ǂHanuǂhanu-aogu 1
1
Judab tsî Simeonni tsîkha di ǃhaora ge Adonibeseka ra ǃkhō
1Josuab di ǁōb khaoǃgân ge Israelǁîna ǃKhūb ai ge dî: “Mâs sida ǃhaodi disa ǂgurose Kanaanǁîn ǃoagu sī nî ǃkham?”
2Ob ge ǃKhūba ge ǃeream: “Judab ǃhaos ge ǂgurose nî ǃgû. Tita ge ǃhūba ǁîn ǃomǁae ra māǁnâ.”
3On ge Judab ǃhaos di khoena Simeonni ǃhaos din ǃoa ge mî: “Sida ǀkha sida ge māhe ǀkharib ǃoa ǃgû re, î da ǀhûpe Kanaanǁîn ǃoagu sī ǃkham. Sida tsîn ge ǁkhawa sadu ge māhe ǀkharib ǃoa sadu ǀkha nî ǃgû.” ǁNāti ra ge Simeonni ǃhaos di khoen 4tsî Judab ǃhaos din tsîna ǀhûpe ge ǃkhamǃgû. ǃKhūb ge ǁîna Kanaanǁîn tsî Perisǁîn tsîn ǂama dansa ge mā, tsîn ge disiǀoadisi khoega Beseks tawa ge dan. 5ǁÎn ge Adonibeseka ǁnāpa ǀhao-ū tsî ǁîb ǃoagu ge ǃkham. 6ǁÎb ge ǃkhoeni, xawen ge sauru tsî ǃkhō bi tsî ǁîb ǃomkha di kai ǀkhunura tsî ǂaira âb di kai ǀkhunura tsîna ge ǃgaoǁnâ. 7Ob ge Adonibeseka ge mî: “Hûdisi gao-aogu, ǃomdi tsî ǂaidi âgu di kai ǀkhunude ǁhāǁnâhe hâgu ge ǃgau hâ ǃârona ti tāb ǃnaka gere sākhâi. Nēsib ge Eloba ǁîgu ǀkha ta ge dī khami tita ǀkha go dī.” ǁÎb ge Jerusalems ǁga ǃgû-ūhe tsî ǁnāpa sī ge ǁō.
Judab ǃhaos ge Jerusalems tsî Hebrons tsîra ra dan
8Judab aogu ge Jerusalems ǃoagu ǃkham tsî ǁîsa ge ū. Tsîn ge ǃās di khoena ǃgam tsî ǃāsa ge khauǃkhū. 9ǁNās khaoǃgâ gu ge ǁîga ǃnâuxa ǃhūb ǃnâ tsî ǃhomgu amǃgâ tsî ǃkhawagasǀkhāb ai ǁgoe ǂnâsa ǃhūb ǃnâ ǁan hâ Kanaanǁîn ǃoagu nî ǃkhamse ge ǂoa. 10ǁKhāti gu ge Hebrons, Kiriat-Arba ti ǂguro gere ǀonǂgaihes ǃnâ ge ǁan hâ i Kanaanǁîn ǃoagus tsîna sī ge ǃkham. ǁNāpa gu ge Sesaib, Ahimanni tsî Talmaib tsîgu di ǃhaode ge dan.
Otnieli ge Debirsa ra dan
(Josua 15:13-19)
11ǁNāpa xu gu ge Judab aoga Debirs, Kiriat-Sefers ti ǂguro gere ǀonǂgaihes ǃoagu sī ge ǃkham. 12ǁNā ǁaeb aib ge ǁîgu di ǀguib Kaleb ti ǀon hâba ge mî: “Kiriat-Sefersa dan tsî ga ū khoeba ta ge ti ôas Aksasa tarase nî mā.” 13Kaleb di ǂkham ǃgâsab Kenasi di ôab Otnieli ge ǃāsa ge dan, ob ge Kaleba ǁîb ôas Aksasa tarase ge mā bi. 14ǃGameb tsēs aib ge Otniela ǁîsa ge ǂgaoǀkhā î ǁîs îb ai ǃhanaǃhū-e ǂgan. Dâukib âsa xus ge ǁgôa tsîb ge Kaleba tare-es ra ǂgao ǃkhaisa a dî si, 15os ge ǁîsa ge ǃeream: “ǁGamǀaude ta ge ǂhâba hâ. Sats ge mā te ǃhūb ge a ǂnâsa.” Ob ge Kaleba ǀgapise ǁgoe ǀaudi tsî ǃnaka ǁgoedi tsîna ǁîsa ge mā.
Judab tsî Benjaminni tsîkha ǃhaora di dandi
16Kenǁîn, Moseb ǀuiǁgûb surib din on ge Judab khoen ǀkha palmhaidi ǃās, Jerixosa xu Arads ǃkhawagas ǃnâ Judab ǃnâ ǁgoe ǂnâsa ǃhūb ǁga ge doe. ǁÎn ge ǁnāpa Amalekǁîn#1:16 Amalekǁîn: Hebregowab ge Khoen ti ūhâ. ǁaegu sī ge ǁan. 17Judab ǃhaos di khoen ge Simeonni ǃhaos din ǀkha Sefats ǃnâ ge ǁan hâ i Kanaanǁîn ǃoagu sī ǃkham tsî ǁîna ge dan. ǁÎn ge ǃāsa hoaragase hîkākā tsî ǁîsa Horma#1:17 Horma: Nē ǀons ge Hebregowab ǃnâ hîkākās ti ra ǂâibasen. ti ge ǀonǂgai. 18-19ǃKhūb ge Judab di khoena ge hui tsîn ge ǃnâuxa ǃhūba ge ū, xawen ge Gasas, Askelons tsî Ekrons tsî ǁîdi ǂnamipe ǁgoe ǀkharigu tsîna ū tama ge i.#1:18-19 Tsîna ū tama ge i: Hebregowab ge Tsîn ge ge ū ti ūhâ. ǁNā khoen hurib amǃgâ ge ǁan hâ in ge ǀuri torokunide ge ūhâ i, ǁnā-amagan ge Judab di khoena ǁîna ge dan ǁoa i. 20Moseb ge mîmā hâ i khamib ge Kaleb, ǃnona ǃhaodi Anaki ôananôagub dide ge Hebronsa xu a ǃhaeǂuiba Hebronsa ge māhe. 21Xawen ge Benjaminni ǃhaos di khoena Jerusalems ǃnâ ǁan hâ Jebusǁîna ǃhaeǂui tama ge i, tsîn ge ǁîna ǁnā ǁaeba xu Benjaminni di khoen ǀkha ǁnāpa ǁan hâ.#Jos. 15:63; 2Sam. 5:6; 1Kro. 11:4
Efraimmi tsî Manaseb tsîkha di ǃhaora ge Betelsa ra dan
22-23Efraimmi tsî Manaseb tsîkha di ǃhaora ge Betels, ǁnā ǁaeb ai Lus ti gere ǀonǂgaihesa sī ge ǁnāǂam. ǃKhūb ge ǁîna ge hui. ǁÎn ge ǃkhē-aoga ǃās ǃnâ ge sîǂgā, 24tsî gu ge ǁîga ǃāsa xu ǃgoaxa khoeba mû tsî ǁîb ǃoa ge mî: “Mâti ge ǃās ǃnâ nî ǂgâ ǃkhaisa ǁgau ge re, sige ge tsûtsû tsi tide.” 25Ob ge ǁîba ǁîga ge ǁgau tsîn ge Efraimmi tsî Manaseb tsîkha di khoena ǃās ǃnâ ǂgâ tsî hoaraga khoen ǃās dina ge ǃgam, ǁnā khoeb tsî ǁîb di ǀaokhoen ǀguinan ge ǃgam tama ge i. 26ǁÎb ge Hetǁîn di ǃhūb ǁga ǃgû, ǁnāpa sī ǃāsa ǂnubi tsî ǁîsa Lus ti ge ǀonǂgai tsîs ge nētsēs kōse ti ǀon hâ.
Israelǁîn xa ge ǁgariǂuihe tama i khoen
27Manaseb di ǃhaos ge Betsans, Tanaks, Dors, Ibleams, Megidos tsî ǁîdi ǀgūse ǂnôa ǃādi di khoen tsîna ǁgariǂui tama ge i. Kanaanǁîn ge noxopa ǁnāpa ge ǁan hâ i.#Jos. 17:11-13 28Israelǁîn ge ǀgain geo, Kanaanǁîna ge ǁgari în ǁîna sîsenba, xawen ge Kanaanǁîna ǁgariǂui tama ge i.
29Efraimmi di ǃhaos ge Gesers ǃnâ ge ǁan hâ i Kanaanǁîna ǁgariǂui tama ge i tsîn ge Kanaanǁîna ǁîn ǀkha ǃaruǀî ǁnāpa ge ǁan.#Jos. 16:10
30Sebulonni di ǃhaos ge Kitrons tsî Nahalals tsîra ǃnâ ge ǁan hâ i khoena ǁgariǂui tama ge i, tsîn ge Kanaanǁîna ǃaruǀî ǁîn ǀkha ǁnāpa ǁan tsî ge ǁgarihe în ǁîna sîsenba.
31Aseri di ǃhaos ge Akos, Sidons, Axlabs, Aksibs, Helbaxs, Afeks tsî Rehobs tsîdi ǃnâ ge ǁan hâ i khoena ǁgariǂui tama ge i. 32Aseri di khoen ge Kanaanǁîn ǀkha ǀguipa ge ǁan hâ i, ǁînan ge ǁgariǂui tama hâ i xui-ao.
33Naftalib di ǃhaos ge Bet-Semes tsî Betanats tsîra di khoena ǁgariǂui tama ge i. Naftalib di khoen ge Kanaanǁîn ǀkha ge ǁanǀhao, xawen ge ǁîna Kanaanǁîna ge ǁgari, în ǁîn xa sîsenbahe.
34Amorǁîn ge Danni ǃhaos di khoena ǃnâuxa ǃhūb ǁga ge ǁgari tsî ǁîna ge mā-am tama hâ i, ǂhau ǃhūb ǃoan nî hāsa. 35Amorǁîn ge ǃaruǀî Ajalons, Salbims tsî Heresǃhommi tawa ge ǁan, xawe ra ge Efraimmi tsî Manaseb tsîkha ǃhaora di khoen xa ge ǁgarihe în ǁîna sîsenba.
36Amorǁîn di ǃhūǀgoras ge Selas ǀapasǀkhāb ai Akrabimsa-u aiǃâb ǁga gere ǃkharu.
Currently Selected:
ǂHanuǂhanu-aogu 1: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.