Lute 1
1
Elimeleki abamuŋanda yakwe mbobakalongela kuMoabu
1-2Kale kale, cishi ca Isilaeli kaciceendeleshekwa aboomboloshi, muIsilaeli mwakaba nsala. Mpeeke musankwa wakalinga kwiitwa ayi Elimeleki wamucipani cakwe Efulati alimwi uyo wakalinga kwikala muBetileemu mucishi ca Juda. Musankwa uyo wakalongela kuMoabu aNaomi mukaakwe, pantu pomwi abana bakwe basankwa bobilo, Maloni aKilyoni. Ndibakalinga kucili kooko, 3Elimeleki wakafwa. Lyalo Naomi wakacaalabo eenka abana bakwe basankwa bobilo abo. 4Bana bakwe bakeeba banakashi bene Moabu. Umwi liina wakalinga Opa alakwe umwi kaali Lute. Ndipakeenda myaaka mpashi likumi, 5Maloni aKilyoni bakafwa abalo. Mpeeke Naomi wakacaala eenkabo cakubulaawo ibaye nabi baana basankwa.
Naomi aLute mbobakaboolela kuBetileemu
6Kunembo liya Naomi wakanyumfwa ayi bantu bene mishaabo, Lesa wakabapa coolwe kwiinda mukubapa shakulya shiinji. Mpomunyaawo wakalibambila kuboolela pantu pomwi abamalokashi bakwe. 7Lyalo wakanyamuka abamalokashi bakwe abo kuboolela kuJuda. Sombi munshila 8Naomi wakabaambila ayi, “Amuboolele mukekaale abamanyinawanu. Mwaami Lesa aamucitile shintu shibotu bweenka mbomwakalinga kucitila baabo bakatushiya akuli ndime. 9Lesa aakalengeshe ayi noonse mukeebwe alimwi akuba amaandaanu.”
Aboobo Naomi wakabalasha kwiinda mukubafyonta. Sombi balo bakatalika kulila cakooloma 10akwaambila Naomi ayi, “Sobwe! Tutooya soonse kubene mishaanu.”
11Naomi wakakumbula ayi, “Nobana bangu mulyeelete kuboolela. Ceebonshi mutooyanda kuya anebo? Sa mutooyeya ayi inga ndakonsha kushala baana basankwa abamwi beenga bamweeba? 12Sobwe, amuboolelebo. Nebo ndacembela cakuteebwa tubili. Ono nabi ndayeeya ayi inga ndakonsha kushala, lyalo ndeebwa sunu mashiku akuba abaana basankwa, 13sa inga mwacikonsha kulindila kushikila bakula? Sa ici inga cakonsha kumukasha kweebwa kumbi? Sobwe, nobana bangu, mulishi kwaamba ayi ici nciyumu. Mwaami Lesa wamfutatila, ono ndanyumfwila nkumbu mwebo.”
14Mpeeke bakatalika kulila cakooloma alimwi. Mpomunyaawo Opa wakalasha bapongoshi bakwe banakashi kwiinda mukubafyonta akuboolela kumishaabo. Sombi Lute wakakakatila. 15Aboobo Naomi wakamwaambila ayi, “Lute, bona mukwatwanyoko waboolela kubene mishaabo akuli balesa bakwe. Boolela awebo.”
16Sombi Lute wakakumbula ayi, “Mutankakatishi kumushiya. Amunsuminishebo njaanu. Mukwiinga kuli koonse nkweshi muye, anebo ntooya, uko nkweshi mukanookala, anebo nkweshi kanookala. Bene mishaanu, anebo balaakuba bene misheesu, alimwi Lesa wanu ulaakuba Lesa wangu. 17Uko nkweshi mukafwite, anebo nkweshi nkafwite alimwi kweenka uko nkweshi nkabikwe. Lesa aakampe mulandu na cimwi, kuleka lufu, cikampansaanye amwebo!”
18Naomi ndyaakabona ayi Lute ulishinishite kuyaakwe, wakabula maswi amwi akwaamba.
19Bakeenda kushikila bashika kuBetileemu. Ndibakashika, ndabala yoonse yakasangalala abuumbi. Banakashi bakakankamana akwaamba ayi, “Sa ncakwiila nguNaomi uyu?”
20Lakwe wakakumbula ayi, “Mutanjiti ayi Naomi. Kamunjita ayi Mala ceebo Mwaami Lesa Shinkusu walengesha buumi bwangu kubica. 21Ndindakalonga kuswa kokuno ndakalinga kucite shintu shiinji, sombi Mwaami Lesa wamboosha maansabo. Ino inga mwanjita buyani ayi Naomi kakuli Mwaami Lesa Shinkusu shoonse wamfutatila akuntumina mapensho?” 22Ono mboboobo Naomi mbwaakaboola kuswa kuMoabu aLute mulokashi wakwe mwine Moabu. Bakashika kuBetileemu kumatalikilo aciindi cakutebula bale.
Currently Selected:
Lute 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.