1 YOHANA 2
2
1Gurona vanu, nan ɗo van kayni tigiya, kay nigi ma li sulukɗi. La sa li sulukawa, sa ma kot lawt kayna ka kat bumna, kayni mi Yesu Kristu ma ɗigera. 2Namu mi ɦu ma poora kay sulukŋa vaya, may kay sulukŋa vay nay kepɗi, kay sum sa kay nagat kafe.
Minda jar ɓosiyom-tuwsina
Yoh 13:34-35
3Kuɗ kayni nay wi ala nay wumu, la nay hum kuɗ vun-ma-gatna valamu. 4La san di ala: Nam wumu may hum kuɗ vun-ma-gatna valamɗina, nam mi sa ma sinda, gasita tay hayamɗi. 5May sa ma hum kuɗ yoboyna valamu, minda vi Lawna asay goy hayam ŋaa'a ŋolo. Kayni mi va ma ɗek ala nay viy hayamuna: 6Sa ma li di-goyt ala nam ka hay namu, nam ma poy ki Bum-Sumuna poy nala kaw.
7Nigi sa hayan kigina, nan ɗo tigi kayni may mi vun-ma-gatna ma wuliɗi, may vun-ma-gatna ma busayna ma ay kigi jew ɓa-ɓana; vun-ma-gatna namna ma ɓa-ɓana kayni mi yoboyn ma nigi humumna. 8Nir na'ta kepe nan ɗom tigi kayni mi vun-ma-gatna ma wuliya; kayni ti gasita kalam namu, kigi nigi kaw, kay jufunda as capa, haraŋ ma gasina ka wile wulini.
9La san di ala nam ka hay haraŋa, may ka gawt tam ɓasulumna ni, nam ka hay jufunda tuwa. 10Sa ma min ɓasulumna mus hay haraŋa, nam as puk sa gaaɗi. 11May sa ma ka gawt tam ɓasulumna nam ka hay jufunda, nam poy hay jufunda kaw, liyn ma nam tuɗ hayamna nam wumɗi, kay jufunda dukum iramawa.
12Nan ɗoowa tigiya gurona vanu, kay sulukŋa vigi cukawa goyo kuɗ semda valamu. 13Nan ɗoowa tigiya nigi sumayna, kay nam ma ay hay cawa'ta tunit pana nigi wumu. Nan ɗoowa tigiya nigi joriyona, kay mige nigi kolawa kay ma joona.
14Nan ɗoowa tigiya gurona vanu, kay mige nigi wi bumnawa. Nan ɗoowa tigiya nigi sumayna, kay nigi wi nam ma ay hay cawa'ta tunit pa. Nan ɗoowa tigiya nigi joriyona, kay donota vigi ka'a, yoboyna vi Lawna mus haygiya kaw, kay nigi kolawa kay ma joona.
15Mingi nagatɗi, slen ma hay nagatɗi kaw. La san min nagata, minda vi bumna may hayamɗi, 16kay sle ma ka hay nagat petna, darta vi sliw-tuwna, darta vi ira hiɗi subur-tuwta kay slena vi nagata, kayni may vi bumnaɗi, may vi nagata. 17Nagata ma vat goyo hiɗi darta va'a, may sa ma li minda vi Lawna, nam ma mus ta-ta hay vatɗita.#2:17 Ɗuw hay Nul 39:7; Lmn 23:5; Smk 1:2-3; 1 Kor 7:31.
Sa anti-kristuwayna
Yoh 16:13-15
18Gurona vanu, liyn ma cawna ka wulini, ki nigi hum ala anti-kristuwayna ka ma'a, wulini kaw anti-kristuwayn ŋolo ka yaway kulo'o:#2:18 Sa anti-Kristuwayna kayni si sa gaw kay Kristu. 19Nisi cukay goy jaray pa, may nisiya si sa faynɗi, kay la nisi si sa fayna, nisi lak ɗawni hiɗi naya, may nisi kalay goyo, kay van kayni ma li goy haraŋ ala nisi si sa fayn kafɗi.
20May nigiya, nigi ka hiɗi mul ɦoki kigiya kuɗ nam ma peldetna, nigi ka hiɗi wida kay slen kaf. 21nan ɗoowa tigiya, may ala nigi wi gasitɗi naɗi, may kay nigi wi gasita, kay sinda may hay gasita noŋɗi.
22Sa ma sinda mi gige? Mi sa ma puw vunam ala Yesu may mi Kristuɗina naɗi su? Kayni mi anti-kristu, ma puw vunam kay bumna hiɗi goora. 23Gigekaw ma puw vunam kay goora, namu bumna may hayamɗi, sa ma di goy kay goora, bumna ka hayamu.
24May nigiya, va ma nigi humumay hay tun cawta pana hinim mus haygiya, la va ma nigi humum hay jew pana mus haygiya, nigi ma lak hay Bumna, hay Goora kaw. 25Kayni mi va ma nam deŋ taya: Irita vatɗita.
26Slen kayni nan ɗomawa tigiya kay sum sa ɗutgi goyna. 27May nigiya, hin mul ma nam ɦokom kigina mus kigiya, nigi may gar kay sa hatgi loɗi; kay mige mul ma nam ɦokom kigina hatgi kay slen pet, kayni ti gasita, may ti sindaɗi, lakgi hay namu ki nam hatgi nala.
Gurona vi Lawna
Rom 8:14-19
28Wulini, gurona vanu, lakgi hay namu, kay hay li ma nam ɗek tuwamawa goyo, nay ma vi gasi ala, hay mata valamu nay ma muɗ goy zulo'o vokomɗi. 29La nigi wi ala nam ka ɗigere, nigi ma wi ala gigekaw ma li ɗigerta vuɗum mi namu.
Currently Selected:
1 YOHANA 2: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001