-Vatɗina ma li hiɗi Salomon ki nam li hiɗi mulla van nala kaw, hinim muɗ mulda vi Salomon ŋol suw faŋga lo muɗge.
38Ki kayn nala mul-ma-ɗifinna Sadok kaliya hiɗi Natan ma jobta, hiɗi Benaya goora vi Yehoyada, sa Keretiyena hiɗi sa Peletiyena; nisi ɓe Salomon kulo kay kulumta vi David, nisi kalam hay Gihon. 39Mul-ma-ɗifinna Sadok kal hay guɗukŋa, nam sli miyok ma mul hayamna, ɦokom kay Salomon. Nisi buw togolomna, sumun kaf ka di ala: Mulla Salomon mus iri musge. 40Sumun kaf tuɗay bugolomu, nisi ka buw zlekemna, ka firi ŋolo; nagat ka wira kay ciriyna visiya.
41Hay li ma Adoniya hiɗi sum sa nam vulsi yitna ɓisi vat hiɗi fu ma tin kayni, labar winekŋ co tisiya may. Yowab hum buwna vi togolomna, nam di'e: Winekŋa ka patay kulo ŋolo hay hoyok-ziyna kayn kay mige? 42Hay li ma nam ka law tuwa dam kayni, Yonatan goora vi Abiyatar mul-ma-ɗifinna cooya. Adoniya dumu: Naŋay goboyo, kay naŋ mi sa ma gaŋaya, naŋ vi labar ma ŋaa'a. 43Yonatan hot dit mi Adoniya ala: Awa, mulla vay David tun Salomonawa mulu. 44Mul-ma-ɗifinna Sadok hiɗi Natan ma jobta, Benaya goora vi Yehoyada, sa Keretiyena hiɗi sa Peletiyena kaw nam cuksi kuɗumu, nisi ɓem kulo kay kulumta vi mulla. 45Mul-ma-ɗifinna Sadok hiɗi Natan ma jobta ɦok mul kalamu, nisi tunum mulu hay Gihon. Hay ɗawn pa nisi hotay vo hiɗi firita ŋolda, hoyok-ziyn ka firi ŋolo: Kayn mi winek ma nigi ka humumna, 46Salomon kaw musi kay zlamda-mulda vatiya. 47Sa sunda vi mulla kaw cooya kay gi bol kay mulla vay David, nisi ka di ala: Lawn muɗ semda vi Salomon tiy ŋolo suw semda vaŋ muɗge, hinim muɗ mulda valam ŋol suw faŋga muɗge. Kulo kay va ma buura valam waŋ' kaw, mulla David dab vokom gaa'a. 48Mulla kay tuwam lo hot di ala: Suburta tam Ma-Vatɗina Lawna vi Israyel, nam ma vulan sa mara vaydi kay vurna hay baŋalanu, nam vulan liyna kaw nan ma wi sa namna hiɗi iranu. 49Nala sum sa Adoniya vulsi yitna narta kal hay diksiya; nisi yaway kulo'o, gigekaw tun iram hay liyna valamu valamu. 50Adoniya tun caw li nari kay Salomon, nam mok miyokŋa vi giwin-ma-ɗifinna kalamu.
51Nisi co'o di tam Salomon ala: Humaŋu, Adoniya tuwam nar kaŋu, nam mok miyokŋa vi giwin-ma-ɗifinnawa kalamu, nam ka di ala: Hin mulla Salomon yi va kalam vaydi ala nam as can goy hiɗi kew-gaferaŋaɗi. 52Salomon di'e: La nam ɗek tuwam goy ki sa ma ɗiger nala, ɗuŋus ma kalam kep kaw as nig gaaɗi, may la joot ka hay dikamu, nam ma mita. 53Nala mulla Salomon cuk sumuna, nisi jikimay gaa kay giwin-ma-ɗifinna pa. Nam co'o girif gaa vok Salomon. Salomon dumu: Tuɗaŋ vo hay ziyna vaŋ maŋ yo.
Currently Selected:
1 MULIYANA 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001