ǃGae-amdi 1
1
Jerusalems di ǃoaxa mâsib
1Mâtis kha ǃāsa ǃū-aisase ǂnôa, ǃās khoexa ge isa!
ǁÎs ge ǃoataras ase ge ī, ǁaedi ǁaegu ge kai isa!
ǁAedi di gaoǀgôas ge nēsi khobosis khobosîsenna ra dī.
2Tsuxubas ge ǁîsa kaise tsûsase ra ā; ǁgamrogu ge xōra âs ai hâ.
Aiǃâkam ǀnamsabegu âs dib tsîn ge ǁîsa nî ǁkhaeǂgaose hâ tama hâ.
Hoaraga ǀhōsan âs ge ǁîsa ǀhôagaoǃnâ tsî ge ǁîs khākhoe kai.
3Judab khoen ge ǃkhōsis ǃnâ ge ǃgû-ūhe, khobosis ǃoa tsî kai ǁgâiǀāb ǃnâ.
Nēsisan ge ǁaedi ǁaegu ǁan hâ tsî sâǃkhai-e hō tama hâ.
Hoa ǃgôaǃgonaon ge ǁîna ǃnamiǂgā hâ, ǂō ǃkhaidi ǁaegu.
4Sions ǃoa garu daogu ge ra ǃoa, khoe-i xare-i ǁâudī nî sīse ǁîgu ǃnâ ǃnari tama amaga.
ǂGâ-amdi hoadi âs ge a ǃū-aisa tsî pristergu âs ge ra ǃgae.
Oaxaedi âs ge ǃoa hâ, tsîs ra ǁîs tsîna kaise ra tsâ.
5Mâǃoasaben âs ge ge dana kai; khākhoen âs ge a sâsa.
ǃKhūb ge ǁîs nî ǃoa ǃkhaisa ge ǃaroma, ǃûǂamdi âs di ǂguib ǃoa.
Ôasan âs ge ǃkhōsabese ge ǁgariǃgû-ūhe, mâǃoasaben aiǃâ.
6Hoaraga ǂkhaisasib âsas ge Sions ôasa ǂoaǃnâ,
gaoǀgôagu âs ge ǃû-ai-e ūhâ tama ǁgû-i khami ge ī.
ǁÎgu ge ǀgaiose ǃgôaǃgonaob aiǃâba xu ge ǁhâ.
7Nē tsēdi ǁîs ǁgâiǀāb didi ǃnâs ge Jerusalemsa hoaraga ǃgâi xūn aiǃâs ge ūhâ ina ra ǂâihō
Khoen âs ge khākhoeb ǃomǁaen ge ǁnā, o ge hui-ao-e ge ūhâ tama hâ i,
ǁîs di khākhoen ǁîsa ra dann ge ǁnās âs ǂama ra âi.
8Jerusalems ge ge ǁore tsî ǁnā-amaga ge ǃanuoǃnâ
Hoan ǁîsa gere ǃgôasiba mān ge ge ǃharaxū si, ǀōǀkhāsib âsan ge mû amaga.
ǁÎs ǂûs ge ǀhâimâinǀom tsî ge khao-oa.
9ǃAnuoǃnâsib âs ge saran ǂomamǃgâgu ǃnâ hâ; ǁîs ge ǀams âs xa ǂâi tama hâ
ǁNās âs ge kaise a tsûsa tsî-i ge ǁkhaeǂgao-ao-e a ǀkhaiba si.
Ti ǀkhomǀkhomsasiba kōǀî re ǃKhūtse khākhoeb ra dan xuige.
10ǃOmmi âbab ge mâǃoasabeba ge ǀhōǂui, ǁîs di ǃgomǀgausa xūnǀî
Mâtin Jodeǁî tamana ǁîs ǃanusib ǃnâ ra ǂgâxa ǃkhaisas ge gere mûǃhara
Elob ge ǁîn nî sī ǃkhaisa ǂkhāpa.
11ǁAes âs ge ra ǃgae, ǂûn nî xū-en ra ôase;
ǁÎn ǁuiban ge ǂû-i ama ra māǃkhuni, ûitsamasen nî hâga.
“Kōǀî te re ǃKhūtse, ti ǃharaxūsasib ǃnâ mû te re!” tis ge ǃāsa ra ā.
12“Sadu nē daob ai ra ǃkharudo ǁae tama hâ?
Tita tawa ge hâ tsû-i kō tsû-i hâsa kō re;
tsûb, ǃKhūb ge tita ǂama hā kaiba, ǁaixasib âb ǃnâ.
13“ǁÎb ge ǀgapiseba xu ǀaesa ge sî, tsîs ge ti sorosa ge khauǃkhū.
Ti ǂairab ge ǁnoa-e ge ǁguiba, khaosǀî ta nî oase.
ǁÎb ge tita ge ǁnāxū, hoaraga tsēsa ta ge tsûb ǃnâ hâse.
14“Ti ǃûǂamdi ge tita ai ǃgaeǀhaoǀhaohe hâ;
ti ǃaos aib ge ǃomra âb ǀkha ǁîna ǂgapu hâ, tsîb ge ǀgaib âtaba ra toa.
ǃKhūb ge ti khākhoena ge māǁnâ te, tsî ta ge ǁîn ǃoagu ge huio i.
15“ǃKhūb ge hoaraga ǀgaisa toroǃkhamaogu âtaga ǃgôaoǃnâse ge ǃgôa
ǁÎb ge toroǂnubisa ge sî, ti ǂkham khoega nî hîkākāse
Oaxaes Judab dis ǃaromab ge ǃKhūba dāǃnâǃkhaisa ǃnâ ge dā.
16“Nē xūn ǃaroma ta ge ra ā; mûra âtara ǁgamrob xa ra ǀoa.
Khoe-i xare-i ge hâ tama hâ, tita nî ǁkhaeǂgaose, tita nî ǂgaoǂgaoǃnâse
Ti ôan ge ǃū-ai hâ; khākhoeb ge dan xui-ao.
17“Sions ge ǃomkha âsa ra ǀhōǂui, xawe i ge ǁkhaeǂgao-ao-e ǀkhai;
ǃKhūb ge Jakob xa ge mîmā, ǁîba hâǂnami hân hoan nî ǁîb khākhoe ǃkhaisa.
Jerusalems ge ǁîn ǁaegu ǃanuoǃnâ xūse ge ī.
18“ǃKhūb ge a ǂhanu-ai, ams âb ǃoagu ta ge tita ge mâǃoaxa i.
ǁNâu te re ǁaeso hoaso; ti tsûb ǃnâ kōǀî te re.
Ti ǂkham khoegu tsî ǂkhamkhoedi ge ǃkhōsis ǃnâ ge ūbēhe.
19“Ti horesana ta ge ge ǂgai xawen ge ǁîna ge gāxaǃnâ te;
pristergu tsî ǂgaeǂgui-aogu ge ǃās ǃgangu ǃnâ ge ǁō,
ǂûna gu ge ûib ǃnâ nî hâse ôao.
20“Mû re ǃKhūtse ti ǂōǂōsiba! Ti ǀoms ge ǂkhū hâ
Ti ǂgaob ge ǂkhū hâ ti ǁoren ǃaroma
ǃGamdi ge ǃgangu ǃnâ hâ; omdi ǃnâs tsînab ge ǁōba hâ.
21“ǁÎn ge ti ǀhâimâinǀomde ra ǁnâu, ǀgui-i tita nî ǁkhaeǂgao-i tsîn ge ǀkhai.
Ti khākhoen ge tsūǃōbats go tita ǂama hā kai ǃkhais xa ra dâ
Mîmâits ge tsēsa hā kai re; tita khami khākhoena tsâ kai re.
22“ǂKhabasib ân ǃaroma ǁîna ǀgoraǃgâ
Titats ge ǁkhara khami ǁîn ona ǁkhara re.
Ti ǀhâimâinǀomdi a ǂgui tsîb ti ǂgaoba ǂkhabu hâ xuige.”
Currently Selected:
ǃGae-amdi 1: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.