Juan 12
12
Jesuspa chakinman perfume talliq warmimanta
(Mt 26.6-13. Mr 14.3-9)
1Pascua fiestapaq soqta punchawllaña faltachkaptinmi Jesús rirqa Lazaropa yachasqan Betania llaqtaman. Paytam wañusqamantaña Jesús kawsarirachirqa. 2Jesuspaq convidota ruwaptinkum Marta servirqa, Lazaroñataqmi Jesuswan mesapi tiyachkarqa. 3#Lc 7.37-38.Mariañataqmi achka precioyuq nardomanta ruwasqa perfumeta yaqa huk botellata aparamuspa Jesuspa chakinman talliykuspan chukchanwan chakichirqa. Chaymi wasi huntata miskillataña asnarirqa. 4Discipulonkunamanta traicionaqnin kaq Judas Iscarioteñataqmi nirqa:
5Kay perfumetaqa huk wata jornalpa chanin qollqepichiki rantikurunmanku karqa hinaspa wakchakunata yanapanmanku karqa, nispa.
6Judasqa chaynataqa nirqa manam wakchakunata llakipayasqanraykuchu, aswanqa suwa kaspanmi, paymi qollqe waqaychaq karqa, hinaspanmi qollqe qosqankumanta hurqokuq.
7Chaymi Jesusñataq nirqa:
Ama harkakuychu, kaytaqa pampakunay punchawpaqmi waqaycharqa. 8#Dt 15.11.Wakchakunaqa qamkunawanmi haykapikamapas kanqaku, ñoqam ichaqa mana tukuy tiempochu qamkunawan kasaq, nispa.
Lazarota wañurachiy munasqankumanta
9Achkaq judiokunam yacharurqaku Betaniapi Jesús kasqanta, hinaspam rirqaku Jesustawan wañusqanmanta kawsarimuq Lazarota qawamunankupaq. 10Llapa sacerdotekunapa kamachiqninkunaqa tanteanakururqakutaqmi Lazarotapas wañurachinankupaq, 11Lazaropa causanpi achka judiokuna paykunamanta rakikuspanku Jesusman iñikusqankurayku.
Jerusalenman Jesuspa yaykusqanmanta
(Mt 21.1-11. Mr 11.1-11. Lc 19.28-40)
12Paqarinnintintam Pascua fiestaman achkallaña riqkuna yacharurqaku Jerusalenman Jesuspa risqanta. 13#Sal 118.25.#Sal 118.26.Paykunam palmerapa kallmankunata kuchuspanku Jesusta chaskinankupaq rirqaku, hinaspankum kaynata qaparirqaku:
¡Yupaychasunchik! ¡Qapaqchasqayá kachun Señorpa sutinpi hamuq Israelpa Reyninqa! nispanku.
14Jesusmi malta asnota tariramuspa sillakaramurqa, Chuya Qellqam kaynata nin:
15 #
Zac 9.9. “Sión llaqtapi yachaqkuna,
ama manchakuychikchu,
Reynikichikmi malta asnopi sillada hamuchkan”, nispa.
16Discipulonkunaqa manaraqmi entienderqakuchu chaykunataqa. Hanaq pachaman Jesús kutikuptinñam yuyarirqaku chaykunaqa ñawpaqmantaraq qellqasqaña kasqanta, yuyarirqakutaqmi Jesuspaq chaykuna ruwasqankutapas.
17Lazarota Jesuspa kawsarirachisqan rikuqkunam willakurqaku sepulturamanta qayaykuspa kawsarirachisqanta. 18Chayraykum runakuna tariparqaku Jesusman chay milagro ruwasqanta yachaspanku. 19Fariseokunañataqmi ninakurqaku:
Manam ima ruwaytapas atichwanchu, qawaychik llapa runakunam payta qatichkanku, nispanku.
Jesusta Grecia nacionniyuq runakuna maskasqankumanta
20Pascua fiestaman riqkunam karqa wakiqnin Grecia nacionmanta kaqkuna. 21Paykunam Felipeman asuykurqaku, Felipeqa yacharqa Galilea lawpi Betsaida llaqtapim. Paytam ruegakurqaku:
Señor, reqsiykuytam munaniku Jesusta, nispanku.
22Felipeñataqmi rirqa Andresman willaq, hinaptinmi iskayninku Jesusman willaq rirqaku. 23Jesusmi nirqa:
Ñam tiempoña runapa Churin hatunchasqa kananpaq. 24Cheqaptapunim nikichik, allpaman huk trigo wichispa mana wañuspanqa hina kaqllam kanqa, wañuspanmi ichaqa achkallataña rurunqa. 25#Mt 10.39; 16.25; Mr 8.35; Lc 9.24; 17.33.Pipas vidallan kuyaqqa wiñaypaqmi pierdenqa, pipas kay pachapi vidan cheqniqñataqmi wiñay kawsananpaq waqaychasqa kanqa. 26Pipas serviwayta munaspaqa qatiwachunyá, payqa ñoqapa kasqaypim kanqa, serviwaqniytaqa Taytaymi ancha reqsisqata ruwanqa.
Wañunanmanta Jesuspa willakusqanmanta
27Kunanmi almay hukmanyasqa kachkan. Chaynaqa, ¿imanisaqtaq? ¿Icha: “Taytáy, salvaykuway kay ñakariymanta” nispachu nisaq? Ñoqaqa kaynata ñakarinaypaqmi kunan hamurqani. 28Chaynaqa, Taytáy, ¡sutikitayá hatunchayña! nispa.
Chaymantam hanaq pachamanta huk qapariy uyarikamurqa:
Ñam hatuncharuniña, chaywanpas huktawanraqmi hatunchasaq, niq.
29Chaypi kaq runakunañataqmi uyarispanku nirqaku:
Rayom toqyaramun, nispanku.
Wakiqninñataqmi nirqaku:
Huk angelmi rimapayaykamun, nispanku.
30Jesusñataqmi nirqa:
Kay qayakuytaqa uyarirunkichik manam ñoqaraykuchu aswanqa qamkunaraykum. 31Kunanmi kay pachapi kaqkuna juzgasqa kanqa, qarqosqataqmi kanqa kay pachapi kamachikuqpas. 32Ñoqañataqmi chakatawaptinku llapallanta kikiyman pusamusaq.
33Kaynata nispanmi entiendechirqa imaynam wañukunanmanta. 34#Sal 110.4; Is 9.7; Ez 37.25; Dn 7.14.Runakunañataqmi nirqaku:
Leypiqa uyarirqaniku: “Cristoqa wiñaypaqmi kawsanqa” niqtam. ¿Imaynataq qamqa ninki: “Runapa Churinqa cheqaptapunim chakatasqa wañunqa”, nispaykiqa? ¿Pitaq runapa Churinqa? nispanku.
35Jesusñataqmi nirqa:
Achkiyqa as punchawllapas qamkunawanraqmi kanqa, chaynaqa achkiypiyá puriychik qamkunawanraq kachkaptiyqa, chaynapi tutayay mana vencerusunaykichikpaq. Pipas tutayaypi puriqqa mayman risqantapas manam yachanchu. 36Qamkunawanraq achkiy kachkaptinqa achkiymanyá iñiychik, chaynapi achkiypa churinkuna kanaykichikpaq.
Kaykunata niruspanmi pasakuspan Jesús paykunamanta pakakururqa.
Jesusman mana iñiq judiokunamanta
37Achkallaña milagrokunata ruwachkaptinpas Jesuspiqa manam creerqakuchu. 38#Is 53.1.Chaynapim profeta Isaiaspa nisqan cumplikurqa. Paymi nirqa:
Señorlláy, willakusqaykutaqa ¿pitaq creerqa?
Señorqa ¿pimantaq atiynintaqa reqsichirqa? nispa.
39Manam pipas creeyta atirqachu. Isaiasqa qellqarqataqmi:
40 #
Is 6.10. Runakunatam Dios ñawsayarachirqa,
paykunapa sonqontam rumiyachirqa
chaynapi mana rikukunankupaq,
chaynapi mana entiendenankupaq,
chaynapi mana kutirikamuwanankupaq,
chaynapi mana sanoyachinaypaq, nispa.
41Chaynataqa Isaiasqa nirqa, Jesuspa kanchariyninta rikuspanmi, chaymi paymanta rimarqa.
42Chaywanpas achkaq kamachikuq judiokunam Jesusman iñirqaku. Ichaqa fariseokunata manchakusqankuraykum mana libretachu willakuqku, chaynapi sinagogamanta mana wischusqa kanankupaq. 43Chay kamachikuq judiokunaqa runakunapa alabasqan kaytam munarqaku, manam Diospa hatunchasqan kaytachu.
Jesuspa rimasqanman hina runakuna juzgasqa kananmanta
44Jesusmi hatunmanta qaparispa nirqa:
Pipas ñoqaman iñiqqa manam ñoqallamanchu iñin, aswanqa kachamuwaqniy Taytaymanwanmi. 45Ñoqata rikuwaqniyqa kachamuwaqniytapas rikuntaqmi. 46Ñoqa achkiymi kay pachaman hamurqani, chaynapi pipas ñoqapi iñiqqa manaña tutayaypi kananpaq. 47Pipas palabraykunata uyarispan mana kasukuqtaqa manam ñoqachu juzgasaq, ñoqaqa hamurqani manam runakunata juzganaypaqchu, aswanqa salvanaypaqmi. 48Pipas ñoqata wischupakuwaspa palabraykunata mana chaskiqpaqqa ñam juzgaqnin kachkanña, ñoqapa palabraykunam paytaqa tukupay punchawpi juzganqa. 49Ñoqaqa manam kikillaymantachu imatapas rimarqani, kachamuwaqniy Taytaymi kamachiwarqa imam rimanaytawan chaynataq imam yachachinaytapas. 50Ñoqaqa yachanim Taytaypa kamachikuyninqa wiñay kawsay kasqanta, chaynaqa ñoqapa nisqaykunaqa Taytaypa kamachiwasqanman hinam, nispa.
Currently Selected:
Juan 12: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012