Juan 17
17
Discipulokunapaq Jesuspa mañakusqanmanta
1Jesusmi chaykunata niruspan hanaq pachata qawarispan nirqa:
Taytáy, ñam hora chayaramunña. Churikitaqa hatunchawayñayá chaynapi qamtapas kay Churiki hatunchasunaykipaq. 2Qanmi atiyta qowarqanki llapallan runapi munaychakunaypaq, chaynapi qowasqayki llapallan runakunaman wiñay kawsayta qonaypaq. 3Wiñay kawsayqa kaymi: Sapallan cheqap Dios kasqaykita hinaspa kachamusqayki Jesucristota reqsiymi.
4Ñoqam kay pachapi hatuncharqayki, kamachiwasqayki ruwaytapas ñam tukuruniña. 5Taytáy, kunanyá ñawpaqnikipi hatunchaway, chayna hatunchasqam karqani manaraqpas kay pacha kachkaptin.
6Kay pachamanta qowasqayki runakunamanqa ñam willaniña pim kasqaykita. Paykunaqa qampam karqa chaymi qowarqanki, paykunaqa palabraykitam kasukunku. 7Kunanqa yachankuñam tukuy ima qowasqaykiqa qampa kasqanta. 8Qowasqayki palabraykitaqa willaruniñam paykunaqa ñam chaskirunkuña. Yachankutaqmi cheqaptapuni qanmanta hamusqayta, hinaspam creenku qampuni kachamuwasqaykita.
9Ñoqaqa paykunapaqmi ruegakuyki, manam kay pachapi wakin runakunapaqwanchu, aswanqa qowasqallaykipaqmi, paykunaqa qampam. 10Tukuy ima kapuqniyqa qampam, qampa kaqñataqmi ñoqapa, tukuy chaykunapim ñoqaqa hatunchasqa kani.
11Manañam kay pachapiñachu kasaq, paykunam ichaqa kay pachapiraq kanqaku, ñoqam ichaqa hamuchkaniña qanwan kuska kanaypaq. Chuya Taytáy, qowasqaykikunataqa atiynikiwanyá waqaychaykuy chaynapi ñoqanchik hina huklla kanankupaq. 12#Sal 41.9.Paykunawan kay pachapiraq kaspayqa atiyniyuq sutikipim nanachikurqani, qowasqaykikunataqa allintam waqaycharqani, manam mayqanllanpas chinkarqachu, ichaqa chinkananpaq kaq runallam, chaynapi Qellqapa nisqan cumplikunanpaq.
13Kunanqa qampa kasqaykimanmi hamuchkaniña. Kay pachapiraqmi nichkani kaykunataqa ñoqapa kusikuyniywan huntasqa kanankupaq. 14Ñoqam palabraykita willarqani, chaymi runakunañataq cheqninku, paykunaqa manam kay pachapaqchu kanku, ñoqapas manataqmi kay pachapi kaqchu kani. 15Mañakuykiqa manam kay pachamanta hurqonaykipaqchu aswanqa diablomanta waqaychanaykipaqmi. 16Ñoqaqa manam kay pachapaqchu kani, paykunapas manataqmi kay pachapaqchu kanku. 17Cheqap kaynikiwanyá chuyanchay, palabraykiqa cheqapmi. 18Imaynam ñoqata kachamuwarqanki kay pachapi kaq runakunaman, chaynataqmi paykunatapas kay pachapi kaq runakunaman kachani. 19Paykunaraykum kikiypuni chuyanchakuni, chaynapi paykunapas cheqap palabraykiwan chuyanchakunankupaq.
20Manataqmi ñoqaqa paykunallapaqchu mañakuyki, aswanqa paykuna ñoqamanta willakuptin iñiqkunapaqwanmi. 21Taytáy, mañakuchkaykiqa paykuna huklla kanankupaqmi, imaynam qanwan huklla kasqanchikpi hinayá paykunapas huklla ñoqanchikwan kachunku, chaynapi qampa kachamuwasqaykita runakuna creenankupaq. 22Hatunchawasqaykiman hinam ñoqapas paykunata hatuncharqani, chaynapi qanwan huklla kasqanchikpi hina paykunapas huklla kanankupaq. 23Ñoqam paykunapi kachkani, qamñataqmi ñoqapi, chaynapi paykunaqa hukllaña kanankupaq, chaynapim runakuna yachanqaku qampuni kachamuwasqaykita, yachanqakutaqmi kuyawasqaykita hina paykuna kuyasqaykitapas.
24Taytáy, qanmi qowarqanki paykunata chaymi munani paykunapas ñoqapa kasqaypi kanankuta, chaynapi hatunchawasqaykita qawanankupaq. Manaraqpas kay pacha unanchasqa kachkaptinmi qamqa kuyawarqankiña. 25Chuya Taytáy, kay pachapi kaq runakunaqa manam reqsisunkichu, ñoqam ichaqa reqsiki, qowasqayki runakunapas yachantaqmi qam kachamuwasqaykitaqa. 26Yachachirqanim pim kasqaykita, chaywanpas hinallaraqmi yachachisaq, chaynapi kuyawasqaykiman hina paykunapas kuyanakunankupaq chaynataq ñoqapas paykunapi kanaypaq, nispa.
Currently Selected:
Juan 17: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012