2 Pita 1
1
1Ndime Simoni Pita, musebenshi alimwi mutumwi wakwe Jesu Klistu, nentoolembela baabo boonse bakatambula lushomo mbuli ndotucite kwiinda mubululami bwakwe Lesa abwa Mupulushi wesu Jesu Klistu. 2Luse aluumuno shikomene muli ndimwe lyoonse alyoonse, kwiinda mulushibo ndotucite pali Lesa alimwi aJesu Mwaami wesu.
Kwiita alimwi akusala kwakwe Lesa
3Lesa kwiinda munkusu shakwe shabulemu, wakatupa shoonse shiyandika kwaamba ayi twikale buumi bwakupaila kwiine kwiine. Wakacita boobo kwiinda mulushibo ndotucite pali wooyo wakatwiita ceebo ca bulemu abubotu bwakwe. 4Kwiinda muli nshisho, wakatupa shipo shinene alimwi shibotu abuumbi isho nshaakashomesha kwaamba ayi kwiinda mushipo ishi, mukapulushikwe kubunyonyooshi bwa lunkumbwa buli mucishi ca panshi akutambula buumi bwa buLesa. 5Paceebo ceeco, amusebense cankusu kwaamba ayi mwiilike bwikaalo bubotu palushomo lwanu alimwi pabwikaalo bubotu, mwiilikewo lushibo. 6Palushibo lwanu, mwiilikewo kulitibuka, apalo pakulitibuka, mwiilikewo kukomenya moyo, apakukomenya moyo mwiilikewo buumi bwakupaila kwiine kwiine. 7Pabuumi bwakupaila kwiine kwiine, mwiilikewo lusuno lwa bwanabwankashi, apalo palusuno lwa bwanabwankashi ulo, mwiilikewo lusuno kubantu boonse. 8Na mulicite shintu ishi alimwi akutolelela kuya cibikilaawo ashimwi, teshi mukabe batolo, batacite mpindu mulushibo lwa Mwaami wesu Jesu Klistu. 9Sombi mushomi utacite sheeshi shintu uli anga ngumoofu. Wakalubaako ayi wakasalashikwa kuswa kushibiibi shakwe shikulukulu.
10Paceebo ceeco nobamakwesu, amwiindilishe kusebensa cankusu ayi mushinishe kwaamba ayi kwiitwa alimwi akusalwa kwanu kwakaswa kuli Lesa. Na mwacita boobo, teshi mukaweewo, 11sombi ulaakumucalwita mulyango wa muBweene butamaani bwa Mwaami Jesu Klistu Mupulushi wesu.
12Aboobo teshi nkacilekeewo kumwiibalusha makani aya lyoonse nakubi kwaamba ayi mulyeeshi kale alimwi ayi mulashoma amoyo woonse mulushinisho ndomwakatambula. 13Ndayeeya ayi ncibotu abuumbi kunoomwiibalusha makani aya kancili muumi. 14Mukwiinga ndishi kwaamba ayi ciindi cakushiya mubili wangu uno cili pafwaafwi, kweelana abwakandwiita Mwaami wesu Jesu Klistu. 15Alimwi ntokweelesha kumucanina nshila yakunokwiibalukilamo shintu ishi, nabi nebo nkafwe.
Bakamboni ba bulemu bwakwe Klistu
16Nditwakamwishibisha ayi Mwaami wesu Jesu Klistu ulaakwisa munkusu, tatukwe kukonkela shakupangabo bantu shabucenjeshi, sombi nkusu shakwe twakashibona ameenso esu. 17Ndyaakatambula bulemu alimwi akulemekwa kuswa kuli Lesa Ishi, wakanyumfwa liswi kuswa kuBulemu Bwiindaawo lyakwaamba ayi, “Uyu ngoMwanaangu ngoonsuni alimwi muli nguwe ndakondwa.” 18Swebo sobeene twakanyumfwa liswi ili lyakaswa kwiculu nditwakalinga anguwe pakalundu kasalalite.#Mate 17:1-5; Maako 9:2-7; Luka 9:28-35
19Aboobo tweshiba cancinencine ono ayi maswi akaamba balaluki bakulukulu ngalushinisho. Nkokwaamba ayi inga cabota na mwaakonkela mukwiinga ali anga ndilampi litoonyaka mumusena muli munshinshe kushikila bwaca alimwi kushikila mumuni wakwe Klistu ukamunike mumyoyo yanu anga ngwa ntanda, 20Sombi cinene ncemweelete kwishiba ncakwaamba ayi taaku muntu weenga wasansulula maswi a balaluki bakulukulu ali muMalembo akwe Lesa palwaakwe mwiine. 21Mukwiinga balaluki bakulukulu tebakalinga kwaamba shakaswa mukuyanda kwabo beene, sombi bakalinga kutanjililwa aMushimu Usalashi ndibakalinga kwaamba maswi akwe Lesa.
Currently Selected:
2 Pita 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.