Est G 1
1
Mardoke mumusuwun
1Ar vi mucuw naŋ ngi Artakzerses madiɗa mazum buy a ruwuy Perse, ar hin mudumbuŋ naŋ ngi kiya Nisaŋ na, Mardoke a musuwun. Mardoke i muy ngi Benjameŋ. I mangal ngi Yahir, dideˀ ngi Simey, yo dideˀ mucuw naŋ ngi Kis. 2 Mardoke i mbur Yude, hay naŋ a Suz. I mbur mupuɗaw ngi mamay buy. 3 Nabukodonozor, buy madiɗa ngi Babiloŋ ati Yekoniya, buy Zuda a jam mizli le zleˀe nga Zeruzalem, Mardoke naŋ awuzla taŋ.
4 Musuwun ngi Mardoke n’ani:
gurjik sina, a cin salalay, ati mi wuwwo,
hirwuy a ra hurum, a ra jijik,
mizli ngi si ruwuyoy a ra zluwunam.
5 Keɗ na, ngoŋgoŋ madiɗahay cuw, a girjaham ng’avi cala avi cala, taŋ gweˀ ngi kiɗa vu. A ra wudam ti gidaŋ. 6 Dar sukwi ngi mizli gar a juwam vu ɓa a ra zlaka sukwi ngi mizli mijeŋŋeheye ngi kiɗa vu.
7Nah i hin ngi luvuŋ ati li mitimbiɗim,
i hin ngi bonoy ati ngi muɗa didak,
hin ngi guzuvura vu ati ngi ga zluwun da mizli ngi si ruwuyoy.
8Mendere maso ng’ar sukwi ngi mizli mijeŋŋehey na, a ra ga taŋ zluwun, yo a ra jijika taŋ. Mbur gar a ra juw vu ngi kutuko mucu. 9Dar a wudam ng’avu Buymisemuŋ. Ar deɗe ngi mbiɗi mi ngi widi taŋ na, i mizaw mifirndiw misi yam vil vil haɗa ara, mabo tir miviɗiviɗi mirakka. 10Pas mikaˀ tuwa mana, li a gi jahha ava ma. Dar mizli muguzuvurahay a slikiɗam, a ngizlaka mesene taŋ, muhuhumo vuhoyo.
11 Mardoke mupura gwat ar musuwun nah na, gwat Buymisemuŋ mawuɗ a ga na, naŋ a pura le. A puɗuk, ko a ɓa ɓi naŋ da mbur ta. N’ada hiipas ar li wuluk naŋ, ɓa sey a sla wala naŋ.
Mardoke minjika ɓi ngi gidiɓi da buy
12 Mardoke a sa cifi joˀ ngi musuko vu a mamay buy ati Gabata waɗ Tarra, mizli munguɗohoy, mijigina mamay buyoy. 13Naŋ a ra cina mizli tayna makiɗam slir ar wala taŋ na, a wuɗ ɓa sey a sina da a ɓam ɓi ngi mike na. A sa cina na, a wuɗam ɓa a sa kiɗaka buy Artakzersese. A kil kutum, a ra ga mbaɗa nah da buyo. 14Buy a cufuɗa mizli munguɗohoy tuwa cuw taŋ. Taŋ minjikaka ɓi naŋ na, a kiɗa taŋ vagay vagay. 15 Buy a toho ɓi naŋ toh toh ti tuh, ɓa a ndir ngi sa wuluk keŋ. Mardoke a toho toh toh aya. 16Dar buy a pula jiviɗ da Mardoke ɓa a cifi ngi gi slra a mamay naŋ. A vulaŋ gwat ngatarahay vur gwat naŋ miga na. 17 Mbur muhuhumo vu mekelem ada, a zilaka Haman, i mangal ngi Hamedata, i mijiviɗ ngi buy aya. Vur mizli mucuwoy mumucam tuwa na, naŋ a ra juw vu ngi gi malambaˀ da Mardoke ati mizli naŋahaya.
Currently Selected:
Est G 1: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.