TILA MI 1
1
Gwat gar i ngatara lambaˀ
1Misi ani na, i mingiɓi ngi mbur misi sinmijileŋ, mangal ngi Davit, yo i buy Zeruzalem.
2Mbur misi sinmijileŋ a ɓi na, i ngatara lambaˀ,
gwat gar i ngatara lambaˀ.
3Mbur maga slra gǝr gǝr ar duniya misenna,
a pulaŋ gir mi da naŋ vunaka?
4Vi a cuh, mekelem a ndilawa,
amma hirwuyo naŋ da nga naŋ nga naŋ na si.
5Pas a bawa, a diɗi,
a wus vu ngi mi ng'ar li naŋ mabo tiraˀa na a muŋ.
6Himiɗ aru nga ruwuy, yo aru ng'aseˀeŋ,
himiɗ a gi, a gi, a cuh,
a zlo virzi hirik a muŋ ma.
7Mizaway gar na, a ram ng'ar mubuliy,
amma ko mubuliy anta nih ta,
li mizaway maɓulom ng'ara na,
mizaway ara ɓulom ng'ara ava na si.
8A ɓaka ɓi le gar, a ɓi ɗaˀ ɗaˀa mata,
hiri anta mbi ti pura gwata ta,
yo slimiɗ anta mbi ti cine ɓi ta.
9Gwat misi ada zleˀe na, masa gi ada na i nah vuna,
gwat migaka zleˀe na, a sa gam i nah vuna si,
ko gwat nawaya loŋ magi ar duniya misenna anta.
10Da ko gwat ada zliv i ɓam vurˀe:
«Puraka, hana i gwat nawaya» tekeɗe kwana,
naɓa gwat nah, naŋ da zle misi ngadana ta ar vihey mucohom dumbuŋ ar ndra.
11Ɓi ngi hin magala mucuh zleˀe na, wuluk nah anta so keŋ a hirnga mata,
yo gwat masa gi tumbuŋ na,
ɓi nah anta sa so keŋ a hirnga
mizli masa ya ka taŋ tumbuŋ na mata ya.
Mbur misi sinmijileŋ maɓa ɓi ngi gwat naŋ misina
12Ya mbur misi ti sinmijileŋ, i cifi le, yi buy ar Israyeley, a Zeruzaleme.
13Gwat mira gi ar duniya misenna gar na,
yi hurdum di le a mevele, ɓa i si na ti sinmijileŋ.
Nah gar na, i gwat ngi gi welele ngi so ti hiryi, Buymisemuŋ muvula
da mizli titirahay ɓa a gaka taŋ.
14Slrahay magam ar duniya misenna gar na, yi pura taŋ le,
amma na, i ngatara lambaˀ, naŋ ka sipi himiɗ ngarataŋ.
15Gwat muguɓo le gurjoŋ na, a slikiɗaka deŋ gu mata,
yo gwat mizizi le kwana, a slufaka gu mata.
16Joˀ yi ɓi a kwacay ɗu na:
«Ani yi dubun le, yo yi lum sinmijileŋ le ati sin ngi gi gwata haɗa,
fineˀ buy wanaka gar muzum buy dumbuŋ ar ya a Zeruzaleme.»
17Yi hurdum le a mevel ɗu ngi si na sinmijileŋ,
yo ngi sla wala ngi mibirnga ati gilawa,
nah gar na, i si na le, naŋ ka sipi himiɗ ngataraŋ.
18Asi da mburo naŋ da ti sinmijileŋ haɗa na, naɓa lik kwana ada haɗa ya,
yo mbur maska sin naŋ nga mbuŋ na, a sik di i bonoy.
Currently Selected:
TILA MI 1: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.