Johaneb 20
20
ǀKhaiǃnâ ǀhobas
(Mateub 28:1-8; Markub 16:1-8; Lukab 24:1-12)
1Sâtsēkam#20:1 Sâtsēkam: Grikegowab ge ǂGuro tsēs wekheb dis ti ūhâ. ǃnauǁgoagas ge Maria Magdalenasa ganupe i a ǃkhae hîa ǀhobas ǁga ge ǃgû tsîs ge ǀuis ǀhobasa xu ūbēhe hâ ǃkhaisa ge mû. 2ǁNā-amagas ge ǃkhoe tsî Simon Petrub tsî nau ǁkhāǁkhāsabeb* hîa ge Jesub xa ǀnamhe hâ ib tsîkha tawa sī tsî ge mî: “ǁÎn ge ǃKhūba ǀhobasa xu ūbē hâ tsî se ge mâpan go ǁgui bi ǃkhaisa a ǀū.”
3O kha ge Petrub tsî nau ǁkhāǁkhāsabeb tsîkha ǀhobas ǁga ge ǃgû. 4ǁÎkha ge ge ǀguiǃkhoe, xaweb ge nau ǁkhāǁkhāsabeba Petrub xa ǃgarise ǃkhoe tsî ǂguro ǀhobas tawa ge sī. 5ǁÎb ge ǃgamǃgâb geo lapiga ge mûǁgoe, xaweb ge ge ǂgâ tama hâ i. 6Ob ge ǁîba sao hâse Simon Petruba hā tsî ǀhobas ǃnâ ǂgâ tsî lapiga ge mûǁgoe, 7xawe aosenǃkhaib, Jesub danas ai ge hâ ibab ge nau lapigu tawa ge mû tama hâ i tsî ǁîba xamisase, ǀguri ge mûǁgoe. 8Ob ge nau ǁkhāǁkhāsabeb hîa ǂguro ǀhobas tawa ge sīb tsîna ǂgâ tsîb ge mû, o ge ǂgom. 9ǁNā ǁaeb ǃnâ kha ge ganupe Petrub tsî nau ǁkhāǁkhāsabeb tsîkha Xoas, ǁō hâna xub nî khâi ti ra mîsa ge ǁnâuǃā tama hâ i. 10ǁNās khaoǃgâ kha ge nē ǁkhāǁkhāsabekha ge ǁaru.
Jesub ge Maria Magdalenasa ra ǂhai
(Mateub 28:9-10; Markub 16:9-11)
11Tsî Marias ge ā rase ǀhobas ǃauga ge mâ i. Ā raǃâs ge ǃgamǃgâ tsî ǀhobas ǃnâ ge kōǂgâ. 12Tsî ǀgam ǀhomǃgākha, ǃuri sarana ana hâkha, ǀguiba danaǂam tsî nauba ǂai-am, Jesub soros ge ǁgoe i ǃkhaib ai ge mûǂnôa. 13O kha ge ǀhomǃgākha Mariasa “Tarase, tare-i ǃaromas ra ā?” ti ge dî.
Os ge ǁîkha “Ti ǃKhūban go ūbē tsî ta ge ǀū mâpan go ǁgui bi ǃkhaisa!” ti ge ǃeream.
14Tsî nēna mîtoa tsîs ge a dabasen, os ge Jesuba ge mûmâ, xawes ge Jesub a ǃkhaisa ge ǀū i. 15Ob ge Jesuba ge dî si: “Tarase, tare-i ǃaromas ra ā? Tari-es ra ôa?”
ǁÎs ge ǃhanasîsenaob ti ǂâi tsî ǁîb ǃoa ge mî: “ǃGôahesatse, sats ga ūbē bi hâ, o ǁnâi mîba te re, mâpats go ǁgui bi ǃkhaisa, î ta ǃgû tsî sī ū bi.”
16Ob ge Jesuba ǁîs ǃoa ge mî: “Mariase!”
Os ge dabasen tsî Hebregowab ǃnâ “Rabonitse!” ti ge mî. ǁNās ge “ǁKhāǁkhā-aotse” ti ra ǂâibasen. 17Ob ge Jesuba ǁîs ǃoa ge mî: “Tā tsâǀkhā te, ganupe ta ti Îb ǁga ǃapa tama xuige. Xawe ǃgû, î ti ǃgâsaga ‘ǃApa ta ra ti Îb tsî sadu Îb ǃoa, ti Elob tsî sadu Elob ǃoa’ ti sī mîba.”
18Os ge Maria Magdalenasa ǃgû tsî ǁkhāǁkhāsabega ǃKhūbas go mû tsî nē xūnab ge ǁîsa mîba ti ge mî.
Jesub ge ǁîb ǁkhāǁkhāsabega ra ǂhai
(Mateub 28:16-20; Markub 16:14-18; Lukab 24:36-49)
19ǁKhāǁkhāsabegu ge Jodeǁîna gu gere ǃao amaga ǁnā ǂguro tsēs wekheb dis di ǃuia dao-amde ǂganam tsî ǃnā-oms ǃnâ ge hâ i. ǃNapetamaseb ge Jesuba ǁîgu ǁaegub ǃnâ mâ tsî “ǂKhîba ab sago ǀkha hâ” ti ge mî. 20Nēsab ge mîs khaoǃgâb ge ǁîga ǃomkha tsî ǃnammi âb tsîna ge ǁgau. Tsî gu ge ǁkhāǁkhāsabega ǃKhūba gu ge a mû, o ge ǃgâiaǂgao. 21Ob ge Jesuba ǁkhawa ǁîgu ǃoa ge mî: “ǂKhîba ab sago ǀkha hâ, ti Îb ge tita sîs ǁkhās khami ta ge ra sî go.” 22Nēna mîtoa tsîb ge ǁîgu ai ǃnâi tsî “ǃAnu Gagaba ǃkhōǃoa. 23#Mat. 16:19; 18:18Khoe-e go ga ǁorena ǀûbao, ǁnā-i ge ǀûbahe hâ-e tsî khoe-e go ga ǁorena ūhâbao, ǁnā-i ge ūhâbahe hâ-e” ti ge mî.
Jesub tsî Tomab
24Xawe Tomab, disiǀgamǀagu di ǀguib, Didimub tis tsîna ǀon hâb ge Jesub ge hā ǃnubai ǁîgu ǀkha ge hâ tama hâ i. 25Tsî gu ge nau ǁkhāǁkhāsabega ǁîba “Sige ge ǃKhūba go mû!” ti ge mîba.
Xaweb ge Tomaba ǁîgu ǃoa ge mî: “ǁÎb di ǃomkha ǃnâ ta ga ǃgâusao-amdi mû tsî ǀkhunuba ta ga ǁîdi ǃnâ ǃkhāǂgā tsî ǃomma ǁîb ǃnammi ǃnâ ǃkhāǂgā tama i, o ta ge tātsē ǂgom tide.”
26Tsî ǁkhawa, ǁkhaisa tsēde ǁnās khaoǃgâ gu ge ǁkhāǁkhāsabega ommi ǃnâ Tomab ǀkha ǀhaosase ge hâ i. Ob ge Jesuba ǂganamsa dao-amdi xa ǂgâxa tsî ǁîgu ǁaegub ǃnâ mâ tsî ge mî: “ǂKhîba ab sago ǀkha hâ!” 27Tsîb ge Tomab ǃoa ge mî: “Sa ǀkhunuba nēpa ǀkhī-ū, î ti ǃomkha kō. Sa ǃomma hā-ū, î ti ǃnammi ǃnâ ǂgā, î tā ǂgomoǃnâ, xawe ǂgom re.”
28Ob ge Tomaba “Ti ǃKhūtse tsî ti Elotse!” ti ge ǃeream.
29Ob ge Jesuba ǁîb ǃoa ge mî: “Titats go mû xui-aots ra ǂgom? ǀKhaehen ge hâ ǁnān, mû tama xawe ra ǂgomna.”
Nē ǂkhanis di ǂâibasens
30ǀNî ǂgui saodi, nē ǂkhanis ǃnâ xoahe tama hâdeb ge Jesuba ǁîb ǁkhāǁkhāsabegu aiǃâ gere dī. 31Xawe di ge nēde Jesub a Xristu,* Elob Ôa ǃkhaisa du nî ǂgom tsî ǂgomsa xu du ǁîb ǀons ǃnâ ûiba nî ūhâse xoahe hâ.
Currently Selected:
Johaneb 20: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.