2 Piyer 1
1
Me tsey guma a vaw
1Yah Simeiyoŋ Piyer, gawla ma 'ay, maslaŋ ma Yezu Kriste, i windatar a ndaw na ma ndzafam ta dzerey ma Bay ma Bəla lakwa, ta me buwey lakwa Yezu Kriste, me pey 'ar ma wam kal kal ta na ŋga la na: 2Hayna hahaya ta zozoy ka safəkurawa haɗadzidzay, ta ma sərada Bay ma Bəla ta Yezu Bay’ərlam a lakwa.
Ma zəlawa ma Kretieŋ hay
3Akwa na, Bay'ərlam ta gədaŋ aŋga na, ka vəlandakwar tek ma haya ha ba, ma da nafandakwar da mendzey lakwa tabiyaha na, da me ɗula mey, da ma ɓadandakwar ndaw ma zəlandəkurawa ta maram aŋga, ta gədaŋ aŋga na, ma kada tek ana. 4Ta ŋga na na, tsekeley aŋga na haɗadzidzay ana, na ma tsəmandəkurawa kava na na, ka vəladəmandəkurawa ba, ma aza ta zleley ana ŋga na hay na, ka da fuləkwam a me dzəmey mey, a mendzey ma Bay'ərlam, kuray a neney ma buwəməkurawa ba da me zey, na ma ney dey ma gəlada ka bəla na. 5Ka mey ana ŋga na na tok na, səmadama gədaŋ a kwar tabiyaha: dzəmadama me pey 'ar a kwar ta me key tek hayna, a me key tek hayna na, a me sərey tek, 6a me sərey tek na, a me wey 'ar a vaw, a me wey 'ar a vaw na, matanduroŋ, a matanduroŋ na, me ɗemerey ’ar, 7da me ɗemerey ’ar na na, me key dzam ta malam hay, a me key dzam ta malam hay na, a ma wuɗa vaw. 8Hərway ndaraw a neney hay daha da vaw kwar haɗadzidzay na, ka da ndzam aha mayaɗ ahiya, mandzara me key tek ana kava kakay, ma da sərada Bay’ərlam a lakwa Yezu Kriste. 9Akwa na, ka ndaw tek a neney hayna hay a rafama dakay ana na, ŋga na ndaw wulaf me tetəmey ana: ka mətada 'ar ba, a sərafa ka ma bazləmafama meŋgəsey ŋga na zlekete na hay sakay. 10Hərwuiya tok na malam a ɗaw hay, səkadama me key gədaŋ adiya ma səmada ma zəlawa kwar ta ma gaɗəmawa kwar; da me key andza ha na, sek a da hwadakwar aha a me təɗey dakay. 11Akwa tok na, andza ha na, a da vələmakwar ta mevel hayna me fuləkwey a Slala ma kwoza ha, na ma Bay’ərlam a lakwa, ta Me buwey lakwa Yezu Kriste.
Me tsəney sləmay a guma
12Kəɗey satsa na, kwa andza ka səradama kuray ma ndza hiya gədaŋ ahiya da dərka ana na, a saya na re i ka madakwar ka pas ka pas təŋga. 13Ama i ma dzala təɗe kendzey i ɓəley aha mba na, kuray ka ndzam tseker kerre, ha sərafama ka guma ɗaw. 14Hərway i sərafa ha, har ana a gurawa ha bəse me wenəkey 'ar, andza na ma Bay’ərlam a lakwa Yezu Kriste ma ɓadaya na; 15amana, i da nəkafakwar dey haya haya, ma aza a dəba ma ma daway ɗaw na, da tek waray waray na, ha slafama ma wafa vaw, ma sərafəmata ka me tetəkey a neney hay. 16Akwa na, la ma ndza hiya na, ma tatəkadakwar ma ma da sawa gədaŋ ana ma Bay’ərlam a lakwa Yezu Kriste na, andza ma 'ərmbez ana sa na hay ma təkərəmata ma təkənadata ndaw hay ana tikay, amana hərway la ka nəkadəmərawa ba ta dey la, da me wezley dey ŋga tabiyaha na. 17Hərway ŋga me ndzefey me hesəkey bəzay ta maram da har ma Bay ma Bəla Baba, andza ma vəɗe ma ɗay ma tsənawa da me wezley dey mambay ana ma Bay ma Bəla, ŋga ma ləvar: neney na Bəzey ma mey 'ərev a ɗaw, a mbafaya, i da gəɗəmey na ŋga. 18Arka vəɗe ma ɗay ana ŋga na na, la na na, la ka tsənadama ba, a tsənawa na, da 'ərlam, la dzaya andza ŋga na, ka 'ar ma mamba Kokwaɗ. 19A fəna satsa na, guma ma ndaw sek hay da vaw lakwa daha, ma səmadəmandakwar, na təɗe kuray ma zazurama na, andza ma peterle a wezley aha dey da slam ləvaŋ aha, ha kasl ka bəzay lam a ndəzley aha, ma bamtay ma lamɗa a sləlawa ha da mevel a kwar. 20Tsufəmey ana na, səradama ba haya hayaha ɗagay: ndaw a slafa ma wandzaladakwar mey ma ndaw sek hay asləta da Mewindey Kokwoɗ ana hay andza ma ŋga me wuɗey ana kakay; 21akwa na ndaw a slafa me tsey guma ma ndaw sek ma slaw vaw ŋga tata kakay, ama ndaw a hay a da tsam guma da mey ma Bay ma Bəla na, ma dahəɗata na Mesəfrey Kokwoɗ ana.
Currently Selected:
2 Piyer 1: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun