Tobiti 2
2
Tobiti mbwaakaba moofu
1Ciindi ico Asaadoni ndyaakaba mwaami, nebo ndakaboolela kumisheesu. Wakabooshesha bakaangu ba Ana alimwi amwanaangu Tobyasi. Paciindi cakusekelela ca Pentekositi, nkokwaamba ayi (kusekelela kwa nsondo ansondo.) Mwaami wakamambila shakulya shiinji abuumbi. Lyalo ndakalibamba kwaamba nkale ndye. 2Bakabamba Tebulu, babikaawo ashakulya shiinji. Mpomunyaawo ndakalwiita mwanaangu Tobyasi ayi, “Koya ukabone mubasha bamushobo wesu. Na ukacane umwi upengete uyo usumina Lesa umulete tulyaakwe. Ntookulindila kushikila uboole alimwi.”
Kucaikwa mu Ninife
3Tobyasi wakaya mukuyandoola muntu upengete wamushobo wesu. Sombi wakaboolela calubilo akwaamba ayi, “Taa!”
Anebo ndakakumbula ayi, “Kwaamba omwanaangu.”
Lakwe alimwi wakatolelela kwaamba ayi, “Ndacaana muntu womwi wamushobo wesu bamucaya, bamupotolola nshingo akumuwaala pamushika. Ntokwaamba bulya ulituntumene peenka apo.”
4Ciindi ceenka ico ndakanyamuka, cakutacataako akushakulya, sobwe. Ndakaya mukuubwesaamo mulubansa lwa mushika akuya mukumubika muŋanda yangu imwi. Ndakalinga kulindila kwaamba ayi na lisuba lipile nje nkamufukile mucuumbwe. 5Ndindakaboolako ndakasamba akulya shilyo shangu shilya nkaampengete mumoyo.
“Sombi ono ndasumina koombolosha kwanu kwancinencine,
kwaamba ayi mumpe mulandu pamulandu
washibiibi shangu akubisha kwaabashali bangu,
mukwiinga nkunyumfwila milawo yanu tatukwe
kuba bantu bashomeka kuli ndimwe.
6Ono mucite bweenka mbomusuni nobeene,
amutole buumi bwangu,
kwaamba ayi shiye cishi
cino capaanshi,
ncakwiila ayi mboolele kubulongo.
Ncancine ncine mfwe
kwiinda kukala abuumi,
mukwiinga ndanyumfwa shintu shiinji,
ndasebanishikwa kantacite mulandu
ono ndaba akungumana kwine kwine.
“Nkambo, amufune kumapesho angu,
akushisha kucishi cangu camuyayaya.
Nkambo, ndamusenga mutafutatili.
Ncibotu kwaamba ayi nebo mfwebo
kwiinda kwaamba ayi nkale mubuumi bwa
mapesho amushobo uyu,
akunyumfwa shakunsebaanya shoonse ishi.”
Mpomunyaawo ndakeebaluka makani akalemba Amosi mulaluki mukulukulu kulwiita bantu bakuBetele ayi,
“Ndakusandula kusekelela kwanu
kuba malilo,
nyimbo shanu shoonse shilakuba koomoka.”
Ono ndakalila misonshi. 7Lisuba ndilyakepila ndakaya mukukaba cuumbwe akubikaamo uyo musankwa. 8Babyeesu bakatalika kunseka kabaamba ayi, “Amumubone tacite aboowa ono. Bakalinga kusuni kumucaya mulandu wamakani eenka ayo. Wakapulukabo kwempe pakucica. Sombi bulya watalika kubika bantu bafwite.” 9Bushiku ubo bweenka ndakasamba cakulisalasha kweelana amulawo ndindakamana kusamba ndakaya mulubansa lwa ŋanda yangu mukoona pafwiifwi alubumbu lwa ŋanda. Kwakalinga kupya cakwaamba ayi nshikwe kulifweka kumeenso. 10Nshindakalinga kwiishi ayi peculu peenka apo pakalinga tumimbya. Matyololo alungula akandokela mumeenso cakwaamba ayi pakaba tubale tutubatuba. Ndakaya mukubona bashikunshilika, uko akooku, sombi cakaala. Ciindi ndibakali kunshilika meenso ndyakeendawo kuya cipofoola. Kumamanino ndakapofoola. Ndakakala shaaka shone kantaboni. Bamakwesu boonse bakamfwita nkumbu. Lyalo Aika wakandela pashaaka shobilo kataana kulongela kucishi ca Elamu. 11Paciindi ceenka ico Aika ndyaakaya bakaangu ba Ana bakaya mukwinjila ncito yacanakashi yakutunga shisani. 12Wakali kucita ayi amanisha kutunga watola shisani kuli baabo bakamupa mulimo. Bamana bakali kumulipila. Bushiku bwacisanu anshiku shobilo ciindi camiyoba wakamanisha kutunga cakufwala akubatolela beene. Abalo bakamulipila bweelete akumubikilaawo kana kampongo mukulumba. 13Lyalo Ana wakesa kuŋanda kaacite akana kampongo. Mpomunyaawo kakatalika kulila. Ndakabeeta bakaangu akubeepusha ayi, “Ino kana kampongo aka kaswa kuli? Naankakwiipa kabooshe kubeene mukwiinga swebo tatweelete kulya shintu shakwiipa, sobwe.” 14Bakaangu bakankumbula ayi, “Mana sobwe bacita kumpa anga kulumba pancito iyo njendakacita.” Sombi nebo nshikwe kushoma nshaakaamba. Aboobo ndakamwaambila ayi akabooshe kubeene. Ono nebo ndakanyumfwa nsoni pali ceeco cakacita bakaangu. Sombi balo bakanjipusha ayi, “Anu maali anu aakucafwa bamwi ali kuli? Milimo yanu ibotu ili kuli? Muntu onse ulishi bubotu bwanu.”
Currently Selected:
Tobiti 2: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
Tobiti 2
2
Tobiti mbwaakaba moofu
1Ciindi ico Asaadoni ndyaakaba mwaami, nebo ndakaboolela kumisheesu. Wakabooshesha bakaangu ba Ana alimwi amwanaangu Tobyasi. Paciindi cakusekelela ca Pentekositi, nkokwaamba ayi (kusekelela kwa nsondo ansondo.) Mwaami wakamambila shakulya shiinji abuumbi. Lyalo ndakalibamba kwaamba nkale ndye. 2Bakabamba Tebulu, babikaawo ashakulya shiinji. Mpomunyaawo ndakalwiita mwanaangu Tobyasi ayi, “Koya ukabone mubasha bamushobo wesu. Na ukacane umwi upengete uyo usumina Lesa umulete tulyaakwe. Ntookulindila kushikila uboole alimwi.”
Kucaikwa mu Ninife
3Tobyasi wakaya mukuyandoola muntu upengete wamushobo wesu. Sombi wakaboolela calubilo akwaamba ayi, “Taa!”
Anebo ndakakumbula ayi, “Kwaamba omwanaangu.”
Lakwe alimwi wakatolelela kwaamba ayi, “Ndacaana muntu womwi wamushobo wesu bamucaya, bamupotolola nshingo akumuwaala pamushika. Ntokwaamba bulya ulituntumene peenka apo.”
4Ciindi ceenka ico ndakanyamuka, cakutacataako akushakulya, sobwe. Ndakaya mukuubwesaamo mulubansa lwa mushika akuya mukumubika muŋanda yangu imwi. Ndakalinga kulindila kwaamba ayi na lisuba lipile nje nkamufukile mucuumbwe. 5Ndindakaboolako ndakasamba akulya shilyo shangu shilya nkaampengete mumoyo.
“Sombi ono ndasumina koombolosha kwanu kwancinencine,
kwaamba ayi mumpe mulandu pamulandu
washibiibi shangu akubisha kwaabashali bangu,
mukwiinga nkunyumfwila milawo yanu tatukwe
kuba bantu bashomeka kuli ndimwe.
6Ono mucite bweenka mbomusuni nobeene,
amutole buumi bwangu,
kwaamba ayi shiye cishi
cino capaanshi,
ncakwiila ayi mboolele kubulongo.
Ncancine ncine mfwe
kwiinda kukala abuumi,
mukwiinga ndanyumfwa shintu shiinji,
ndasebanishikwa kantacite mulandu
ono ndaba akungumana kwine kwine.
“Nkambo, amufune kumapesho angu,
akushisha kucishi cangu camuyayaya.
Nkambo, ndamusenga mutafutatili.
Ncibotu kwaamba ayi nebo mfwebo
kwiinda kwaamba ayi nkale mubuumi bwa
mapesho amushobo uyu,
akunyumfwa shakunsebaanya shoonse ishi.”
Mpomunyaawo ndakeebaluka makani akalemba Amosi mulaluki mukulukulu kulwiita bantu bakuBetele ayi,
“Ndakusandula kusekelela kwanu
kuba malilo,
nyimbo shanu shoonse shilakuba koomoka.”
Ono ndakalila misonshi. 7Lisuba ndilyakepila ndakaya mukukaba cuumbwe akubikaamo uyo musankwa. 8Babyeesu bakatalika kunseka kabaamba ayi, “Amumubone tacite aboowa ono. Bakalinga kusuni kumucaya mulandu wamakani eenka ayo. Wakapulukabo kwempe pakucica. Sombi bulya watalika kubika bantu bafwite.” 9Bushiku ubo bweenka ndakasamba cakulisalasha kweelana amulawo ndindakamana kusamba ndakaya mulubansa lwa ŋanda yangu mukoona pafwiifwi alubumbu lwa ŋanda. Kwakalinga kupya cakwaamba ayi nshikwe kulifweka kumeenso. 10Nshindakalinga kwiishi ayi peculu peenka apo pakalinga tumimbya. Matyololo alungula akandokela mumeenso cakwaamba ayi pakaba tubale tutubatuba. Ndakaya mukubona bashikunshilika, uko akooku, sombi cakaala. Ciindi ndibakali kunshilika meenso ndyakeendawo kuya cipofoola. Kumamanino ndakapofoola. Ndakakala shaaka shone kantaboni. Bamakwesu boonse bakamfwita nkumbu. Lyalo Aika wakandela pashaaka shobilo kataana kulongela kucishi ca Elamu. 11Paciindi ceenka ico Aika ndyaakaya bakaangu ba Ana bakaya mukwinjila ncito yacanakashi yakutunga shisani. 12Wakali kucita ayi amanisha kutunga watola shisani kuli baabo bakamupa mulimo. Bamana bakali kumulipila. Bushiku bwacisanu anshiku shobilo ciindi camiyoba wakamanisha kutunga cakufwala akubatolela beene. Abalo bakamulipila bweelete akumubikilaawo kana kampongo mukulumba. 13Lyalo Ana wakesa kuŋanda kaacite akana kampongo. Mpomunyaawo kakatalika kulila. Ndakabeeta bakaangu akubeepusha ayi, “Ino kana kampongo aka kaswa kuli? Naankakwiipa kabooshe kubeene mukwiinga swebo tatweelete kulya shintu shakwiipa, sobwe.” 14Bakaangu bakankumbula ayi, “Mana sobwe bacita kumpa anga kulumba pancito iyo njendakacita.” Sombi nebo nshikwe kushoma nshaakaamba. Aboobo ndakamwaambila ayi akabooshe kubeene. Ono nebo ndakanyumfwa nsoni pali ceeco cakacita bakaangu. Sombi balo bakanjipusha ayi, “Anu maali anu aakucafwa bamwi ali kuli? Milimo yanu ibotu ili kuli? Muntu onse ulishi bubotu bwanu.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.