Joni 8
8
Mwanakashi wakacatwa bulale
1Lyalo Jesu wakaya kuKalundu ka Olifi. 2Ono macuunsacuunsa wakaboolela kuŊanda yakwe Lesa akwinjila mukati. Bantu baanji bakayoboloka akubungana kuli nguwe, lyalo wakekala panshi akutalika kubeeisha. 3Mpomunyaawo bafundishi ba Milawo abaFalisi bakenjisha mwanakashi ngobakacata kaacita bulale akumwiimika pakati kabo. 4Lyalo bakaambila Jesu ayi, “Bafundishi, uyu mwanakashi wakacatwa kaacita bulale. 5Ono kweelana aMilawo yakatupa Mose banakashi ba mbuli wooyu balyeelete kucaikwa amabwe. Ino mwebo mutokwaambaawo buyani pacikani ici?”#Bene Lefi 20:10; Duto 22:22-24 6Bakeepusha bobulya kwaamba ayi babone pakumupeta mulandu.
Sombi Jesu wakakotama akutalika kulemba panshi amunwe. 7Lyalo ndibakatolelela kumwiipusha wakakotamuka akubaambila ayi, “Uyo woonse utakwe kubishaawo pakati kanu, ataangune kumuuma libwe.” 8Mpeeke wakakotama alimwi akulemba panshi. 9Ndibakanyumfwa boobo, bakatalika kuswa womwi womwi, kutalikila kubamanene, kushikila Jesu wacaalabo eenka amwanakashi uyo kaaimfwi peenkaapo. 10Jesu wakakotamuka akwiipusha mwanakashi uyo ayi, “Omwanakashi, ino mbali bakuleta? Sa taaku nabi womwi wakupa mulandu?”
11Mwanakashi uyo wakakumbula ayi, “Taakuuwo Nkambo.” Lyalo Jesu wakaamba ayi, “Anu anebo teshi nkupeewo mulandu. Ono koya, utakacitiiwo cibiibi alimwi!”]
Jesu ngomumuni wa bantu boonse
12Jesu wakaambila baFalisi alimwi ayi, “Ndi mumuni umunikila bantu boonse. Uyo woonse unkonkela teshi akeende mumunshinshe napaceyi, sombi ulaakuba amumuni upa buumi.”#Mate 5:14; Joni 9:5
13BaFalisi bakamwaambila ayi, “Ubo mbootokwaamba utoolyaambilila, aboobo bukamboni bwako taaku mbobubete.”#Joni 5:31 14Jesu wakakumbula ayi, “Nakubi kwaamba ayi ntoolyaambilila nemwiine, bukamboni bwangu mbwalushinisho mukwiinga ndishiiko nkondakaswa alimwi ankootooya. Sombi mwebo tamwishiiko nkondakaswa ankoontooya. 15Mwebo muloombolosha muntu kwiinda mubuntu, sombi nebo nshoomboloshi muntu nabi womwi. 16Na ndoombolosha, koombolosha kwangu kuliluleme mukwiinga nshibete neenka, sombi ndyaabaTa abo bakantuma. 17MuMilawo yanu mulilembetwe ayi bukamboni bwa bantu bobilo mbwalushinisho. 18Ee, ndalicitila bukamboni nemwiine, sombi abalo baTa bakantuma balancitila bukamboni.”
19Lyalo bakamwiipusha ayi, “Ino baiso bali kuli?” Jesu wakabakumbula ayi, “Nebo tamwinshi, abaTa tamubeshi. Naakwiinga mwalinga kwishi ndime, abaTa nemwalinga kubeshi.”
20Jesu wakaamba maswi aya kaali muŊanda yakwe Lesa pafwaafwi amusena pakalinga kubikwa shipo. Sombi taaku wakamucata mukwiinga ciindi cakwe kacitana kushikila.
Jesu mbwaakaamba shakuya kwakwe
21Lyalo Jesu wakaboshaawo kwaamba ayi, “Nebo ntooya, mulaakunangoola, sombi mulaakufwabo mushibiibi shanu. Uko nkoontooya, mwebo inga tamushikiiko.”
22Paceebo ceeco bamaloba ba baJuda bakatalika kwiipushanya ayi, “Sa nkokwaamba ayi utooya mukulicaya? Ncaatokwaambila ayi, ‘Uko nkoontooya, mwebo tamukoonshi kushikaako.’ ” 23Sombi Jesu wakatolelela kubaambila ayi, “Mwebo muli ba panshi pano, nebo ndi wa kwiculu. Mwebo muli ba mucishi ca panshi, sombi nebo nshishi wa mucishi cino, sobwe. 24Ncendamulwiitila ayi, ‘Mulaakufwabo mushibiibi shanu.’ Na mubule kushoma ayi ndime wooyo ngoontoolyaamba, ncakwiila mulaakufwabo mushibiibi shanu.”
25Mpomunyaawo bakeepusha Jesu ayi, “Ino ndiwaani?” Jesu wakakumbula ayi, “Ndime wooyo ngoontoomulwiita kuswabo kumatalikilo. 26Ndicite makani aanji akwaamba, ngeenga ndamoombolosheshaawo, sombi uyo wakantuma ulashomeka alimwi shoonse nshindakanyumfwa kuli nguwe, nshesheesho nshendwiita bantu boonse.”
27Ono tabakwe kunyumfwa kwaamba ayi utoobalwiita shabaIshi. 28Aboobo Jesu wakabaambila ayi, “Mwaakwaanjika MwanaaMuntu, ndyeshi mukashibe ayi ndime wooyo ngoontoolyaamba alimwi mulaakwishiba ayi taaku nceencita palwaangu, sombi ndaambabo sheesho shakanjiisha baTa. 29Uyo wakantuma uli anebo, taakwe kunshiya neenka mukwiinga lyoonse ndacita shimukondelesha.”
30Ndibakanyumfwa makani aya, bantu baanji bakashoma muli nguwe.
Shabantu baangulukite abasha
31Jesu wakaambila baJuda bakamushoma ayi, “Na mukonkele kwiisha kwangu, ncakwiila mutooba bashikwiiya bangu. 32Lyalo mulaakwishiba lushinisho, alwalo lushinisho ulo lulaakumwaangulula.” 33Balo bakaamba ayi, “Swebo tuli bana bakwe Abulaamu alimwi tatukwe kubaawo kale basha ba muntu uli woonse. Ino inga mwaamba buyani ayi tulaakwaangululwa?”#Mate 3:9; Luka 3:8
34Jesu wakabakumbula ayi, “Ntoomulwiita calushinisho ayi uyo woonse ubisha ngumusha wa cibiibi. 35Ono musha taakalilili muŋanda ya mwaami wakwe lyoonse, sombi mwaana wa muŋanda. 36Aboobo na Mwaana wamwaangulula, ingayi mwaangululwa cancinencine. 37Ndishi kwaamba ayi muli bana bakwe Abulaamu. Nakubi boobo mutoopinga kuncaya mukwiinga maswi angu taanjili mumyoyo yanu. 38Nebo ndaamba shintu nshindakabona kuli baTa, sombi mwebo mulacita shintu nshemwakanyumfwa kuli ishiwanu.”
39Balo bakakumbula ayi, “Tuli bana bakwe Abulaamu.” Lyalo Jesu wakabaambila ayi, “Nemwalinga bana bakwe Abulaamu nemwalinga kucita shintu nshaakalinga kucita lakwe. 40Ono mpaapa mutoopinga kuncaya nebo nendamwaambila makani alushinisho ngondakanyumfwa kuli Lesa. Abulaamu taakwe kucitawo shintu sha mushobo uyu, sobwe. 41Mwebo mutoocita shintu shakwe ishiwanu nobeene.” Mpomunyaawo balo bakamwaambila ayi, “Tatwishi baana ba mubulale. Tulicitebo ishiwesu womwibo ndondoli, Lesa.”
42Jesu wakabaambila ayi, “Lesa naalinga Ishiwanu naakwiinga kamunsuni mukwiinga ndakesa kokuno kuswa kuli Lesa. Nshikwe kwisabo mukusuna kwangu, sombi nguLesa wakantuma. 43Ino nceebonshi ncemutoobulila kunyumfwa nshentokwaamba? Sa te nceebo cakwaamba ayi tamusuni kunyumfwa maswi angu? 44Mwebo muli kulubasu lwakwe ishiwanu Satana, aboobo mulisuni kucita sheesho shisuni ishiwanu. Lakwe wakalinga mucayi kuswa kumatalikilo. Taana kucitawo kale shalushinisho mukwiinga muli nguwe taamu lushinisho. Na waamba sha bubeshi ingayi waamba mbwaabete mukwiinga ngumubeshi alimwi ngoishi wa bubeshi. 45Sombi nebo ndaamba shalushinisho paceebo ceeco tamusuni kunshoma. 46Ngani pakati kanu apa weenga wanshinina ayi ndakabisha? Taakuuwo. Ono na ntokwaamba calushinisho ceebonshi tamutoonshoma? 47Mukwiinga uyo woonse uli muli Lesa ulanyumfwa shaamba Lesa. Aboobo mwebo ncemutanyumfwili ceebo tamubete muli Lesa.”
Jesu mbwaakaamba shakwe Abulaamu
48Mpomunyaawo baJuda bakamwiipusha ayi, “Sa tatukwe kwaamba calushinisho nditwalinga twaamba ayi uli mwine Samaliya alimwi ayi ulicite shikaswa?”
49Jesu wakakumbula ayi, “Nshicite shikaswa, sobwe. Ndalemeka baTa, sombi mwebo mulanyansha. 50Nebo nshitoolipa bulemu nemwiine, sombi nkwaali umpa bulemu uyo ngweshi akoomboloshe. 51Ntoomulwiita calushinisho ayi uyo woonse ucita bwaamba maswi angu teshi akafwewo.”
52Mpomunyaawo bakamwaambila ayi, “Ono twashinisha ayi ulicite shikaswa. Mukwiinga Abulaamu abalaluki bakafwa. Ono webo inga waamba buyani ayi na muntu uli woonse 53wacita bwaamba maswi angu teshi akafwewo. Sa webo uli munene kwiinda ishiwesu Abulaamu nabi balaluki bakafwa? Anu utooyeeya ayi ndiwaani?”
54Jesu wakakumbula ayi, “Ono na ntoolipa bulemu nemwiine, ingayi bulemu bwangu taaku mbobubete. Nebo mbaTa abo beenka mbomwaamba ayi ngoLesa wanu, mbobampa bulemu. 55Nakubi kwaamba ayi mwebo tamumwishi, nebo ndimwishi alimwi na ndaamba ayi nshimwishi, nkokwaamba ayi ndaba mubeshi bweenka mbuli ndimwe. Ono nebo ndimwishi alimwi ndacita bwaamba liswi lyakwe. 56Ishiwanu Abulaamu wakasangalala kwaamba ayi ulaakubona bushiku bwakwisa kwangu, ncakwiila wakabubona alimwi wakakondwa.”
57Mpeeke baJuda bakaamba ayi, “Webo toona kukwanisha amyaaka makumi osanwe inga waamba buyani ayi wakamubona Abulaamu?” 58“Ntoomulwiita calushinisho ayi Abulaamu kaatana kushalwa, nebo kaandiiko kale.”
59Lyalo ingayi banyumfwe boobo bakabwesa mabwe ayi baume Jesu, sombi wakabayuba akuloboka kuswa muŊanda yakwe Lesa.
Currently Selected:
Joni 8: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.