Joni 12
12
Jesu mbwaakananikwa mafuta kuBetani
(Mate 26:6-13; Maako 14:3-9)
1Ndikwakacaala nshiku shosanwe abomwi kwaamba ayi bushiku bwa Pasika bwakwiibaluka kusotokela bushike, Jesu wakashika kuBetani kwakalinga kwikala Lasalo uyo ngwaakabusha kuswa kubafu. 2Kundabala uko Jesu bakamubambila cakulya ca macolesha, Malita nguwakalinga kubapa. Lasalo wakalinga womwi wa baabo bakalinga kulya aJesu. 3Lyalo Maliya wakanyamuna musaashi wa mafuta anunkila kabotu amakwebo eetwa ayi nadi, ayo ngaakapuumwita pashimpanta shakwe Jesu akushipukuta amisusu yakwe mwiine. Mpeeke muŋanda mwakesulabo keema kabotu ka mafuta ayo.#Luka 7:37-38 4Sombi Judasi lsikalyoti, womwi wa bashikwiiya bakwe (uyo eenka wakamwaaba kunembo) wakaamba ayi, 5“Ceebonshi mafuta aya taakwe kuulishikwabo mweelo wa maali ali myaanda yotatwe akupa maali ayo kubakandu?” 6Taakwe kwaamba boobo ceebo cakunyumfwila nkumbu bakandu, sombi mukwiinga wakalinga mwiipi. Judasi ngowakalinga kusunga coola ca maali, aboobo wakalinga kwiipaamo kaasebensesha mwiine.
7Jesu wakakumbula ayi, “Amumuleeke mwiine, mafuta aya wakaabambila kufukilwa kwangu. 8Bakandu muli abo nshiku shoonse, sombi nebo teshi nooli anu lyoonse.”#Duto 15:11
Mbobakapangana ayi bacaye Lasalo
9Bantu baanji ndibakanyumfwa ayi Jesu uli muBetani, bakayaako. Tabakwe kuya mukubonabo Jesu eenka, sombi aLasalo ngwaakabusha kuswa kubafu. 10Aboobo bamatanjilili ba bapailishi bakapangana ayi alakwe Lasalo bamucaaye 11ceebo baJuda baanji ndibakabona kubuka kwakwe Lasalo, bakatalika kukaka kwiisha kwabo akushomabo muli Jesu.
Jesu mbwaakenjila ca bulemu muJelusalemu
(Mate 21:1-11; Maako 11:1-11; Luka 19:28-40)
12Mpeeke bushiku bwakaboolaawo, bantu baanji baanji bakaya mukusekelela bushiku bwa Pasika bwa kwiibaluka kusotokela, bakanyumfwa ayi Jesu utoosa kuJelusalemu. 13Lyalo bakatema malala akumucinsha munshila, kabaya coolobesha ayi, “Alumbaishikwe Lesa! Aape coolwe kuli wooyo utoosa muliina lya Mwaami Lesa! Aape coolwe Mwaami wa Isilaeli!”#Kulu 118:25-26
14Jesu wakacana mwanaambongolo akutantaawo kweelana ambokwakalembwa mumalembo akwe Lesa ayi,
15“Utaloondi, ondabala inene ya Siyoni!
Bona mwaami wako ngooyo utoosa,
Kaatantite pamwanaambongolo.”#Seka 9:9
16Paciindi ico, bashikwiiya bakwe tabakwe kwanyumfwishisha makani aya, sombi Jesu ndyaakabushikwa mubulemu, bakeebaluka ayi Malembo akwe Lesa akalinga kwaamba pali nguwe alimwi ayi shintu ishi shakacitilwa nguwe.
17Bantu abo Jesu mbaakalingaabo ndyaakeeta Lasalo ayi aswe mucuumbwe, ndyaakamubusha kubafu, bakalinga kuya bwaambila bantu cikani ici. 18Nceceeco bantu ncebakamucinshila mukwiinga bakanyumfwa ayi ngowakacita caankamiko ico. 19Aboobo baFalisi bakatalika kulwiitana ayi, “Taaku ncetutoocita napaceyi! Amubone bantu boonse bakonkela nguwe!”
BaGiliki bamwi mbobakayandoola Jesu
20Ono pakalinga abaGiliki bamwi pakati kabaabo bakalinga baya mukulambila Lesa pabushiku bwakusekelela uko. 21BaGiliki aba bakaya kuli Filipo wa kundabala ya Betisaida mucishi ca Galili akumwaambila ayi, “Nkambo, tutooyanda kubona Jesu.”
22Filipo wakaya mukulwiita Andulu, lyalo Andulu aFilipo bakaya mukulwiita Jesu. 23Jesu wakakumbula ayi, “Ciindi cashikila cakwaamba ayi MwanaaMuntu alemekwe. 24Ntoomulwiita calushinisho ayi luseke lwa maila, na lwabula kulokela mubulongo akufwa, inga kalulibo lomwi lyoonse, sombi na lwalokela mubulongo akufwa, lyalo inga lwashala ashimwi shiinji. 25Muntu usunishi buumi bwakwe ulaakubusowa, sombi uyo upatite buumi bwakwe bwa mucishi ca panshi, ulaakuba abuumi butamaani.#Mate 10:39; 16:25; Maako 8:35; Luka 9:24; 17:33 26Uyo woonse utooyanda kusebensela ndime, ulyeelete kunkonkela kwaamba ayi nkweenga kaambete, alakwe musebenshi wangu akanooliiko. Abalo baTa balaakupa bulemu muntu woonse usebensela ndime.
Jesu mbwaakaamba shalufu lwakwe
27“Ono moyo wangu wapenshekwa. Sa ŋambe ayi, ‘Ta amumfuune kuciindi ca mapensho ici’? Sobwe, mukwiinga mapensho aya ngondakeshita. 28Ta, amuboneshe bulemu bwanu!” Mpomunyaawo liswi lyakanyumfwika kuswa kwiculu kalyaamba ayi, “Ndabubonesha kale, alimwi ncibubonesha.”
29Bantu bakalinga kwiimfwi waawo bakanyumfwa liswi, lyalo bamwi bakaamba ayi, “Ncilulumo ca mfula,” sombi bamwi ayi, “Ngumunjelo wamwaamboosha.”
30Lyalo Jesu wakabalwiita ayi, “Ili liswi talikwe kunyumfwika ceebo ca ndime, sobwe, sombi ceebo ca ndimwe. 31Ono cashikila ciindi cakwaamba ayi bantu ba pacishi ca panshi boomboloshekwe. Ono Satana mweendeleshi wa panshi pano wakomwa. 32Sombi nebo ndaakupopwa pamucilingano ndaakuyobolola bantu boonse kuli ndime.” 33(Jesu wakaamba boobo kwaamba ayi abatondeshe lufu ndweshi akafwe mbolubete.)
34Bantu bakamukumbula ayi, “Swebo twakanyumfwa muMilawo yakwe Mose ayi Usalitwe wakwe Lesa ulakunoolikobo lyoonse, ino ono inga waamba buyani ayi, ‘MwanaaMuntu ulyeelete kupopwa pamucilingano?’ Ino MwanaaMuntu uyo ngani?”#Kulu 110:4; Isa 9:7; Ese 37:25; Danye 7:14 35Jesu wakabaambila ayi, “Mumuni ucili amwebo ciindi ciniinibo. Amweende, mumuni kauciliiko kwaamba ayi munshinshe utesi pali ndimwe. Mukwiinga uyo woonse weenda mumunshinshe taashibi nkwaatooya. 36Amushome mumumuni ndyeucili anu kwaamba ayi mube bantu ba mumumuni.”
Jesu ndyaakamana kwaamba makani aya wakaswaawo akuya mukubayuba.
Bantu mbobatakwe kushoma Jesu
37Nakubi kwaamba ayi wakacita shaankamiko pameenso abo, tabakwe kumushoma. 38Ici cakacitika kweelana abwakaamba mulaluki mukulukulu Isaya ayi,
“NoBaami baLesa, ngani wakashoma makani ngotwakashimikila?
Anu nkusu shanu noBaami baLesa shakayubulwitwa baani?”#Isa 53:1
39Aboobo tabakwe kushoma mukwiinga Isaya alimwi wakaamba ayi,
40“Lesa wakabapofosha
akuyumya mitwi yabo,
cakwaamba ayi tabakoonshi kubona ameenso abo
nabi kunyumfwishisha amyoyo yabo.
Nabibo kusandukila kuli ndime ayi mbashilike.”#Isa 6:10
41Isaya wakaamba boobo mukwiinga wakabona bulemu bwakwe Jesu, akwaamba shapali nguwe.
42Nakubi boobo baanji pakati ka bamaloba ba baJuda bakashoma muli Jesu, ono tebakalinga kutondesha lushomo lwabo mukwiinga bakalinga kuloonda baFalisi ayi inga babatanda mucoonde cabo. 43Bamaloba aba bakalinga kusuni kulumbaishikwa abantu kwiinda kulumbaishikwa aLesa.
Maswi akwe Jesu alaakoombolosha bantu
44Lyalo Jesu wakoolobesha ayi, “Muntu na washoma muli ndime, taashomibo ndime, sombi ulashoma awooyo wakantuma. 45Uyo woonse ubona ndime, ingayi wabona awooyo wakantuma. 46Ndakesa mucishi ca panshi bweenka mbuli mumuni kwaamba ayi uyo woonse eshi ashome muli ndime atabi mumunshinshe. 47Na muntu wanyumfwa maswi angu, nakubi boobo wabula kwaakonkela teshi nkamoomboloshe mukwiinga nshina kwisa mukoombolosha bantu, sombi mukubapulusha. 48Uyo woonse ukaka ndime amaswi angu ulicite umwi eshi akamoomboloshe. Maswi ayo ngondaamba ngweshi akamoomboloshe pabushiku bwakweelaako. 49Ici ncalushinisho mukwiinga nshikwe kwaamba sha mumutwi wangu, sombi baTa abo bakantuma bakandwiita nsheenjelete kwaamba abwakwaamba. 50Ndishi kwaamba ayi milasho yabo ilapa buumi butamaani. Aboobo shoonse nsheŋamba, ndashaamba bweenka mbobakandwiita baTa.”
Currently Selected:
Joni 12: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.