Luka 1
1
1Nomusunikwi baTeyofilasi, kweelana ambomwishi baanji beelesha camaansa obilo kwaamba ayi balembe shintu isho shakacitika pakati kesu. 2Bakalemba kweelana ambotwakalwiitikwa kubaabo bakabona shintu ishi ameenso kuswa kumatalikilo, abo bakalinga mbobeshikushimikila Makani Abotu. 3Shintu shoonse ishi ndakashiipushisha kubaabo bashishi mbuli mboshibete kuswa kumatalikilo, aboobo nkambo, ndayeeya kwaamba ayi nshileembe kweelana amboshikonkene. 4Ndacita boobo kwaamba ayi mushibe lushinisho lwa sheesho shoonse nshimwakeeshikwa.
Kwaambilisha kwa kushalwa kwakwe Joni Mubombeki
5Munshiku isho mwaami Elodi ndyaakalinga kulela cishi ca Judeya, kwakalinga mupailishi wakalinga kwiitwa ayi Sekaliya, mulikoto lya bapailishi lyakwe Abija. Wakalinga kweebete Lisabeti wa mulunyungu lwakwe Aloni.#1 Maka 24:10 6Boonse bobilo bakalinga bantu baluleme pameenso akwe Lesa, abo bakalinga kukonkela Milawo asheesho shoonse Lesa nshaakalinga kuyanda ayi bacite. 7Sombi tebakalinga kucitewo mwaana mukwiinga Lisabeti taakalinga kushala alimwi baalinga bacembela.
8Bumwi bushiku Sekaliya wakalinga kucita ncito yakwe yabupailishi muŊanda yakwe Lesa, bulishi bwakwe ndibwakashika. 9Ono kweelana ambobakalinga kucita bapailishi, bakooma cisolo ico cakawita Sekaliya kwaamba ayi aye muŊanda yakwe Lesa mukutenta tununkila kabotu pacipaililo. 10Sekaliya ndyaakalinga kutenta tununkila kabotu, likoto lya bantu lyakalinga pansengwe kalipaila.
11Mpeeke munjelo wakwe Lesa wakaboneka kaaimfwi kulubasu lwalulyo lwa cipaililo pakalinga kutentelwa tununkila kabotu. 12Sekaliya ndyaakabona munjelo wakakankamana akuloonda. 13Sombi munjelo uyo wakamwaambila ayi, “Utaloondi Sekaliya, Lesa wanyumfwa kupaila kwako, aboobo mukaako Lisabeti ulaakushala mwaana musankwa uyo ngweshi ukatumbe ayi Joni. 14Ulaakukondwa akusangalala alimwi abantu baanji abalo balaakusekelaamo ceebo cakushalwa kwakwe. 15Mwaana uyo ulaakunoocite bulemu bunene kuli Lesa alimwi teshi akanwewo waini nabi shimwi shikola. Lakwe ulaakushalwa kaaswite Mushimu Usalashi.#Shakube 6:3 16Ulaakuboosha bene Isilaeli baanji kuMwaami Lesa wabo. 17Joni ulaakuya kunembo lya Mwaami alimwi ulaakunoocite nkusu mbuli shakalinga kucite mulaluki mukulukulu Elija. Ulaakuleta lunyumfwano pakati ka baana abamaishiwabo alimwi. Ulaakusandula bantu batanyumfwi kwaamba ayi babe amiyeeyo mbuli ya baluleme. Ulaakubamba bantu bakwe Lesa ayi banoolibambite kumusebensela.”#Mala 4:5-6
18Sekaliya wakeepusha munjelo ayi, “Ino ndaakwishiba buyani ayi ici ncalushinisho? Mukwiinga nebo ndacembela alakwe mukaangu wacembela.”
19Munjelo uyo wakakumbula ayi, “Nebo ndime Gabuliyelo wiimikana pameenso akwe Lesa. Lakwe ngowantuma ayi nse nkulwiite makani abotu aya.#Danye 8:16; 9:21 20Sombi tookwe kushoma makani aya eshi akacitike ciindi caakushika. Paceebo ceeco utooba cibuulu kushikila bushiku ubo shaakucitika shoonse nshindakwaambila.”
21Ciindi coonse ici bantu bakalinga kulindilila Sekaliya akukankamana ayi na nciinshi camucelesha kuswa muŊanda yakwe Lesa. 22Ndyaakaswaamo, taakalinga kucikonsha kwaamba akuli mbabo. Aboobo bantu bakeshiba kwaamba ayi Lesa kuli ncaamubonesha, lyalo wakatalika kwaambisha maansa kaalibo ngucibuulu.
23Ndyaakamanisha bulishi bwakwe muŊanda yakwe Lesa, Sekaliya wakaya kumishaabo. 24Ndipakeendabo nshiku shiniini Lisabeti mukaakwe Sekaliya wakamita. Lyalo wakalishisa keekalabo muŋanda kwa myeenshi yosanwe kaamba ayi, 25“Lesa ono wanyumfwila nkumbu wankusha nsoni pameenso a bantu.”
Kwaambilisha kwa kushalwa kwakwe Jesu
26Mumweenshi wasanu awomwi kuswa kukumita kwakwe Lisabeti, Lesa wakatuma Gabuliyelo mundabala inene ya mucishi ca Galili iyo yakalinga kwiitwa ayi Nasaleti. 27Wakaya kumwanakashi wakalinga kwiitwa ayi Maliya utana kukumanaawo amusankwa. Maliya uyu wakalinga kumamikitwe kumusankwa wiitwa ayi Josefu uyo wa mulunyungu lwakwe Defedi.#Mate 1:18 28Munjelo ndyaakashika kuli Maliya wakamwaansha ayi, “Waboneka, webo noocite coolwe kuli Lesa. Lesa uli andiwe.”
29Sombi Maliya wakapenshekwa abuumbi mumoyo pamakani aya, alimwi wakaliipusha mumoyo wakwe ayi, “Nkwaansha buyani uku?” 30Mpomunyaawo munjelo wakamwaambila ayi, “Utaloondi Maliya, mukwiinga Lesa wakubeta luse. 31Ulaakumita akushala mwaana musankwa uyo ngweshi ukatumbe ayi Jesu.#Mate 1:21 32Uyu mwaana ulaakuba mulemu alimwi ulaakunokwiitwa ayi Mwanaakwe Lesa wa kwiculu Wiindaawo. Mwaami Lesa ulaakumupa bwaami bweenka bwakalinga kucite Defedi ishi mukulukulu. 33Ulaakuba mwaami wa mushobo wakwe Jakobo alimwi bweene bwakwe teshi bukamaneewo.”#2 Samwe 7:12, 13, 16; Isa 9:7
34Lyalo Maliya wakeepusha munjelo ayi, “Ino ici inga cacitika buyani nebo nenteshiiwo amusankwa?” 35Munjelo wakakumbula ayi, “Mushimu Usalashi ulaakwisa pali ndiwe ankusu shakwe Lesa wiindaawo shilaakukufwekelela. Aboobo mwaana usalalite eshi akashalwe, ulaakunokwiitwa ayi Mwanaakwe Lesa. 36Te ulimwishi mukwanu Lisabeti ulya walinga kwaambwa ayi taashali? Alakwe bulya ulicite lifumo lya myeenshi yosanwe awomwi lya mwaana musankwa. 37Mukwiinga kuli Lesa taaku ciyumu.”#Mata 18:14 38Mpeeke Maliya wakakumbula ayi, “Acicitike kweelana ambomwaamba mukwiinga nebo ndimusebenshi wakwe Lesa.” Lyalo munjelo uyo wakamushiya.
Maliya mbwaakafwakashisha Lisabeti
39Ndipakeenda nshiku shiniinibo, Maliya wakanyamuka lweendo cakufwambaana kuya mundabala yakalinga mutulundu mucishi ca Judeya. 40Wakenjila muŋanda yakwe Sekaliya akwaansha Lisabeti. 41Mpeeke Lisabeti ndyaakanyumfwabo kwaansha kwakwe Maliya, mwaana ngwaakalinga kumitite wakanyanyaala mumala. Lyalo Lisabeti wakasushikwa Mushimu Usalashi. 42Mpomunyaawo wakoolobesha aliswi lya peculu ayi, “Ulicite coolwe ciinda pabanakashi boonse. Awooyo ngweshi ukashale ulicite coolwe. 43Anu ncoolwe cinene buyani ici kuli ndime kwaamba ayi mfwakashilwe banyina Mwaami wangu? 44Mukwiinga ndiwaŋanshabo mwaana mumala wanyanyaala cakusangalala. 45Ulicite coolwe mukwiinga wakashoma kwaamba ayi makani ngowakaambilwa kuswa kuli Lesa ncakwiila alaakucitika.”
Lwiimbo lwakwe Maliya lwakulumbaisha
46Lyalo Maliya wakaamba ayi,
“Ndalumba Mwaami mumoyo wangu,
47Ndisangalete abuumbi ceebo cakwe Lesa Mupulushi wangu
48mukwiinga wayeeya kuliceesha kwangu nemusebenshi wakwe.
Kuswa sunu mashalane oonse alaakunoonjitabo ayi ucite coolwe#1 Samwe 1:11
49mukwiinga wa shintu shinene nshaancitila Lesa Shinkusu shoonse.
Liina lyakwe lilisalalite.
50Nkumbu shakwe shili pali boonse abo bamulemeka
kuswa kulishalane limwi kushikila kulishalane limwi.
51Lyaansa lyakwe lyacita shintu sha nkusu shikankamika.
Wamwaya bantu bacite miyeeyo yakulisumpula mumyoyo yabo.
52Wakusha baami beshinkusu shiinji pashuuna sha bwaami,
akusumpula baabo baliceesha.#Jobo 5:11; 12:19
53Wapa bafwite nsala shintu shiinji shibotu,
akuboosha babile maansabo.
54Wasunga cipangano ncaakashomesha bakulukulu,
wacafwa Isilaeli musebenshi wakwe.
55Taakwe kuluba kucitila nkumbu Abulaamu
alunyungu lwakwe kushikila muyayaya.”#Mata 17:7
56Maliya wakekala aLisabeti myeenshi yotatwe keeyanda kukwana. Kuswawaawo wakaboolela kumishaabo.
Kushalwa kwakwe Joni Mubombeki
57Ndicakashika ciindi ceelete, Lisabeti wakapulukaamo mwaana musankwa. 58Bashimukobonyina abamakwabo ndibakanyumfwa mbuli Lesa mbwaakacitila nkumbu shiinji Lisabeti bakasekelela pantu pomwi anguwe.
59Mwaana ulya ndyaakakwanisha nsondo abushiku bomwi bakesa mukumupalula. Bakalinga kusuni akwaamba ayi bamutumbe liina lyakwe ishi lya Sekaliya, 60sombi banyina bakakaka akwaamba ayi ulyeelete kwiitwa ayi Joni.
61Bantu bakakumbula ayi, “Taakuuwo shikamukowa wako ucite liina ili!” 62Lyalo bakaambisha kumaansa kwiipusha baishi liina ndibakalinga kusuni kutumba mwaana.
63Mpomunyaawo Sekaliya wakasenga cakulembelaawo akulemba ayi, “Liina lyakwe nguJoni.” Ici cakakankamika bantu boonse. 64Amanebo kulemba boobo wakacikonsha kwaamba alimwi akutalika kulumbaisha Lesa. 65Bantu boonse bakalinga kwikala pafwaafwi bakaloonda abuumbi. Lyalo shoonse ishi shintu shakanyumfwika mucishi coonse ca tulundu twa muJudeya. 66Bantu boonse bakanyumfwa cikani ici bakalinga kuciyeeya mumyoyo akuliipusha ayi, “Mwaana uyu ulaakubanshi?” Mukwiinga cakaboneka ayi nkusu shakwe Lesa shakalinga pali nguwe.
Sekaliya mbwaakalaluka
67Mpeeke Sekaliya, ishi wakesushikwa Mushimu Usalashi akulaluka ayi,
68“Atulumbaishe Mwaami Lesa wa bene Isilaeli
mukwiinga wesa mukufwakashisha bantu bakwe akubapulusha.
69Watupa Mupulushi ucite nkusu
kuswa mulunyungu lwakwe Defedi musebenshi wakwe.
70Kweelana ambwaakaamba kwiinda mubalaluki bakwe
basalalite bakulukulu ayi
71ulaakutupulusha kuswa kubalwani besu,
nkokwaamba ayi kunkusu sha baabo boonse batupatite.
72Wakaamba ayi ulaakunyumfwila nkumbu bamashali besu bakulukulu
alimwi teshi akalubeeko cipangano cakwe cisalalite.
73Wakashomesha cakulumbila kuli ishiwesu Abulaamu ayi
74ulaakutupulusha kuswa kubalwani
kwaamba ayi tumusebensele cakubula boowa
75akweenda pameenso akwe katusalalite akululama
nshiku shoonse sha buumi bwesu.
76Webo omwanaangu ulaakwiitwa ayi
ndiwe mulaluki wakwe Lesa wa kwiculu Wiindaawo,
mukwiinga webo ulaakululamikila Mwaami nshila,
lakwe kaatana kwisa.#Mala 3:1
77Ulaakushibisha bantu bakwe kwaamba ayi
balaakupulushikwa kwiinda mukulekelelwa shibiibi shabo.
78Lesa wesu uliswite nkumbu
ulaakutupa mumuni uli mbuli wa kumuyamaca.
79Ulaakumunikila baabo bashiite mumunshinshe amucimfule ca lufu,
akututanjilila munshila ya luumuno.”#Isa 9:2
80Lyalo mwaana uyo Joni wakakula akushimpa mumushimu. Wakekala muluyanga kushikila bushiku ubo mbwaakalitondesha patuba kubantu ba muIsilaeli.
Currently Selected:
Luka 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.