Zaŋ 17
17
Yezu a ɗuley mey hərway ma Gawla ŋga hay
1A dəba ma guma ŋga neney me tsey na, Yezu ma tsakafada dey a 'ərlam me ləvey: «Baba, har ana ka slawa ba, vəlar maram a Bəzey ɗek, ma Bəzey ɗek ka da hasəkadaka bəzay. 2Andza, ta slam har eɗek, ma vəlar, ma wata ndaw hay tabiyaha na na, ŋga ka vəlatar mendzey me ndəvey kakay ana, a ndaw kah ma vəladatara na hay tabiya ha. 3Arka mendzey me ndəvey kakay ana ma taya ka səradəmaka kah na Bay ma Bəla asləta dərka na, ta Yezu Kriste ndaw kah ma sləradərawa na. 4I ka hasəkadaka bəzay ba ka dala, i ka ndaslada meslərey ɗek, na kah ma vəladiyawa i ka ka na ba. 5Ekəɗey na, Baba, vəlaya maram eɗek ka slam dey ɗek ta maram ana ŋga na i ma ndzafawa ka tsakay ɗek zla bəla ma kaha tsaray kakay ana. 6I ka ɓadatara mezəley ɗek ba a ndaw kah ma waladatiyawa ka bəla ma vəladataya na, ma vəla hiya na na ŋgeɗek, amana kah ka vəladataya ba, arta taya ka tsənamar sləmay ba a guma ɗek. 7Ekəɗey na, a səradama tabiyaha tek eɗek ma vəliyawa na hay na, a səmawa na da kah. 8Guma i ma vəlatar ana hay na, guma na kah ma vəladatiyawa na hay, taya ka təɓama ba, ka səradama ba dərka dərka na, i bawa na da kah, taya ka təɓama ba, ma sləradiyawa na kah. 9I ɗuley mey na hərway ta, i ɗuley mey hərway ma bəla gədem kakay. Ama i ɗuley mey na hərway ma ndaw kah ma vəladatiyawa na hay: taya ma vəla hiya na na ŋgeɗek. 10Tek a ɗaw hay tabiyaha ma vəla hiya na ŋgeɗek, kal kal andza tek eɗek hay tabiyaha, ma vəla hiya ŋga ɗaw ana. Arka maram aɗaw ka ɓey vaw da taya. 11Mazlambar aha, i da key na, tsoy i ka bəla ɗey dasakay; taya na taya ka bəla ɗey mba, ama yah na, i daɓa ha ka tsakay ɗek. Baba Kokwoɗ ana, nəkafata dey da ma mezəley ɗek, kah ma vəladiyawa na, ma taya ka dzəmam asləta, andza na ŋga lama, ma dzəmama asləta na tey. 12Da har la dzaya mba na, i nəkafata ha dey ba da mezəley ɗek ma vəladiyawa na. I ka wafata ba, kwa ndaw asləta da walaŋ ata ka zəɗey dakay, dakay na sey bəzey ma me zəɗey aŋga na na, ma aza ka ndesley andza me Mewindey Kokwoɗ. 13Ekəɗey na, i daɓa ha 'ay ɗek, i tsadatara ha guma a neney hay ka bəla na, ma taya ka ndzafama wuiya ɗaw kərem. 14I ka vəladatara guma ɗek ba, amana, bəla a ŋgəladata dey kakay, mavəday taya ndaw ma bəla hay kakay, andza yah ana, i ndaw ma bəla ɗey kakay ana tey. 15I tsəhafaka na, ma kah ka həlatəraɓa ba da bəla kakay, amana kah ka təkafata tek hayakakay ana hay ba. 16Taya ma vəla hiya ma bəla kakay, andza i ma vəla ha ma bəla kakay ana tey. 17Vahatar ’ar na ta dərka. Guma ɗek na, dərka na. 18Andza na ŋgeɗek ma sləradiyawa ka bəla na na, i sləradata ka bəla na tey. 19Hərway ta na i ma vəladaka vaw ɗaw kərem. Taya tiytsa na, ka təram ma vaha ’ar ahiya ta dzerey. 20I ɗuley mey na, hərway ta dada tsa kakay, i ɗuley mey satsa na ma ndaw ma da pam 'ar ka yah, kuse ma guma ta na hay. 21Haya na, tobiya ta ha ka dzəmam asləta, andza kah Baba, kah da yah, yah tey da kah ana. Ka kam na, taya da lama tiyatsa, ma aza bəla ka pey 'ar ma sləradiyawa na kah. 22Arka yah tey na, i ma vəlatar maram kah ma vəladiyawa na. Ka ndzam ma dzəma hiya asləta andza lama ma dzəma hiya asləta na, 23yah da taya, andza kah da yah ana, ma ka da husam a ma dzəma mey kərem ana, ma aza bəla ka da sərada, ma sləradiyawa na kah. Kah ka wuɗata ba andza kah ma wuɗaya na. 24Baba, a saya na, ka slam a ɗaw i kava na na, ndaw kah ma vəladataya na hay na, ka husam kava tey ka slam a ɗaw ana, ka zazərama me wezley dey, kah ma vəliyawa na, hərway kah ka wuɗaya ba, mba ka mezley ma bəla. 25Baba dzerey ha ana, andza bəla ka səradaka tsaray kakay na, i səradakawa ba Taya a neney hay na, ka səradama ba, ma sləradiyawa na kah. 26I ka ɓadatara mezəley ɗek ba, i da ɓadatara sa, ma aza ma wuɗa vaw na kah ma wuɗaya na na, ka ndzey da taya, yah ana i ka ndzey da taya tiyatsa.»
Currently Selected:
Zaŋ 17: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun