Dutolonomi 1
1
Mbobakalibambila kuswa pakalundu ka Olebu
1Mulibuku ili, muli makani Mose ngaakaambila bene Isilaeli ndyaakalinga muluyanga kwicwe lya Mulonga wa Joodani. Bakalinga mucinyika ca Joodani pafwaafwi aSufi, pakati ka ndabala ya Palani aya Tofelo, Labani, Asaloti alimwi aDisaabu. 2Mushinso uli kuswa kuSinayi kushika kuKadeshi Baniya kwiinda ya Kalundu ka Siya, wakalinga kutola nshiku likumi abomwi. 3Pabushiku butaanshi bwa mweenshi wa likumi awomwi mumwaaka wa makumi one kuswa ndibakaswa mucishi ca Ijipiti, Mose wakabalwiita shoonse Mwaami Lesa nshaakamulasha ayi abalwiite. 4Ici cakacitika Mwaami Lesa kaali wakoma kale Sioni mwaami wa bene Amoli, uyo wakalinga kweendelesha ndabala ya Eshiboni, aOgi mwaami wa Bashani, uyo wakalinga kweendelesha ndabala ya Ashitaloti aya Edileyi.#Shakube 21:21-35 5Bantu aba kabacili kwicwe lya Joodani mucishi ca Moabu, Mose wakatalika kubapandulwita milawo yakwe Lesa iyi.
Wakabaambila ayi, 6“Nditwakalinga paKalundu ka Sinayi Mwaami Lesa, Lesa wesu wakatulwiita ayi, ‘Ono mbubo mwekalisha pakalundu aka. 7Amumwaye misumba mutolelele lweendo. Amuye kucishi ca tulundu ca bene Amoli akumisena yoonse ishingulukite nkokwaamba ayi kucinyika ca Joodani, kucishi ca tulundu akumisena ikuneme, kumisena ya kumalenge alimwi akuloombe lwa Mediteleniyani. Mukashiike akucishi ca Kenani alimwi akwiindilila cakushika kutulundu twa Lebanoni akuMulonga unene wa Yufuletisi. 8Ici coonse ncecishi nebo neMwaami Lesa ncendakashomesha kupa bamashali banu bakulukulu, Abulaamu, Isaki alimwi aJakobo pantu pomwi abamulunyungu lwabo. Kamuya mukekaleemo.’ ”
Mose mbwaakasala boomboloshi
(Kulo 18:13-27)
9Mose wakaambila bantu ayi, “Katucili kuKalundu ka Sinayi, ndakamulwiita ayi, ‘Mulimo wakumweendelesha mwebo wankomenena. Nshikoonshi kuukonsha neenka. 10Mwaami Lesa, Lesa wanu wamufusha anga ninyenyeenshi shili mwiculu. 11Ono Mwaami Lesa wa bamashali banu bakulukulu, aamufuushe mankanda cuulu kwiinda mbomubete akumusumpula kweelana ambwaakashomesha! 12Sombi nebo neenka inga ndakonsha buyani kucita mulimo wakumweendelesha akoombolosha tukani pakati kanu? 13Amusale bantu basongo, bacite lushibo alimwi balemekwa kuswa mumukowa womwi awomwi, lyalo ndaakubabika ayi bamutanjilile.’ 14Mwebo mwakasumina ayi ncibotu kucita boobo. 15Aboobo ndakabwesa basongo alimwi batanjilili balemekwa, abo mbomwakasala, akubabika ayi bamutanjilile. Bamwi bakalinga kweendelesha bali cuulu, bamwi mwaanda, bamwi makumi osanwe, abalo bamwi likumi. Ndakasala abamwi bacinenenene mumikowa yoonse.
16“Mpomunyaawo ndakabalwiita ayi, ‘Amukutike makani akwiinga esa pakati ka bantu banu. Amoomboloshe makani oonse cakwelanisha nabi ali pakati ka bene Isilaelinyinaanu nabi na ngumwine Isilaeli amuswamashi ngomwikalaakwe. 17Mutabi akasalulushi mukoombolosha kwanu. Bantu boonse, ulemekwa nabi utalemekwi, muboomboloshe mushobo womwi. Mutaloondi muntu nabi womwi, ceebo boomboloshi bwanu bulaswa kuli Lesa. Na kwaba mulandu weenga wayuma kuli ndimwe, inga mwauleta kuli ndime ndawoombolosha.’ 18Paciindi ceenka ico ndakamulwiita shimwi shoonse nshemwakalinga kweelete kucita.
Beshikusensa mbobakatumwa kuswa kuKadeshi Baniya
(Shakube 13:1-33)
19“Twakacita ico Mwaami Lesa, Lesa wesu ncaakatwaambila. Twakaswaawo paKalundu ka Sinayi akwiinda muluyanga lunene, luyoosha ndumwakabona nobeene kuya kucishi ca tulundu ca bene Amoli. Nditwakashika kuKadeshi Baniya, 20ndakamulwiita ayi, ‘Ono mwashika kucishi ca tulundu ca bene Amoli, ico Mwaami Lesa, Lesa wesu nceshi atupe. 21Amubone aneeci. Kamuya mwikaleemo kweelana abwakaamba Mwaami Lesa, Lesa wa bamashali banu bakulukulu, mutaloondi nabi kutonsha.’
22“Sombi mwebo mwakesa kuli ndime akwaamba ayi, ‘Atutanjisheeko basenseshi kwaamba ayi bakese bakatulwiite nshila njetweelete kwiinda alimwi abubete mandabala anene uko.’
23“Muyeeyo uyo wakankonda. Aboobo ndakasala basankwa bali likumi abobilo nkokwaamba ayi womwi mumukowa womwi awomwi. 24Mpeeke bakaya mucishi ca tulundu kushika akucinyika ca Eshikolu akucisensa. 25Ndibakaboola bakatuletela shisepo nshibakacanaako uko. Bakaluula ayi cishi Mwaami Lesa, Lesa wesu ncaatootupa cilicite bulongo bubotu abuumbi.
26“Sombi mwakakaka mulasho wa Mwaami Lesa, Lesa wanu. Ncakwiila mwakakaka kwinjila mucishi ico.#Duto 9:23; Ebulu 3:16 27Mwakatalika kutongookelana mumisumba yanu ayi, ‘Mwaami Lesa ulitupatite. Wakatukusha muIjipiti kwaamba ayi ese atwaabebo kubene Amoli ayi batucaaye. 28Nceebonshi nceenga twaitako uko? Twaloonda. Basankwa mbotwakatumaako bakatulwiita ayi bantu bali kooko balishimpite alimwi mbalaamfu abuumbi kwiinda ndiswe. Balekala mumandabala anene acite lubumbu lulaamfu abuumbi. Bakabonaako abamulunyungu lwa bantu bapolomene beetwa ayi Anakimu!’
29“Sombi ndakamwaambila ayi, ‘Mutaloondi bantu abo. 30Mwaami Lesa, Lesa wanu utoomutanjilila alimwi utoomulwaninaako bweenka mbomwakabona kaacita muIjipiti 31amuluyanga. Mwakabona mbwaakamweensha kabotu lweendo loonse kushika pamusena pano, bweenkabo mbuli mushali musankwa mbweenga wanyamuna mwanaakwe musankwa.’#Mili 13:18 32Ono nakubi kwaamba ayi ndakamulwiita boobo, tamukwe kukonsha kushoma Mwaami Lesa, Lesa wanu.#Ebulu 3:19 33Wakamutanjilila mulweendo lwanu mulicincilo lya mulilo mashiku alimwi mulicincilo malumwi. Wakalinga kumuyandweeta misena yakuyakawo misumba akumutondesha nshila njemweelete kwiinda.
Mwaami Lesa mbwaakapa bene Isilaeli mulandu
34“Mwaami Lesa ndyaakanyumfwa kutongooka kwanu, wakakalala. Mpeeke wakashomesha cakulumbila ayi, 35‘Taaku muntu nabi womwi pakati kanu nobamucita shibi ba cecino ciindi, eshi akenjile mucishi ca bulongo bubotu, ico ncendakashomesha bamashali banu bakulukulu.#Ebulu 3:18 36Kalebu eenkabo mwanaakwe Jefune ngweshi akenjile mucishi ico. Lakwe watolelela kushomeka amoyo woonse kuli ndime. Ndaakupa nguwe abamulunyungu lwakwe cishi ici, ee, cishi ncaakasensa.’ 37Ceebo ca ndimwe, Mwaami Lesa wakakalalila anebo akwaamba ayi, ‘Awebo Mose teshi ukenjileemo mucishi ico. 38Sombi shikukucafwa, Joshuwa mwanaakwe Nani ulaakwinjila mucishi ico. Umuyuminishe mukwiinga ulaakutanjilila bene Isilaeli kuya mukucibwesa.’
39“Lyalo Mwaami Lesa wakaambila swebo soonse ayi, ‘Bana banu abo bacili baniini abuumbi batana kwishiba bubi abubotu, balaakwinjila mucishi ico. Aba mbobaana mwebo mbomwakaamba ayi balaakucatwa kubalwani banu. Ndaakubapa cishi alimwi cilaakuba cabo. 40Sombi mwebo noonse amupiluluke muboolele muluyanga munshila iya kuLweenge Lusalala.’
41“Lyalo mwebo mwakakumbula ayi, ‘Mose, twabishisha Mwaami Lesa. Ono bulya tutooya tukalwaane bweenka bwaamba Mwaami Lesa, Lesa wesu.’ Mpeeke womwi awomwi pakati kanu wakalibambila kuya mukulwana, kamuyeeya ayi ncuubu kulwana cishi ca tulundu.
42“Sombi Mwaami Lesa wakandwiita ayi, ‘Bacenjeshe ayi batalwaani ceebo teshi nooli abo. Aboobo balwani babo batoobakoma.’ 43Ndakamulwiita Mwaami Lesa mbwaakaamba, sombi tamukwe kunyumfwaawo napaceyi. Mwakakaka mulasho wakwe alimwi mukulisumpula kwanu nobeene mwakaya mucishi ca tulundu mukulwana. 44Lyalo bene Amoli abo bakalinga kwikala mutulundu uto bakaswa anga ninsuki shiinji ayi bamulwaane. Bakamutandaanya kushika akuOma akumukoma mucishi ca tulundu ca Edomu. 45Mpeeke mwakalilila Mwaami Lesa ayi amucaafwe, sombi taakwe kumukutika nabi kumubikaako maano. 46Ono mwakekala kuKadeshi kwaciindi cilaamfu.
Currently Selected:
Dutolonomi 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.