Miqueas 1
1
Samaria llaqta castigasqa kananmanta
1 # 2 R 15.32-38; 2 Cr 27.1-7. # 2 R 16.1-20; 2 Cr 28.1-27. # 2 R 18.1—20.21; 2 Cr 29.1—32.33. Judá nacionpi rey Jotam, rey Acaz hinaspa rey Ezequías munaychakuchkaptinkum, Moreset llaqtayuq Miqueasta visionpi Tayta Dios rimapayarqa, Samaria llaqtatawan Jerusalén llaqtata imam pasananmanta.
2Kay pachapi llaqtakuna uyariychik,
kay nacionpi runakuna uyariychik.
Tayta Diosyá, Tukuy Atiyniyuq Señoryá,
chuya templonmantapuni
contraykichikpi testigo kachun.
3Tayta Diosmi maymi kasqanmanta lloqsimuchkan,
uraykamuspanmi kay pachapa hawanta puririmuchkan.
4Ninapi chulluchisqa vela hinam orqokunapas
chakinpa ukunpi chullurunqa.
Achka yakupa wayqorusqan hinam
qechwakunapas rakinakunqa.
5Kaykunaqa pasakunqa
Jacobpa mirayninkuna mana kasukusqanmantam,
Israelpa mirayninkunapa huchanmantam.
¿Imataq Jacobpa mana kasukuynin?
¿Manachum Samaria llaqta?
¿Maytaq Judá nacionpa huchallikunan capillakuna?
¿Manachum Jerusalén llaqta?
6Chayraykum Tayta Dios kaynata nin:
Samaria llaqtata purmarachispaymi
uvas tarpuna allpamanña tikrarusaq,
ruminkunatapas qechwaman wikaparuspaymi
cimientonkunatapas rikurirachisaq.
7Idolonkunapas ñutupasqam kanqa,
yupaychanan kullukunapas kañasqam kanqa.
Chaykunaqa chuchumika kaspan ganakusqan qollqewan ruwasqam karqa,
chayraykum huktawan chuchumikapa qollqenman tikrasqa kanqa, nispa.
Miqueaspa waqasqanmanta
8Hinaptinmi nirqani:
Hatun llakikuywanchá waqapakusaq,
qala chakillachá purisaq,
mana pachayuqchá purisaq,
atoqkuna hinachá allwasaq,
avestruzkuna hinachá qaparkachasaq.
9Samariapa heridanqa mana hampiy atinam,
chay heridanmi Judá nacionkamaña chayarun,
yachanay llaqtapa punkunkamañam,
Jerusalén llaqtapa punkunkamañam chayarun.
10Amayá chayta Gat llaqtaman willaychikchu,
ama llumpayta waqaychikchu.
# 1.10 Hebreo simipi Bet-le-afra ninanqa: “Polvopa kanan” ninanmi. Bet-le-afra llaqtapa putyanpiyá nanaywan qochpaychik.
11Safir llaqtapi yachaqkuna,
penqakuypaq qalalla ayqeychik.
Zaanán llaqtapi yachaqkunapas
manam lloqsinqakuchu.
Bet-esel llaqtapipas waqayllañam kachkan,
chayraykum mana yanapasunkichikmanchu.
12Marot llaqtapi yachaqkunapas
allinyayta maskaspankum qewipakuchkanku,
Tayta Diosmi Jerusalenpa punkunman
ñakariyta kachaykamun.
13Laquis llaqtapi yachaqkuna,
qamkunam Sionpi yachaqkunata huchallichirqankichik,
carretaykichiktayá caballokunaman wataychik.
14Chayraykum Moreset-gat llaqtaman doteta qonkichik.
Aczib llaqtapi wasikunapas
Israelpa reyninkunapaqmi trampaña kanqa.
15Tayta Diosmi kaynata nin:
Maresa llaqtapi yachaqkuna,
qamkunapa contraykichikpim
ñakarichisuqnikichikta yapamanta pusamusaq,
hinaptinmi Israelpi allinnin qarikunapas
Adulam orqopi machaykunaman ayqenqaku.
16Jerusalenpi yachaqkuna,
wawa-churikichikmanta qaparkachaspa
barbaykichikta rutukuychik,
ullachku hina paqla uma kanaykichikkama
umaykichiktapas ruturachikuychik,
ancha kuyasqaykichik wawa-churikichikmi
karu llaqtakunaman preso apasqa kanqaku.
Currently Selected:
Miqueas 1: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012