Jona 1
1
Jonab ge ǃKhūba ra ǁnâuǀnamoǃnâ
1 ǃKhūb ge Amitaib ôab Jonab ǃoa ge mî:#2Gao. 14:25 2“ǂHomisen, î kai ǃās Nineves ǃoa ǃgû, î ǁîs ǃoagu sī ǃhoa. Tita ge ǁîs khoen di ǂkhabadība a ǂan xuige.” 3Xaweb ge Jonaba ǃKhūba xub nî ǃhūse ge ǂhomisen. ǁÎb ge Jopas ǁga ǃgû tsî ǁnāpa Tarsis ǃoa ra ǃnari doe-omsa ge hō. Ob ge matare tsî sîsenaogu ǀkha ǁîs ai ǂoa tsî Tarsis ǁga ge ǃgû, ǃKhūba xub nî bēse. 4Xaweb ge ǃKhūba ǀgaisa ǂoaba hurib ai ge hā kai; nē ǁgaoǂoab ge ǁnātikō ǀgaisase ge ǃgom, doe-oms ge khôaǃā ǁgas kōse. 5Sîsenaogu ge kaise ge ǃao, tsîb ge mâb hoaba ǁîb di eloba huib ǃaroma ge ǂgaiǀî. Tsî gu ge doe-oms ǃnâ ge hâ i xūna hurib ǃnâ ge aoǂgā, ǃaorosasiba ǀoroǀoros ǃaroma. Xawe Jonab ge doe-oms ǃnâ ǃnaka ǁgôa tsî ǃgam ǂomsa ge ǁom hâ i.
6Ob ge doe-oms di danaba ǁîb tawa sī tsî ge mî: “Tare-i ǃaromats ǁomǁgoe? Khâima, î sa eloba ǂgaiǀî. ǀNîsib ge ǁîba nî ǀkhomxa ge tsî ge ge ǂkhôaǁō tide.”
7O gu ge sîsenaoga ge mîǀîgu: “A ge ǀkhūsa ao, î ge tarib ǃaromab nē tsūǃgâba sage ǂama ra hāsa ǂanǂui.” O gu ge ǁnāti ge dī tsîs ge ǀkhūsa Jonab ai ge ǁnā. 8O gu ge ǁîb ǃoa ge mî: “Mîba ge re nēsi, tare-i ǃaromasa nē tsūǃgâb ra hāǂam gesa? Tare-ets nēpa ra dī? Mâ ǃhūba xuts ra hā? Mâ ǃhaos dits a?”
9Ob ge Jonaba ge ǃeream: “Hebreǁîta ge. Tita ge ǃKhūb ǀhommi di Elob, hurib tsî ǂnâsa ǃhūb tsîkha ge dība ra ǃoaba.” 10Jonab ge ǁîga ǃKhūba xub ra ǃhū ǃkhaisa ge mîba. O gu ge ǁnā aoga kaise ǃao tsî ǁîb ǃoa ge mî: “Tare-e kha nēts go dī-e?” 11Hurib ge ǃaruǀîǀgui gere ǁgao. O gu ge ǁîba ge dî: “Tare-e ge sats ǀkha nî dī, îb huriba ǁkhawa sige ǂnamipe ǃnō?”
12Ob ge Jonaba ge ǃeream: “Hurib ǃnâ go aoǂgā te re, ob ge sago ǂnamipe nî ǃnō. Ti ǀhapis ǃaromas go nē ǁgaoǂoasa hāǂam go ǃkhaisa ta ge a ǂan.”
13Aogu ge ǁkhā gu as kōse doe-omsa ǃhūb kōse sī-ūsa gere dītsâ, xawe ǁnāsa dī ǁkhā tama ge i, hurib ge ǃaruǀîǀgui gere ǁgao xui-ao. 14O gu ge ǃKhūb ǃoa ge ǂgai: “ǃKhūtse, tā ǃgam ge re, nē khoeba ge ûiba nî ǀhana ǃkhais ǃaroma. Sats ǃKhūts ge ǃgâibahets a khami go dī.” 15ǁNās khaoǃgâ gu ge Jonaba ū tsî hurib ǃnâ ge aoǂgā, ob ge hurib di ǁgaosiba ge toa. 16Nē ǃkhais ge aoga kaise ǃKhūba ge ǃao kai tsî gu ge ǃKhūba ǁguibasa dība tsî ǁîba gu nî ǃoabasa ge mîmâi.
17Tsîb ge ǃKhūba kai ǁauba ge sî, Jonabab nî harase, tsîb ge ǁîba ǃnona tsēdi tsî tsuxuga ǁaub di ǃnāb ǃnâ ge hâ i.#Mat. 12:40
Currently Selected:
Jona 1: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.