HEBEREY 1
1
Ɓi ngi Buymisemuŋ, Mangal naŋ miɓa
1Zleˀe na, Buymisemuŋ a ɓa dideˀ ndraˀahaya le, is mbeˀ mbeˀe, ti jiviɗ wal wal haɗi, a cinaka ɓi nah baɗ avu mijiviɗ naŋhay. 2Amma angi hin ngi dirba muwãˀ ndra misi anga hana na, mingiɓi ngi Buymisemuŋ, i cinaka baɗ avu Mangal naŋ. Buymisemuŋ a cifaŋ i buy ngi gwatay gar, yo a ga duniya ti seˀe ma. 3Mangal nah na, i wucuɗ ngi dudok ngi Buymisemuŋ, Buymisemuŋ, naŋ kahana kahana na, a bugo di le wãˀ. Yo majaha gwatay gar na, i naŋ ti mingiɓi naŋ migidaŋ. A dirba naŋ mubuna mungra ngi mizli avra na, a cifi a muŋ tir vay hazum ngi Buymisemuŋ migidaŋ wãˀa.
Mangal ngi Buymisemuŋ a funa modrohoyo le
4Mangal ngi Buymisemuŋ, a tiri madiɗa le fineˀ modrohoyo wãˀ. Vurˀe, Buymisemuŋ a caŋ slimiɗ mupuɗaw haɗi fineˀ nga taŋ. 5Asi mike na, Buymisemuŋ miɓi angi Ɓimutoho:
«Ki Mangal ɗu, i yuw le dana» na,
Ko a ɓi vur modrohoyo ɗaˀ kahana ta.
«I sa tiri Cine naŋ,
naŋ kwana, a sa tiri Mangal ɗu» na,
a ɓa taŋ ɗaˀ ta ma. 6Yo ti Buymisemuŋ mawuɗ ɓa a slino Mangal naŋ modogom ng'ar duniya na, a ɓi:
«Anja modro ngi Buymisemuŋhoy gar a
dilkam a mbuŋ naŋ.»
7Buymisemuŋ a ɓi vur modrohoyo na:
«I tiri himiɗ ti modro ɗuwoyo,
yo i tiri irne vu ti migi slra ɗuwoyo.»
8Amma a ɓi vur Mangal naŋ na:
«Aw Buymisemuŋ, janga ngi Zumabuy ɗike,
a ndir hã ngi samadin.
Ki sa Zumabuy ɗike ti gi kiita jeŋ jeŋ.
9Ki wuɗ ɓi mijeŋŋe, ki hirsa ɓi malambaˀa.
Aw Buymisemuŋ, Buymisemuŋ ɗike,
mupuw mal ngi vula slra na vurˀe.
A puw mumul kaɓa mal a hirnga ɗike.
I mal mavul mumul, fineˀ ngi cil ɗikeye.»
10Yo Buymisemuŋ a ɓi ma na:
«Aw Bumbulvuŋ,
muɗuva virzi ngi hirwuy,
zle angi zlivirzi naŋ i ka.
I ka miga muŋ ti haŋ ɗiki.
11Gwat tayna gar a sa kiɗam mi.
Amma ka, k'ada ndrehhe.
Haˀaw, taŋ gar a sa gam magala kaɓa zana.
12Ki sa fuɗa taŋ kaɓa mafuɗam godo.
Haˀaw, a sa mbiɗam kaɓa zana.
Amma ka, k'ada ngi ɗik ngi ɗik ndrehhe,
yo vi ɗike, anta sa kiɗ mi ta ndiɗaˀ wãˀ.»
13Buymisemuŋ ɓa a ɓi:
«Cifi joˀ tir vay hazum ɗu,
hã ɓa yi hina mesene ɗikey asi sar ɗike,
ar deɗe ngi gwat ngi ɗuva sar» na,
ko a ɓi vur modro naŋhaya kahana ɗaˀ ta ndiɗaˀ. 14Modrohoy vuna gar i musuɗukoy, yo a gam slra ngi Buymisemuŋ maslina taŋ ngi jina mizli masa lumam lih na ta kwa?
Currently Selected:
HEBEREY 1: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.