Mark 14
14
Mizli madiɗa misipi jiviɗey migam gidiɓi ar Yesu
(Yo pura Mat 26.1-5; Luk 22.1-2; Zaŋ 11.45-53)
1A ndir hin cuw ɓa a gaka muguzlum ngi Pak waɗ ngi ɗaf manja ˀis araŋ. Masay madiɗahay ati buy ngi ɓimujuwahay ara puram jiviɗ ɓa a jaka Yesu ti wer, ɓa a kiɗaka vagay. 2Asi a ɓam na: «I jaka ar muguzlumo ta, vur mizli masa slikiɗam ɓi.»
Ngwas mipa urdi da Yesu a hirnga
(Yo pura Mat 26.6-13; Zaŋ 12.1-8)
3Yesu a ro hay Simoŋ misi kukula a Betani. Ti naŋ mazum ɗaf na, ngwasa sawa, naŋ ti gojogoɗ ngi ɗugur marva. Urdi miga ti nardi#14.3 Nardi i hirnga ngi dum magam di urdi misi cikili naŋ haɗi. pal naŋ mbaf araŋ, cikili naŋ tuwaˀ haɗa teˀe. A waha gojogoɗ ngi ɗugur marva tuwa, a mbiɗa mal naŋ nga hirnga Yesu. 4Mizli mekelemey a jam mevel, a ɓam: «A hiryaka urdi hana lambaˀ kanah mbrike? 5Anja a hiɗika urdi hana avra fineˀ suloy#14.5 Suloy pal i migir ngi mbur angi hiipas wãˀ. skat makir ɓa ngi vula dala nah da misi murgahay ta kwa!» Joˀ a jam mevel ar ngwas tuwa. 6Amma Yesu a ɓi: «Pulaka ngwasa, ki girakaŋ vur mike? Gwat naŋ miga hana, avu ya, naŋ kuy haɗa. 7Asi mike na, misi murgahaya, t'ada a ati kumo ndrehhe. Da ki wuɗam le na, ki gaka taŋ mezle gu. Amma ya, y'anta ndrehhe ati kumo ta. 8Gwat naŋ maga gu na, a ga le, a kuciy urdi daf dumbuŋ, ɓa ngi ɗiyiy ng'ar vigiɗi. 9Gisiŋ, yi ɓu kum na: ko maka gar masa tilam mi ti Ɓimezle ar duniya na, a sa slufaka, ɓa a wulkam ar gwat ngi gi ngi ngwas hana.»
Yudas muwuɗ vul Yesu da masayay ɓa a jakaŋ
(Yo pura Mat 26.14-16; Luk 22.3-6)
10Akẽh na, Yudas Iskariyot, mbur ngi wuzla mizli mukuruˀ nga cuwoyo, aru ng'avi masay madiɗahaya, ɓa a vula taŋ Yesu. 11Taŋ micinaka ɓi nah na, a mumulom haɗa, a ɓakaŋ ɓa a sa vulakaŋ dala. Dar Yudas a pur jiviɗ ngi vula taŋ Yesu, ɓa a jakaŋ ti tuwaˀ ta.
Yesu ara zum ɗaf ngi muguzlum Pak ati mizli ngi seˀehey
(Yo pura Mat 26.17-25; Luk 22.7-14,21-23; Zaŋ 13.21-30)
12Hin mudumbuŋ ngi muguzlum ngi ɗaf manja ˀis araŋ, hin ngi kiɗa tumuŋ ngi Pak na, mizli ngisi Yesuhoy a ɓakaŋ: «Ki wuɗ ɓa i ra ɗiyaka gwatay ɓa kisa zuma ɗaf ngi muguzlum Pak amaka?» 13Joˀ Yesu a slin mizli cuw ar wala ngi mizli ngi seˀeheye, a ɓa taŋ: «A ram ng'ar walahay. Mbur ada na, a sa ji hirnga ti kum, taˀ ti yam ti kukulum a hirnga. Sipakaŋ. 14Hay naŋ masa ci anga na, ɓaka buy ngi haya: ‹Kumani a ɓi na: viŋ ya masa zuma ɗaf ngi muguzlum Pak anga ati mizli ngisi yahay na, naŋ maka?› 15Naŋ a sa bugukum hay mijirgasl a hirnga cala, mikiɓiŋ kiɓiŋ, mufuca le, miɗiya gwataya le angaŋ, ki ɗiyam ndra gwatay a diga.» 16Mizli ngi seˀehey tuwa, a bam, a ram ng'ar walahaya, a lumaka gwatay gar kaɓa Yesu miɓa taŋ di tuwa. Joˀ a ɗiyaka gwat ngi zum ngi muguzlum Paka. 17Ngi pastaˀa, Yesu a ndiloko ati mizli ngi seˀehey mukuruˀ nga cuwo. 18Ti taŋ micifam, ara zumam na, Yesu a ɓi: «Gisiŋ, yi ɓukum na: mbur pal asi kum a sa vuliy da mizli ɓa a jikiy, i mbur mazum gwat ati ya na.» 19Mizli ngi seˀehey a ndurɗom hiri, mbur gar a cufuɗaŋ, a ɓaŋ: «I ya kwa? I ya kwa?» 20A ɓa taŋ: «I mbur ngi wuzla kum mukuruˀ nga cuwoy, maca haŋ ng'ar sikiɗ ati ya na. 21Gisiŋ, Mangal ngi mbur a sa cuh kaɓa mutohoko ɓi naŋ. Amma mbur masa vulaŋ ɓa a jakaŋ na, kay, naŋ ar bonoy! Anja zuwen taŋ miyaka mbur nah zleˀe ta, a funa le!»
Ɗaf ngi Buy Yesu muvula
(Yo pura Mat 26.26-30; Luk 22.14-20; 1 Kor 11.23-25)
22Ti taŋ mazumam ɗafa, Yesu a zuɓa ɗaf, a dirba naŋ muɗuwul mi ara na, a ngila, a vula da mizli ngi seˀeheye, a ɓa taŋ: «Ani, tiɓaka, hana i dumvu ɗu.» 23Dar a zuɓa sikiɗ misi ti mbaazla, a dirba naŋ miga siseˀ da Buymisemuŋ na, a vula taŋ di, taŋ gar a sakaŋ. 24Joˀ Yesu a ɓa taŋ: «Hana i pumbus ɗu, pumbus ngi jumoˀay, a pi vur mizli haɗi. 25Gisiŋ, yi ɓukum na: Y'anta sa si mbaazla misenna mata wãˀ, hã tapas ya masa si nawaya ar Zumabuy ngi Buymisemuŋ.» 26Dar a zlam dimis ngir ɗerewol Dimis, a dirba nah, a bam nga muwã Tutumbur.
Yesu a ɓi: «Piyer a sa ɓi a siniy ta.»
(Yo pura Mat 26.31-35; Luk 22.31-34; Zaŋ 13.36-38)
27Yesu a ɓa taŋ: «Kum gar, kisa kilam, asi a tohoko le, a ɓi: ‹I sa kiɗa mijigine vagay, tumuŋhoy a sa zliɗam hirnga.› 28Amma a dirba ya misa slikiɗ le na, yi sa ru dumbuŋ ar kum nga Galile.» 29Piyer a ɓaŋ: «Ko da mizli gar a kilam le kwana, ya, y'anta sa kil ta ndiɗaˀ wãˀ.» 30Yesu a ɓaŋ: «Gisiŋ, yi ɓuw na: duvuɗ dana, ɓa hã kucukur a sa ji ˀay ˀis cuw na, naɓa ka, ki ji mi le, ki siniy ta, ki siniy ta, ˀis makir si.» 31Amma Piyer a ɓi ti gidaŋ ma: «Ko da a bi ngi muc ati ka kwana, kay, y'anta sa ji mi ti ka ta ndiɗaˀ wãˀ.» Mizli ngi seˀe mekelemey gar a ɓam kanah ya.
Yesu midir dibiɗ a Getsemane
(Yo pura Mat 26.36-46; Luk 22.39-46)
32Dar a ndilam ar li mazilaka Getsemane, Yesu a ɓa mizli ngi seˀeheye: «Y'ani ra dirdibiɗ, cifam aka kwaɗay.» 33A zuɓa Piyer, Zak waɗ Zaŋ, a ram bumoˀ. Zluwun a gaŋ, didak a zla muɗaŋ, 34a ɓa taŋ: «Didak a muɗiy le wãˀ ngi mucu. Cifam aka, ki hinjam ta.» 35Yo aru kileŋ neˀ, a hin kup a ruwuy, a dir dibiɗ ɓa zliv da a gi na, pas nah a cuh kileŋ ava. 36A ɓi: «Aw Baha, Cine ɗu, gwat mafucukuw anta, kiraha sikiɗ ngi bonoy hana kileŋ avu ya. Amma anta kaɓa ya mawuɗ ta ɓula, sey kaɓa ka mawuɗo.» 37A so na, a luuma taŋ ara hinjam. A ɓa Piyere: «Simoŋ, ki hinje kwa? Ki lum gidaŋ ngi cifi joˀ titiri ko ler pal gu ta kwa! 38Ki hinjam ta, diram dibiɗ, ɓa ki cam ar tikin ta. Mevel ada ɓula, amma dumvu a hĩhĩy le.» 39A kirih neˀ ava ma, a dir dibiɗ, a ɓi ɓi misi purla ka naŋ miɓa zleˀe tuwa ma. 40Dar a mawa ma, a luuma taŋ ara hinjam ma ni, asi hiri ziriɓ ziriɓ wãˀ. A sinaka ɓa a ɓakaŋ kini ta. 41Ti naŋ mumo sar mimakir naŋ na, a ɓa taŋ: «Kira hinjam, yo ki ra muskam vu aruŋ kwa? Muk muduba so! Ler a ndila le. Puraka, a vulaka Mangal ngi mburo le asi haŋ ngi migi mungrahay. 42Slikiɗam, akum le! Puraka, mbur mavuliy ɓa a jikiy na, a ndilo le.»
Mijaka Yesu
(Yo pura Mat 26.47-56; Luk 22.47-53; Zaŋ 18.3-12)
43A haŋhaŋ, ti naŋ maɓi aruŋ si na, Yudas, mbur ngi wuzla mizli mukuruˀ nga cuwoyo, a ndilo ti zigiduw haɗi aseˀeŋ, vu kaˀ kaˀ ti maslalam ati gandayay. Mislinoko taŋ, i masay madiɗahay, buy ngi ɓimujuwahay waɗ mizli micawwahay. 44Yudas, mbur mawuɗ a vulaŋ tuwa, naŋ masa biga taŋ di na, a ɗiyaka ɓi nah le ati taŋ, a ɓa taŋ: «Mbur ya masa jaŋ kuɓuy na, i naŋ. Jakaŋ, a ram di, jiginaka kuy kuy.» 45Naŋ mindilo si na, aru ng'avi Yesu, a ɓaŋ: «Kumani!» Joˀ a jaŋ kuɓuy. 46Mizli mekelemey a ndilam vu kuvbum ar Yesu, a jakaŋ. 47Mbur pal a wuzla mizli misi ati Yesu akẽh, a muɗo maslalam, a nguma gawla ngi masay madiɗa, a bukoŋ slimiɗe krac. 48Yesu a zla a ɓa taŋ: «Ki soko ti maslalam ati gandayay nga ji ɗu kaɓa yi mufuyovu mbrike? 49Vur hin gar na, y'ada ati kum ar li dubuna gwat da mizli ar hay ngi Bumbulvuŋ a Zerusaleme, ko ki jikiy ta. Amma a gi kahana, ɓa Ɓimutoho gar a gi muduba.» 50Dar mizli ngi seˀehey gar a pulakaŋ, a kilam. 51Gawla mekelem ada sipa Yesu, naŋ ti zana gijaw avu vu tewle. A jakaŋ, 52amma naŋ a pula zana naŋ kacap, a kil gulndiŋ kine.
Yesu a mbuŋ kus madiɗa ngi ngilawuy
(Yo pura Mat 26.57-68; Luk 22.54-55,63-71; Zaŋ 18.13-14,19-24)
53A ram ti Yesu ngi hay masay madiɗa, masay madiɗahay gar, mizli micawwahay ati buy ngi ɓimujuwahaya, a kusom le cek a diga. 54Piyer ara supo di zar kileŋ, hã wazlaray masay madiɗa tuwa. A cifi le ati gawla ngi hayay, ara naˀam vu. 55Yo masay madiɗahay ati madiɗa mingila wuyoyo, a wuɗam sedewo vur Yesu ɓa a gakaŋ kiita ngi mucu, amma a lumam ta. 56Mizli haɗi a gam sedewo ti slir a hirnga Yesu, amma sedewo taŋ, a jam haŋ ta ma. 57Mizli mekelemey a slikiɗam ɓa a gam sedewo ti slir ar naŋ, a ɓam: 58«I cinaka zleˀe, a ɓi na: ‹I sa mbizla hay ngi Bumbulvuŋ misi a Zerusalem, mizli mindiraka na, yo angi hin makir na, yi sa ndir mekelem, misi i mizli masa ndiraka ta.›» 59Amma ko gar ti nah kwana, a jumomˀay ar sedewo taŋhaya ta si. 60Masay madiɗa, a slikiɗ a wuzla kus tuwa, a cufuɗa Yesu: «Sedewo, mizli tayna magaka taŋ ar ka gar na, ki mbiɗa neˀ ta wãˀ kwa?» 61Amma Yesu aro lek lek, a mbiɗa ko neˀ ta. Masay madiɗa a cufuɗa ma, a ɓaŋ: «Ki Kristu, Mangal ngi Bumbulvuŋ ndra maɗuwulakaŋ mi na kwa?» 62Yesu ɓaŋ: «I ya. Yo kisa puraka Mangal ngi mburo, a cifi le joˀ tir vay hazum ngi Buymisemuŋ misi gidaŋ wãˀ.
Yo ara sawa ar gazlavay a muŋ ma.»
63Masay madiɗa a ngira zana naŋhaya, a ɓi: «I wuɗam sedewo ngi mi aruŋ maka? 64Ki cinaka naŋ maza Buymisemuŋ na le. Ki wulkam mbrike?» Taŋ gar a slakaŋ kiita, a ndila le ngi kiɗ vagay. 65Mekelemey ar wala taŋ, a zlaka a tufakaŋ tazlay, a juwakaŋ hiri, a turɓusoko haŋ, a kiɗakaŋ, a ɓakaŋ: «Mukuɗuw na, i waka? Njika so.» Joˀ gawla migi slrahay a tiɓaka Yesu, a cakaŋ babarva.
Piyer a ɓi a si na Yesu ta
(Yo pura Mat 26.69-75; Luk 22.56-62; Zaŋ 18.15-18,25-27)
66Ti Piyere muro a ruwuy, a wazlaray na, diili pal a wuzla diili migi slra ngi masay madiɗa a ndilawa. 67A pura Piyer maniˀi vu tuwa, a singila, a singila na, a ɓaŋ: «Ka kwana, ka ati Yesu, mbur Nazaret na ya.» 68Amma Piyer a ji mi, a ɓi: «Yi si na ta, ka mawuɗo ɓi vuna, y'anta sla wala nah ta.» Joˀ aru ng'ar jawleeru avra. Akẽh na, kucukur a ji ˀay. 69Diyli migi slra tuwa a pura, a zla a ɓa ɓi nah da mizli misi akẽh ma: «Mbur hana, i mbur ngisi taŋ!» 70Amma Piyer a ji mi ma. Neˀ a dirba nah ma na, mizli misi akẽh, a ɓaka Piyer tuwa ma: «Gisiŋ, ka ki mbur ngisi taŋ, yo ki mbur Galile.» 71Joˀ Piyer a zla a hudum, a ɓi: «Yi si na mbur kum maɓikiy vurˀe vuna ta. Da yi gi di i slir na, anja Buymisemuŋ a kutiy ti bonoy.» 72A haŋhaŋ si na, kucukur a ji ˀay sar mucuw naŋ, dar Piyer a wuluk keŋ ar ɓi Yesu miɓaŋ di zleˀe tuwa: «Ɓa hã kucukur a sa jiˀay sar cuw na, naɓa ki ji mi le, ki siniy ta, ki siniy ta, ˀis makir si.» A wus vu ng'avra, dar a zla a tuwuy.
Currently Selected:
Mark 14: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.