Juan 14
14
Jesusqa Taytaman chayanapaq ñan kasqanmanta
1Amayá songoykichikqa hukmanyachunchu. Diospiyá creeychik, creeychiktaqyá ñoqapipas. 2Taytapa kasqanpiqa achkam yachanapaq kachkan, mana chayna kaptinqa nikichikmanchá karqa, rispaymi qamkunapaq maypi yachanaykichikpaq allichamusaq; 3allicharamuspayñataqmi huktawan kutimusaq qamkuna pusanaypaq, chaynapi maymi kasqaypi qamkunapas kanaykichikpaq; 4Qamkunaqa yachankichikmi mayman risqaytapas, reqsinkichiktaqmi ñantapas, nispa.
5Tomasñataqmi nirqa:
Señorlláy, manam yachanikuchu mayman risqaykitapas chaynaqa ¿imaynataq ñantaqa reqsiymanku? nispa.
6Jesusñataqmi nirqa:
Ñoqam kani ñan, cheqap kaqpas chaynataq kawsay qokuqpas. Taytaymanqa manam pipas chayanmanchu mana ñoqantakamaqa. 7Reqsiwaspaykichikqa Taytaytapas reqsiwaqchikchá, kunanmi reqsiykunkichik hinaspa rikuykunkichik, nispa.
8Felipeñataqmi nirqa:
Señorlláy, Taytata qawaykachiwaptikikuqa chayllapaqñam kaniku, nispa.
9Jesusñataqmi nirqa:
Felipe, unayñam qamkunawanqa kachkani. ¿Manaraqchu reqsiwanki? Ñoqata rikuwaqniyqa Taytatapas rikuykunñam. ¿Imanasqamá niwanki “Taytata rikuykachiwayku”, nispaykiqa? 10¿Manachu creenki Taytaywanqa huklla kasqayta? Imatapas nikichikqa manam kikillaymantachu, ñoqawan kaq Taytam kikinpa ruwanantaqa ruwan. 11¿Manachu creenkichik ñoqaqa Taytapi kasqayta, Taytañataq ñoqapi kasqanta? Mana chayqa imakuna ruwasqaykunawanyá creewaychik. 12Cheqaptapunim nikichik, ñoqapi creeqqa ruwanqam ñoqapa ruwasqaykunata, payqa ñoqapa ruwasqaymantapas aswan hatun kaqkunataraqmi ruwanqa, chaynataqa ruwanqa Taytamanña risqayraykum. 13Imatapas sutiypi Taytata mañakuptikichikqa ruwasaqmi, chaynapi Taytapas Churinpi hatunchasqa kananpaq. 14Sichum imatapas sutiypi mañakuptikichikqa ruwasaqmi.
Chuya Espirituta kachamunanpaq prometekusqanmanta
15Kuyawaspaykichikqa kamachikuyniykunatayá kasukuychik. 16Hinaptinqa mañakusaqmi Taytata huk kallpanchaqnikichikta kachamusunaykichikpaq. Paymi qamkunawan tukuy tiempo kanqa. 17Cheqap Espiritutaqa kay pachapi kaqkunaqa manam chaskinmankuchu, paykunaqa manam rikunkuchu nitaqmi reqsinkuchu. Qamkunam ichaqa reqsinkichik qamkunawan kasqanrayku, payqa qamkunapitaqmi kanqa. 18Manam sapallaykichiktachu saqerusqaykichik, qamkunamanmi kutimusaq. 19Asllatawanqa kay pachapi runakunaqa manañam rikuwanqañachu, qamkunam ichaqa rikuwankichikraq, qamkunaqa kawsasqayraykum kawsankichik. 20Chay punchawpim yachankichik Taytaypi kasqayta, qamkunañataq ñoqapi, ñoqañataq qamkunapi. 21Kamachikuyniykunata yachaspa kasukuq runaqa kuyawanmi, Taytaypas kuyanqam chayna kuyaqniytaqa. Ñoqapas kuyaspaymi reqsichikusaq paywan.
22Chaymi Judas (mana Iscariote kaqchu) nirqa:
Señorlláy ¿imanasqataq ñoqaykumanqa reqsichikunki aswanqa mana wakin runakunamanchu? nispa.
23Chaymi Jesusñataq nirqa:
Kuyawaqniyqa palabraykunatam kasukun, paytaqa Taytaypas kuyanqam, Taytaywan hamuspaymi kuyawaqniywanqa yachasaqku. 24Mana kuyawaqniyqa manam palabraykunatapas kasukunchu. Qamkunaman nisqaykuna uyarisqaykichikqa manam ñoqapachu aswanqa kachamuwaqniy Taytaypam.
25Kaykunataqa nikichik qamkunawan kaspayraqmi. 26Kallpanchakuq Chuya Espíritu ñoqapa sutiypi Taytaypa kachamusqanmi, ichaqa qamkunaman tukuy imata yachachisunkichik, hinaspam tukuy ima nisqaykunata yuyachisunkichik.
27Hawkayaytam saqekichik, hawkayayniytam qoykichik, kay hawkayay qosqayqa manam runakunapa qosqan hinachu. Amayá hukmanyaychikchu nitaq manchakuychikpaschu. 28Ñam uyarirqankichikña: “Riruspaymi kasqallan kutimusaq qamkunawan kanaypaq nisqayta”. Cheqapta kuyawaspaykichikqa Taytaman risqaywanqa kusisqachá kawaqchik, ñoqamantaqa payqa mayormi. 29Kaykunataqa nikichik manaraq imapas pasakuchkaptinmi, pasakuruptinñataq creenaykichikpaq.
30Qamkunawanqa manañam unayñachu rimasaq, ñam hamuchkanña kay pachapi kamachikuq. Payqa manam imaniraqllatapas ñoqamantaqa munaychakunchu. 31Ichaqa hinam chayna kanan, chaymi runakuna yachanqa Taytapa kuyawasqanta, yachanqakutaqmi ñoqaqa paypa kamachiwasqan ruwasqaytapas.
Hatariychik, kaymanta hakuchik.
Currently Selected:
Juan 14: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012